'ಒಡೆಯ' ಸಿನಿಮಾದ ಫಸ್ಟ್ ಡೇ ಕಲೆಕ್ಷನ್ ಎಷ್ಟು?

ಆ್ಯಕ್ಷನ್‌ ಸಿನಿಮಾಗಳಿಗೆ ಹೇಳಿ ಮಾಡಿಸಿದ ನಟ ಚಾಲೆಂಜಿಂಗ್ ಸ್ಟಾರ್ ದರ್ಶನ್‌. ಅಬ್ಬರದ ದೃಶ್ಯಗಳನ್ನು ಸಮರ್ಥವಾಗಿ ನಟಿಸುವ ಕಲೆ ಅವರಲ್ಲಿದೆ. ಕೈಯಲ್ಲಿ ಮಚ್ಚಿದ್ದರೆ ಎಂಥ ಕಟುಕನನ್ನು ಸಲೀಸಾಗಿ ಸಾಯಿಸಬಲ್ಲ ದೃಶ್ಯಗಳು ಅವರಿಗಾಗಿ ಕಾದಿರುತ್ತವೆ. ಅವೆಲ್ಲವೂ 'ಒಡೆಯ'ಸಿನಿಮಾದಲ್ಲಿವೆ. ಅದನ್ನು ಅವರು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ. ಅಭಿಮಾನಿಗಳ ನಿರೀಕ್ಷೆಯಂತೆ ಡೈಲಾಗ್‌ ಹೊಡೆದಿದ್ದಾರೆ ದಚ್ಚು. ಸಿನಿಮಾದ ಮೊದಲಾರ್ಧದಲ್ಲಿ ಕಥೆಗಿಂತಲೂ ಮಾತಿಗೇ ಹೆಚ್ಚು ಪ್ರಾಶಸ್ತ್ಯ ಸಿಕ್ಕರೆ, ದ್ವಿತೀಯಾರ್ಧದಲ್ಲಿ ಭಾವನಾತ್ಮಕ ಸನ್ನಿವೇಶಗಳಿಗೆ ಜಾಗ ಕೊಟ್ಟಿದ್ದಾರೆ. ಅಲ್ಲಲ್ಲಿ ಹಾಡುಗಳು ಬಂದರೂ, ಅವು ಕೇವಲ ಆಲ್ಬಂ ಗೀತೆಗಳಾಗಿ ಉಳಿಯುತ್ತವೆ. ಅಭಿಮಾನಿಗಳಿಗೆ 'ಒಡೆಯ' ಸಿನಿಮಾ ವರ್ಷದ ಕೊನೆಯಲ್ಲಿ ಹಾಕಿದ ಹೋಳಿಗೆ ಊಟವೇ ಸರಿ.

ಕರ್ನಾಟಕದಲ್ಲಿ ಅತಿಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ನಟ ಎಂದರೆ ಅದು ದರ್ಶನ್ ಮಾತ್ರ. ಅವರ ಸಿನಿಮಾಕ್ಕಾಗಿ ಅಭಿಮಾನಿಗಳು ಕಾಯುತ್ತಿರುತ್ತಾರೆ. 'ಒಡೆಯ' ಚಿತ್ರದ ಮೊದಲ ದಿನದ ಕಲೆಕ್ಷನ್ ಸಿನಿ ಮೂಲಗಳ ಪ್ರಕಾರ 7 ಕೋಟಿ ರೂಪಾಯಿ ಎಂದು ಹೇಳಲಾಗುತ್ತಿದೆ, ಇದು ಅಧಿಕೃತ ಮಾಹಿತಿಯಲ್ಲ. ಆದರೆ ಮೂರು ಕೋಟಿ ರೂಪಾಯಿ ಕಲೆಕ್ಷನ್ ಆಗಿದೆ ಎಂಬ ಮಾತು ಕೂಡ ಗಾಂಧಿನಗರದಲ್ಲಿ ಹರಿದಾಡುತ್ತಿದೆ. ನಾಳೆ-ನಾಡಿದ್ದು ವೀಕೆಂಡ್ ಆಗಿರೋದಕ್ಕೆ ಹೆಚ್ಚು ಕಲೆಕ್ಷನ್ ಆಗುವ ಸಾಧ್ಯತೆ ಇದೆ. ಒಟ್ಟಾರೆಯಾಗಿ 'ಒಡೆಯ' ಸಿನಿಮಾ ನೂರು ದಿನಗಳನ್ನು ಒಳ್ಳೆಯ ಗಳಿಕೆಯೊಂದಿಗೆ ಪೂರೈಸುವ ಲಕ್ಷಣ ಆರಂಭದಲ್ಲಿಯೇ ಕಾಣುತ್ತಿದೆ. 'ಒಡೆಯ'ನ ಬೊಕ್ಕಸಕ್ಕೆ ಎಷ್ಟು ಹಣ ಬೀಳತ್ತೆ ಕಾದು ನೋಡಬೇಕಿದೆ.