1500 ಕೋಟಿ ರೂ. ಬಜೆಟ್‌ನ ಹಾಲಿವುಡ್ ಸಿನಿಮಾದಲ್ಲಿ ಧನುಷ್‌! ಹೊರಬಿತ್ತು ಬಿಗ್ ಬ್ರೇಕಿಂಗ್ ನ್ಯೂಸ್‌!

ನಟ ಧನುಷ್ ತಮಿಳು ಮಾತ್ರವಲ್ಲದೆ, ಹಿಂದಿ ಚಿತ್ರರಂಗದಲ್ಲೂ ಗುರುತಿಸಿಕೊಂಡಿದ್ದಾರೆ. ದಕ್ಷಿಣದ ಭಾಷೆಗಳಲ್ಲಿ ಅವರ ಸಿನಿಮಾಗಳಿಗೆ ಬೇಡಿಕೆ ಇದೆ. ಎರಡು ವರ್ಷಗಳ ಹಿಂದೆ 'ದಿ ಎಕ್‌ಸ್ಟ್ರಾರ್ಡನರಿ ಜರ್ನಿ ಆಫ್‌ ದಿ ಫಕೀರ್' ಎಂಬ ಹಾಲಿವುಡ್‌ ಸಿನಿಮಾದಲ್ಲಿ ಧನುಷ್ ನಟಿಸಿದ್ದರು. ಇದೀಗ ಅವರಿಗೆ ಹಾಲಿವುಡ್‌ನಿಂದ ಮತ್ತೆ ಬುಲಾವ್ ಬಂದಿದೆ. ಈ ಬಾರಿ ಅವರು ನಟಿಸುತ್ತಿರುವ ಸಿನಿಮಾದ ಬಜೆಟ್ 1500 ಕೋಟಿ ರೂ. ಎನ್ನಲಾಗಿದೆ. ಈ ಮೆಗಾ ಪ್ರಾಜೆಕ್ಟ್ ಬಗ್ಗೆ ಇಲ್ಲಿದೆ ಮಾಹಿತಿ.

'ಅವೆಂಜರ್ಸ್‌' ನಿರ್ದೇಶಕರ ಸಿನಿಮಾದಲ್ಲಿ ಧನುಷ್
ಹಾಲಿವುಡ್‌ನಲ್ಲಿ 'ಕ್ಯಾಪ್ಟನ್ ಅಮೆರಿಕ', 'ಅವೆಂಜರ್ಸ್‌' ಸರಣಿ ಸಿನಿಮಾಗಳ ಮೂಲಕ ಜನಪ್ರಿಯರಾಗಿರುವ ರುಸ್ಸೋ ಬ್ರದರ್ಸ್ (ಆಂಟನಿ ರುಸ್ಸೋ-ಜೋಸೆಫ್‌ ರುಸ್ಸೋ) ಈಗ ಮತ್ತೊಂದು ಬಿಗ್ ಬಜೆಟ್‌ ಸಿನಿಮಾಗೆ ಕೈ ಹಾಕಿದ್ದಾರೆ. 'ದಿ ಗ್ರೇ ಮ್ಯಾನ್' ಇದರ ಶೀರ್ಷಿಕೆ. ವಿಶೇಷವೆಂದರೆ, ಇದು ನೆಟ್‌ಫ್ಲಿಕ್ಸ್‌ ನಿರ್ಮಾಣ ಮಾಡುತ್ತಿರುವ ಸಿನಿಮಾ. ಇದುವರೆಗೂ ನೆಟ್‌ಫ್ಲಿಕ್ಸ್‌ ನಿರ್ಮಿಸಿದ ಸಿನಿಮಾಗಳಲ್ಲೇ 'ದಿ ಗ್ರೇ ಮ್ಯಾನ್' ಅತೀ ದುಬಾರಿಯ ಸಿನಿಮಾವಾಗಿದೆ. ಇದರ ಬಜೆಟ್ 1,500 ಕೋಟಿ ರೂ. ಎನ್ನಲಾಗುತ್ತಿದೆ. ಈ ಸಿನಿಮಾದಲ್ಲಿ ಧನುಷ್‌ಗೆ ಮುಖ್ಯಪಾತ್ರ ಇದೆ. ಇದೊಂದು ಸ್ಪೈ ಸಿನಿಮಾವಾಗಿದೆ.

