ಅದೇ ರೀತಿ, ತರುಣ್‌ ಸುಧೀರ್‌ ನಿರ್ದೇಶನದ 'ರಾಬರ್ಟ್‌' ಚಿತ್ರದ ನಾಯಕಿ ಬಗ್ಗೆ ದೊಡ್ಡ ಮಟ್ಟದ ಕುತೂಹಲ ಸೃಷ್ಟಿ ಆಗಿತ್ತು. ಹಲವಾರು ಹೆಸರುಗಳು ಕೇಳಿಬಂದಿದ್ದವು. ದಕ್ಷಿಣ ಭಾರತ ಚಿತ್ರರಂಗ ಹಾಗೂ ಬಾಲಿವುಡ್‌ನ ಅನೇಕ ನಟಿಯರ ಜೊತೆ ನಿರ್ದೇಶಕರು ಮಾತುಕಥೆ ನಡೆಸಿದ್ದಾರೆ ಎಂದೇ ಹೇಳಲಾಗಿತ್ತು. ಕಡೆಗೂ ಆಯ್ಕೆ ಆಗಿದ್ದು ಬಾಲಿವುಡ್‌ ಬೆಡಗಿ ಆಶಾ ಭಟ್‌. ಅವರು ಮೊದಲ ಸಿನಿಮಾ ಮಾಡಿದ್ದು ಬಾಲಿವುಡ್‌ನಲ್ಲಾದರೂ ಅಪ್ಪಟ ಕನ್ನಡದ ಪ್ರತಿಭೆ. ಮೂಲತಃ ಭದ್ರಾವತಿಯವರಾದ ಆಶಾ ಭಟ್‌ ಮಾಡೆಲಿಂಗ್‌ ಲೋಕದಲ್ಲೂ ಮಿಂಚಿದ್ದಾರೆ. 'ರಾಬರ್ಟ್‌' ಮೂಲಕ ಕನ್ನಡ ಸಿನಿಮಾ ಪ್ರಿಯರಿಗೆ ಪರಿಚಯ ಆಗುತ್ತಿರುವ ಅವರೊಳಗೆ ಏನೆಲ್ಲ ಪ್ರತಿಭೆ ಇದೆ ಗೊತ್ತಾ?
ಆಶಾ ಕಂಠಕ್ಕೆ ಫ್ಯಾನ್ಸ್‌ ಫಿದಾ!
ಬಾಲಿವುಡ್‌ನ 'ಜಂಗ್ಲಿ' ಸಿನಿಮಾದಿಂದ ಬಣ್ಣದ ಲೋಕದಲ್ಲಿ ಪಯಣ ಆರಂಭಿಸಿದ ಆಶಾ ಭಟ್‌ ಒಳ್ಳೆಯ ನಟಿ ಎಂಬುದರಲ್ಲಿ ಅನುಮಾನ ಇಲ್ಲ. ನಟ ವಿದ್ಯುತ್‌ ಜಾಮ್ವಾಲ್‌ ಜೊತೆ ತೆರೆ ಹಂಚಿಕೊಂಡ ಅವರು ಮೊದಲ ಸಿನಿಮಾದಲ್ಲಿ ಮೀರಾ ಎಂಬ ಪಾತ್ರದಲ್ಲಿ ನಟಿಸಿದ್ದರು. ಅವರೊಳಗೊಬ್ಬ ಗಾಯಕಿ ಕೂಡ ಇದ್ದಾಳೆ ಎಂಬುದು ಈಗ ಬಹಿರಂಗ ಆಗಿದೆ. ಇತ್ತೀಚೆಗೆ ಟ್ವಿಟರ್‌ನಲ್ಲಿ ಅವರು ಒಂದು ಗೀತೆ ಹಾಡುವ ಮೂಲಕ ತಮ್ಮ ಇಂಪಾದ ಕಂಠದ ಪರಿಚಯ ಮಾಡಿಸಿದ್ದಾರೆ. ಸದ್ಯ ಲಾಕ್‌ಡೌನ್‌ನಲ್ಲಿ ಕಾಲ ಕಳೆಯುತ್ತಿರುವ ಅವರು ಎಲ್ಲ ಸೆಲೆಬ್ರಿಟಿಗಳಂತೆ ಸೋಶಿಯಲ್‌ ಮೀಡಿಯಾದಲ್ಲಿ ಸಕ್ರಿಯ ಆಗಿದ್ದಾರೆ. ಈ ವೇಳೆ ಹಾಡಿನ ಮೂಲಕ ಎಲ್ಲರನ್ನೂ ತಮ್ಮತ್ತ ಸೆಳೆದುಕೊಂಡಿದ್ದಾರೆ.
ಅಭಿಮಾನಿಗಳಿಗೆ 'ಡಿ ಬಾಸ್‌' ಕೊಟ್ರು ಸಿಹಿ ಸುದ್ದಿ! ನಾಯಕಿ ಆಶಾ ಭಟ್‌ಗೆ ತಪ್ಪಲಿಲ್ಲ ಬೇಸರ!
ತುಂತುರು ಅಲ್ಲಿ ನೀರ ಹಾಡು...
