'ಅಸುರನ್‌' ಚಿತ್ರದ ರಿಮೇಕ್‌ 'ನಾರಪ್ಪ'
ಅಂದಹಾಗೆ, ತಮಿಳಿನಲ್ಲಿ ಸೂಪರ್‌ ಹಿಟ್‌ ಎನಿಸಿಕೊಂಡ 'ಅಸುರನ್‌' ಚಿತ್ರ ತೆಲುಗಿನಲ್ಲಿ 'ನಾರಪ್ಪ' ಶೀರ್ಷಿಕೆಯಲ್ಲಿ ರಿಮೇಕ್‌ ಆಗುತ್ತಿದೆ. 'ಅಸುರನ್‌'ನಲ್ಲಿ ಕಾಲಿವುಡ್ ನಟ ಧನುಷ್‌ ಮಾಡಿದ್ದ ಪಾತ್ರವನ್ನೇ 'ನಾರಪ್ಪ'ದಲ್ಲಿ ವೆಂಕಟೇಶ್‌ ಮಾಡುತ್ತಿದ್ದಾರೆ. ಗಟ್ಟಿ ಕಥಾಹಂದರದ ಜತೆಗೆ ಧನುಷ್‌ ನಟನೆಯಿಂದಾಗಿ ಆ ಸಿನಿಮಾ ದೊಡ್ಡ ಮಟ್ಟದಲ್ಲಿ ಸೌಂಡು ಮಾಡಿತ್ತು. ಹಾಗಾಗಿ 'ನಾರಪ್ಪ' ಮೇಲೆ ನಿರೀಕ್ಷೆ ಹೆಚ್ಚಿದೆ. ಆ ಪಾತ್ರವನ್ನು ತೆಲುಗಿನಲ್ಲಿ ವೆಂಕಟೇಶ್‌ ಹೇಗೆ ನಿಭಾಯಿಸಬಹುದು ಎಂಬ ಕುತೂಹಲ ಮೂಡಿದೆ.
ಶುರುವಿನಲ್ಲೇ ಅಚ್ಚರಿ ಮೂಡಿಸಿದ ವೆಂಕಟೇಶ್‌
ಜನವರಿ 21ರಂದು 'ನಾರಪ್ಪ' ಚಿತ್ರೀಕರಣ ಆರಂಭವಾಗಿದೆ. ಆ ಪ್ರಯುಕ್ತ ಸಿನಿಮಾದ ಕೆಲವು ಸ್ಟಿಲ್‌ಗಳನ್ನು ವೆಂಕಟೇಶ್‌ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. 'ವೆಂಕಿ ಮಾಮ' ಚಿತ್ರದಲ್ಲಿ ಸ್ಟೈಲಿಷ್‌ ಆಗಿ ಕಾಣಿಸಿಕೊಂಡಿದ್ದ ಅವರು ಈಗ ಸಂಪೂರ್ಣ ಬದಲಾಗಿದ್ದಾರೆ. ಹಳ್ಳಿ ಹೈದನ ಗೆಟಪ್‌ನಲ್ಲಿ ಬರುತ್ತಿದ್ದಾರೆ. ಪ್ರತಿ ಪೋಸ್ಟರ್‌ನಲ್ಲಿಯೂ ತೀವ್ರ ನೋಟ ಬೀರಿರುವ ವೆಂಕಟೇಶ್‌ ಈ ಚಿತ್ರದ ಬಗ್ಗೆ ಇದ್ದ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದ್ದಾರೆ.
'ನಾರಪ್ಪ'ದಲ್ಲಿ ದ್ವೇಷದ ಕಥೆ
ಮೇಲ್ಜಾತಿ ಮತ್ತು ಕೆಳ ಜಾತಿಯವರ ನಡುವೆ ನಡೆಯುವ ಸಂಘರ್ಷವನ್ನೇ ಆಧಾರವಾಗಿ ಇಟ್ಟುಕೊಂಡು 'ನಾರಪ್ಪ' ತಯಾರಾಗುತ್ತಿದೆ. ಇದು ಕೆಲವು ನೈಜ ಘಟನೆಗಳ ಆಧಾರಿತ ಕಥೆ ಎಂಬ ಮಾತು ಕೂಡ ಕೇಳಿ ಬರುತ್ತಿದೆ. ತೆಲುಗು ಸೊಗಡಿಗೆ ತಕ್ಕಂತೆ ಕಥೆಯಲ್ಲಿ ಒಂದಷ್ಟು ಬದಲಾವಣೆ ಮಾಡಿಕೊಂಡು ಚಿತ್ರ ತಯಾರಾಗುತ್ತಿದೆ. ಶ್ರೀಕಾಂತ್‌ ಅಡ್ಡಲ ನಿರ್ದೇಶನ ಮಾಡುತ್ತಿದ್ದಾರೆ. ಇದು ವೆಂಕಟೇಶ್‌ ನಟನೆಯ 74ನೇ ಸಿನಿಮಾ ಆಗಲಿದೆ.
ವೆಂಕಟೇಶ್‌ ಲುಕ್‌ಗೆ ಸೆಲೆಬ್ರಿಟಿಗಳು ಫಿದಾ
'ನಾರಪ್ಪ' ಪೋಸ್ಟರ್‌ಗಳನ್ನು ವೆಂಕಟೇಶ್‌ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುತ್ತಿದ್ದಂತೆಯೇ ಎಲ್ಲರಿಂದ ಮೆಚ್ಚುಗೆ ಮಾತುಗಳು ಕೇಳಿಬರುತ್ತಿವೆ. ಅನಿಲ್‌ ರವಿಪುಡಿ, ತಮನ್‌ ಎಸ್‌, ಸಮಂತಾ ಅಕ್ಕಿನೇನಿ, ರಾಘವೇಂದ್ರ ರಾವ್‌, ರಾನಾ ದಗ್ಗುಬಾಟಿ ಮುಂತಾದವರು ಟ್ವಿಟರ್‌ನಲ್ಲಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಲಕ್ಷಾಂತರ ಲೈಕ್ಸ್‌ ನೀಡುವ ಮೂಲಕ ಈ ಚಿತ್ರದ ಮೇಲೆ ತಮಗೆಷ್ಟು ನಿರೀಕ್ಷೆ ಇದೆ ಎಂಬುದನ್ನು ಅಭಿಮಾನಿಗಳು ಸಾಬೀತುಪಡಿಸಿದ್ದಾರೆ.