ಧನುಷ್‌ ಜೊತೆ ಕ್ರಿಸ್‌ ಇವಾನ್ಸ್
'ದಿ ಗ್ರೇ ಮ್ಯಾನ್' ಸಿನಿಮಾದಲ್ಲಿ ಧನುಷ್ ಜೊತೆ ಹಾಲಿವುಡ್‌ನ ಸ್ಟಾರ್ ನಟರು ಬಣ್ಣ ಹಚ್ಚುತ್ತಿದ್ದಾರೆ. 'ಅವೆಂಜರ್ಸ್', 'ಸ್ಪೈಡರ್ ಮ್ಯಾನ್', 'ಅಂಟ್ ಮ್ಯಾನ್‌' ಖ್ಯಾತಿಯ ಕ್ರಿಸ್‌ ಇವಾನ್ಸ್, 'ಲಾ ಲಾ ಲ್ಯಾಂಡ್', 'ಗ್ಯಾಂಗ್‌ಸ್ಟರ್ ಸ್ಕ್ವಾಡ್', 'ಲಾಸ್ಟ್ ರಿವರ್' ಸಿನಿಮಾಗಳ ಖ್ಯಾತಿಯ ರಯಾನ್ ಗೊಸ್ಲಿಂಗ್, 'ಬ್ಲೇರ್ ರನ್ನರ್‌', 'ನೋ ಟೈಮ್ ಟು ಡೈ' ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿರುವ ಅನಾ ಡೇ ಆರ್ಮಸ್ ಕೂಡ 'ದಿ ಗ್ರೇ ಮ್ಯಾನ್' ಚಿತ್ರದಲ್ಲಿ ಪ್ರಮುಖ ಪಾತ್ರಗಳಲ್ಲಿ ಬಣ್ಣ ಹಚ್ಚಲಿದ್ದಾರೆ. ಉಳಿದಂತೆ, ಜೆಸ್ಸಿಕಾ ಹೆನ್‌ವಿಕ್, ವ್ಯಾಗ್ನರ್ ಮೌರಾ, ಜೂಲಿಯಾ ಬಟರ್ಸ್ ಕೂಡ ಈ ಚಿತ್ರದಲ್ಲಿ ನಟಿಸಲಿದ್ದಾರೆ.

'ಕೊಲವೆರಿ ಡಿ...' ರೀತಿಯೇ ಮತ್ತೆ ಮೋಡಿ ಮಾಡ್ತಾರಾ ಧನುಷ್‌? ಎ.ಆರ್‌. ರೆಹಮಾನ್‌ಗಾಗಿ ಮೈಕ್‌ ಹಿಡಿದ ಸ್ಟಾರ್‌ ನಟ!

ಸಖತ್ ಬ್ಯುಸಿ ಆಗಿರುವ ಧನುಷ್
ಈ ವರ್ಷದ ಆರಂಭದಲ್ಲಿ ಅವರ 'ಪಟ್ಟಾಸ್‌' ಸಿನಿಮಾ ತೆರೆಗೆ ಬಂತು. ಇದೀಗ ಅವರು ಬಾಲಿವುಡ್‌ನಲ್ಲಿ ಅಕ್ಷಯ್‌ ಕುಮಾರ್, ಸಾರಾ ಅಲಿ ಖಾನ್ ಜೊತೆ 'ಅತರಂಗಿ ರೇ' ಸಿನಿಮಾ ಮಾಡುತ್ತಿದ್ದಾರೆ. ಸದ್ಯ ಕಾರ್ತಿಕ್ ಸುಬ್ಬರಾಜ್‌ ಜೊತೆ ಮಾಡಿರುವ 'ಜಗಮೇ ತಂಧೀರಂ' ಸಿನಿಮಾ ರಿಲೀಸ್‌ಗೆ ರೆಡಿ ಇದ್ದರೆ, ಧನುಷ್ ನಟಿಸುತ್ತಿರುವ, ಮರಿ ಸೆಲ್ವರಾಜ್ ನಿರ್ದೇಶನದ 'ಕರ್ಣನ್' ಸಿನಿಮಾದ ಕೆಲಸಗಳು ಕೊನೇ ಹಂತದಲ್ಲಿ ಇವೆ.

ಕರ್ನಾಟಕದ ಬಗ್ಗೆ ತಿಳಿಸಿದ್ದಕ್ಕೆ ಪ್ರಕಾಶ್ ರೈಗೆ 'ಕಂಗ್ರಾಟ್ಸ್' ಹೇಳಿದ ನಟ ಧನುಷ್‌!