ಈ ವರ್ಷವೇ ರಿಲೀಸ್‌ ಆಗುತ್ತಾ 'ಲವ್‌ ಮಾಕ್‌ಟೇಲ್‌ 2'? ಗುಡ್‌ ನ್ಯೂಸ್‌ ಕೊಟ್ಟ 'ಡಾರ್ಲಿಂಗ್‌' ಕೃಷ್ಣ!

2020ರಲ್ಲಿ ಬಿಡುಗಡೆಯಾಗಿ ದೊಡ್ಡ ಯಶಸ್ಸು ಕಂಡ ಕೆಲವೇ ಸಿನಿಮಾಗಳಲ್ಲಿ 'ಲವ್‌ ಮಾಕ್‌ಟೇಲ್‌' ಕೂಡ ಒಂದು. ಕನ್ನಡದಲ್ಲಿ ಸೂಪರ್‌ ಹಿಟ್‌ ಎನಿಸಿಕೊಂಡ ಬಳಿಕ ಅದು ತೆಲುಗಿಗೂ ರಿಮೇಕ್‌ ಆಗುತ್ತಿದೆ. ಓಟಿಟಿ ಪ್ಲಾಟ್‌ಫಾರ್ಮ್‌ನಲ್ಲೂ ಧೂಳೆಬ್ಬಿಸಿದೆ. ಆ ಗೆಲುವಿನ ಕಾರಣದಿಂದ ನಟ, ನಿರ್ದೇಶಕ 'ಡಾರ್ಲಿಂಗ್‌' ಕೃಷ್ಣ ಅದರ ಸೀಕ್ವೆಲ್‌ ಮಾಡಲು ಮುಂದಾದರು. ಹಾಗಾದರೆ ಸೀಕ್ವೆಲ್ ಬಿಡುಗಡೆ ಯಾವಾಗ ಎಂಬ ಪ್ರಶ್ನೆ ಸಿನಿಪ್ರಿಯರಿಗಿತ್ತು. ಅದಕ್ಕೀಗ ಒಂದು ಸುಳಿವು ಸಿಕ್ಕಿದೆ.

ಈ ವರ್ಷವೇ 'ಲವ್‌ ಮಾಕ್‌ಟೇಲ್‌ 2' ಬಿಡುಗಡೆಯಾದರೂ ಅಚ್ಚರಿ ಏನಿಲ್ಲ. ಹೌದು, ಕೆಲವೇ ದಿನಗಳ ಹಿಂದೆ ಶೂಟಿಂಗ್‌ ಆರಂಭಿಸಿದ ತಂಡ ಬೆಂಗಳೂರು ಮತ್ತು ಮೈಸೂರಿನಲ್ಲಿ ಚಿತ್ರೀಕರಣ ನಡೆಸಿದೆ. ಆ ಬಗ್ಗೆ ಸೋಶಿಯಲ್‌ ಮೀಡಿಯಾ ಮೂಲಕ ಕೃಷ್ಣ ಅವರು ಅಪ್‌ಡೇಟ್‌ ನೀಡಿದ್ದಾರೆ. ಇಡೀ ತಂಡ ಸಾಗುತ್ತಿರುವ ವೇಗ ನೋಡಿದರೆ ಈ ವರ್ಷವೇ 'ಲವ್‌ ಮಾಕ್‌ಟೇಲ್‌ 2' ಬಿಡುಗಡೆ ಆಗಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ. ಇದು ಅಭಿಮಾನಿಗಳಿಗೆ ಸಖತ್‌ ಖುಷಿ ನೀಡಲಿದೆ.

ಎಡಿಟಿಂಗ್‌ ಸ್ಟುಡಿಯೋನಲ್ಲಿ ಕುಳಿತಿರುವ ಫೋಟೋವನ್ನು ಅಪ್‌ಲೋಡ್‌ ಮಾಡಿಕೊಂಡಿರುವ ಕೃಷ್ಣ ಅವರು, ಚಿತ್ರದ ಬಗ್ಗೆ ಮಾಹಿತಿ ನೀಡಿದ್ದಾರೆ. 'ಎಡಿಟಿಂಗ್‌ ಕೆಲಸ ನಡೆಯುತ್ತಿದೆ. ಶೇ. 60 ಭಾಗ ಚಿತ್ರೀಕರಣ ಮುಕ್ತಾಯ ಆಗಿದೆ. ಆದಷ್ಟು ಬೇಗ ನಿಮಗೆ ಸಿನಿಮಾ ತೋರಿಸಲು ಉತ್ಸುಕನಾಗಿದ್ದೇನೆ. ಲವ್‌ ಮಾಕ್‌ಟೇಲ್‌ 2, ಹೊಸ ಸಿನಿಮಾ, ಹೊಸ ಭರವಸೆ. ಆದಿಯ ಜರ್ನಿ ಮುಂದುವರಿಯುತ್ತದೆ' ಎಂದು ಅವರು ಬರೆದುಕೊಂಡಿದ್ದಾರೆ.

also read: 'ಲವ್ ಮಾಕ್ಟೇಲ್ 2' ಸಿನಿಮಾದ ನಾಯಕಿ ಹೆಸರು ಬಹಿರಂಗಪಡಿಸಿದ ಡಾರ್ಲಿಂಗ್ ಕೃಷ್ಣ, ಮಿಲನಾ ನಾಗರಾಜ್!

ಈ ಸಿನಿಮಾದ ಪಾತ್ರವರ್ಗದ ಬಗ್ಗೆ ಸಿನಿಪ್ರಿಯರಿಗೆ ಭಾರಿ ಕುತೂಹಲವಿದೆ. ಮೊದಲ ಭಾಗದಲ್ಲಿ ಇದ್ದವರು ಸೀಕ್ವೆಲ್‌ನಲ್ಲೂ ಇರುತ್ತಾರಾ ಎಂಬ ಪ್ರಶ್ನೆ ಇದೆ. ನಟಿ ಮಿಲನಾ ನಾಗರಾಜ್‌ ಮತ್ತೆ ಕಾಣಿಸಿಕೊಳ್ಳಲು ಸಾಧ್ಯವೇ ಎಂಬ ಅನುಮಾನವೂ ಇದೆ. ಇತ್ತೀಚೆಗಷ್ಟೇ ಚಿತ್ರದ ನಾಯಕಿ ರೇಚಲ್‌ ಡೇವಿಡ್‌ ಅವರನ್ನು ತಂಡ ಪರಿಚಯಿಸಿದೆ. ರಘು ದೀಕ್ಷಿತ್‌ ಸಂಗೀತ ಸಂಯೋಜನೆಯಲ್ಲಿ ಹಾಡುಗಳು ಮೂಡಿಬರಲಿವೆ.

also read: 'ಲವ್‌ ಮಾಕ್‌ಟೇಲ್'ನಲ್ಲಿ ಲವರ್‌ಬಾಯ್‌ ಆಗಿದ್ದ ಡಾರ್ಲಿಂಗ್‌ ಕೃಷ್ಣ ಈಗ ಯಾಕೆ ದೇವದಾಸ್‌ ಆಗಿಬಿಟ್ಟರು?