'ಎಂಥ ಗೊಂದಲದ ಸಮಯದಲ್ಲೂ ಹಾಡುವುದರಿಂದ ನನಗೆ ಕಂಫರ್ಟ್‌ ಎನಿಸುತ್ತದೆ. ಹಾಗಾಗಿ ನನ್ನ ಅಚ್ಚುಮೆಚ್ಚಿನ ಹಾಡು ಹೇಳಲು ಪ್ರಯತ್ನಿಸಿದ್ದೇನೆ. ನಿಮಗೂ ಇಷ್ಟವಾಗುತ್ತದೆ ಎಂದು ಭಾವಿಸುತ್ತೇನೆ' ಎಂದು ಬರೆದುಕೊಂಡಿರುವ ಆಶಾ ಭಟ್‌ ಆಯ್ದುಕೊಂಡಿದ್ದು 'ಅಮೃತ ವರ್ಷಿಣಿ' ಚಿತ್ರದ 'ತುಂತುರು ಅಲ್ಲಿ ನೀರ ಹಾಡು...' ಗೀತೆಯನ್ನು. ಯಾವ ವೃತ್ತಿಪರ ಗಾಯಕಿಗೂ ಕಮ್ಮಿ ಇಲ್ಲ ಎಂಬಂತೆ ತನ್ಮಯಳಾಗಿ ಈ ಹಾಡನ್ನು ಅವರು ಹಾಡಿದ್ದಾರೆ. ಹಾಡಿಗೆ ಒಪ್ಪುವ ಹಾವಭಾವದ ಮೂಲಕ ಅಭಿಮಾನಿಗಳಿಗೆ ಮೋಡಿ ಮಾಡಿದ್ದಾರೆ. ಅವರ ಕಂಠಸಿರಿಗೆ ಅನೇಕರು ಫಿದಾ ಆಗಿದ್ದಾರೆ. ಎಲ್ಲರೂ ಮೆಚ್ಚಿ ಕಾಮೆಂಟ್‌ ಮಾಡಿದ್ದಾರೆ. ಸದ್ಯ ಟ್ವಿಟರ್‌ನಲ್ಲಿ ಹಾಡಿರುವ ಆಶಾ ಭಟ್‌ ಮುಂದಿನ ದಿನಗಳಲ್ಲಿ ಯಾವುದಾದರೂ ಸಿನಿಮಾಗೂ ಹಾಡಿದರೆ ಅಚ್ಚರಿ ಏನಿಲ್ಲ.
ಯಶ್‌ ಜೊತೆ ಕಾಣಿಸಿಕೊಂಡ ದರ್ಶನ್ ಸಿನಿಮಾದ ನಾಯಕಿ!!
ಆಶಾ ಬಗ್ಗೆ ತಿಳಿದುಕೊಳ್ಳಬೇಕಾದ್ದು ಇನ್ನೂ ಇದೆ
ಅಂದಹಾಗೆ, ಆಶಾ ಭಟ್‌ ಕನ್ನಡ ಚಿತ್ರರಂಗಕ್ಕೆ ಈಗತಾನೆ ಪರಿಚಯಗೊಳ್ಳುತ್ತಿದ್ದಾರೆ. ಅವರ ಬಗ್ಗೆ ಅಭಿಮಾನಿಗಳು ತಿಳಿದುಕೊಳ್ಳಬೇಕಾದ್ದು ಬಹಳಷ್ಟಿದೆ. 27ರ ಪ್ರಾಯದ ಈ ಚೆಲುವೆ ಮಾಡೆಲಿಂಗ್‌ನಲ್ಲಿ ದೊಡ್ಡ ಹೆಸರು ಮಾಡಿದ್ದಾರೆ. 2014ರಲ್ಲಿ ಮಿಸ್‌ ಸುಪ್ರಾನ್ಯಾಷನಲ್‌ ಕಿರೀಟ ಅವರ ಮುಡಿಗೇರಿತ್ತು. 'ಮಿಸ್‌ ದೀವಾ 2014' ಸ್ಪರ್ಧೆಯಲ್ಲಿ ಆಶಾಗೆ ಮೂರು ವಿಶೇಷ ಪ್ರಶಸ್ತಿ ಸಿಕ್ಕಿತ್ತು. ಹಲವು ಅಂತಾರಾಷ್ಟ್ರೀಯ ಕಂಪನಿಗಳಿಗೆ ಅವರು ರೂಪದರ್ಶಿಯಾಗಿದ್ದಾರೆ. ಕಾಲೇಜು ದಿನಗಳಲ್ಲೇ ಎನ್‌ಸಿಸಿ ಚಟುವಟಿಕೆಗಳಲ್ಲಿ ಆಶಾ ತೊಡಗಿಕೊಂಡಿದ್ದರು. ಅದರ ಅಂಗವಾಗಿ ಶ್ರೀಲಂಕಾ ಮಿಲಿಟರಿ ಕ್ಯಾಂಪ್‌ಗೂ ಭೇಟಿ ನೀಡಿದ್ದರು. ಆ ವೇಳೆ ಆಶಾಗೆ ಶ್ರೀಲಂಕಾ ಅಧ್ಯಕ್ಷರಿಂದ ಆಲ್‌ರೌಂಡರ್‌ ಪ್ರಶಸ್ತಿ ಕೂಡ ಸಿಕ್ಕಿತ್ತು.
'ರಾಬರ್ಟ್‌' ನಾಯಕಿ ಆಶಾ ಭಟ್‌ ಸಾಧನೆ ಬಗ್ಗೆ ದರ್ಶನ್ ಫ್ಯಾನ್ಸ್‌ ತಿಳಿದುಕೊಳ್ಳಬೇಕಾದ ಸತ್ಯಗಳು!