7.2 ಕೋಟಿ ರೂ.ಗಳಿಗೆ 'ಪೊಗರು' ಚಿತ್ರದ ಹಿಂದಿ ಡಬ್ಬಿಂಗ್ ಹಕ್ಕು ಮಾರಾಟ! ಇದು ಧ್ರುವ ಸರ್ಜಾ ಹವಾ!

'ಆ್ಯಕ್ಷನ್ ಪ್ರಿನ್ಸ್‌' ಧ್ರುವ ಸರ್ಜಾ ನಟನೆಯ 'ಪೊಗರು' ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಈ ಚಿತ್ರ ರಿಲೀಸ್‌ ಆದಮೇಲೆ ಎಷ್ಟು ಕಮಾಯಿ ಮಾಡಬಹುದು ಎಂಬ ಕುತೂಹಲ ಇಡೀ ಗಾಂಧಿನಗರಕ್ಕೆ ಇದೆ. ಜೊತೆಗೆ ಸಿನಿಪ್ರಿಯರು ಕೂಡ ಚಿತ್ರದ ಬಿಡುಗಡೆಯಾಗಿ ಕಾದಿದ್ದಾರೆ. ಅಚ್ಚರಿ ಎಂದರೆ ತೆರೆಕಾಣುವುದಕ್ಕೂ ಮುನ್ನವೇ ಈ ಸಿನಿಮಾ ಬಹುಕೋಟಿ ರೂಪಾಯಿ ಬ್ಯುಸಿನೆಸ್‌ ಮಾಡಿದೆ.

ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ 'ಪೊಗರು' ಕೂಡ ಒಂದು. ನಂದಕಿಶೋರ್‌ ನಿರ್ದೇಶನದ ಈ ಚಿತ್ರ ಕನ್ನಡ ಮಾತ್ರವಲ್ಲದೆ ಇತರೆ ಭಾಷೆಗಳಿಗೂ ಡಬ್‌ ಆಗಿ ಬಿಡುಗಡೆ ಆಗಲಿದೆ. ತೆಲುಗು ಮತ್ತು ಹಿಂದಿಗೆ ಡಬ್‌ ಆಗುವುದು ಅಧಿಕೃತ ಆಗಿದೆ. ಅಚ್ಚರಿ ಏನೆಂದರೆ, ಇದರ ಹಿಂದಿ ಡಬ್ಬಿಂಗ್‌ ವರ್ಷನ್‌ಗೆ ಭಾರಿ ಬೆಲೆ ಬಂದಿದೆ. ಒಂದಲ್ಲ, ಎರಡಲ್ಲ ಬರೋಬ್ಬರಿ 7.2 ಕೋಟಿ ರೂ.ಗಳಿಗೆ ಈ ಚಿತ್ರದ ಹಿಂದಿ ಡಬ್ಬಿಂಗ್‌ ಹಕ್ಕುಗಳು ಮಾರಾಟ ಆಗಿವೆ.

ಈ ಸುದ್ದಿ ಕೇಳಿ ಧ್ರುವ ಸರ್ಜಾ ಅಭಿಮಾನಿಗಳು ಸಖತ್‌ ಖುಷಿ ಆಗಿದ್ದಾರೆ. ಒಂದು ಸಿನಿಮಾ ಮಾಡಲು ಧ್ರುವ ಸಿಕ್ಕಾಪಟ್ಟೆ ಸಮಯ ತೆಗೆದುಕೊಳ್ಳುತ್ತಾರೆ ನಿಜ. ಆದರೆ ಅವರ ಸಿನಿಮಾಗಳು ದೊಡ್ಡ ಮಟ್ಟದಲ್ಲಿ ಸೌಂಡು ಮಾಡುತ್ತವೆ. ಅದಕ್ಕೆ 'ಪೊಗರು' ಚಿತ್ರವೇ ಲೇಟೆಸ್ಟ್‌ ಉದಾಹರಣೆ. ಈ ಸಿನಿಮಾದಲ್ಲಿ ಧ್ರುವ ಸರ್ಜಾಗೆ ಜೋಡಿಯಾಗಿ ರಶ್ಮಿಕಾ ಮಂದಣ್ಣ ನಟಿಸಿದ್ದಾರೆ. ಹಾಗಾಗಿ ಟಾಲಿವುಡ್‌ ವಲಯದಲ್ಲೂ ಚಿತ್ರದ ಮೇಲಿನ ನಿರೀಕ್ಷೆ ಜೋರಾಗಿದೆ.

also read: ಕ್ಯಾನ್ಸರ್‌ ರೋಗಿಗಳಿಗಾಗಿ ಬಳಕೆ ಆಗಲಿದೆ ಧ್ರುವ ಸರ್ಜಾ ಕೂದಲು! ಬದಲಾಯ್ತು 'ಆ್ಯಕ್ಷನ್ ಪ್ರಿನ್ಸ್' ಲುಕ್‌!

ಈ ವರ್ಷ ಕ್ರಿಸ್‌ಮಸ್‌ ಅಥವಾ ಮುಂದಿನ ವರ್ಷ ಸಂಕ್ರಾಂತಿ ವೇಳೆಗೆ 'ಪೊಗರು' ಬಿಡುಗಡೆ ಮಾಡಬೇಕು ಎಂದು ನಿರ್ಮಾಪಕರು ಆಲೋಚನೆ ಮಾಡುತ್ತಿದ್ದಾರೆ ಎಂಬ ಮಾತು ಕೇಳಿಬಂದಿದೆ. ಇನ್ನೇನು ಶೀಘ್ರದಲ್ಲೇ ರಿಲೀಸ್‌ ದಿನಾಂಕದ ಬಗ್ಗೆ ಅಧಿಕೃತ ಮಾಹಿತಿ ಹೊರಬೀಳಲಿದೆ. ಈ ಚಿತ್ರಕ್ಕೆ ಚಂದನ್‌ ಶೆಟ್ಟಿ ಸಂಗೀತ ನಿರ್ದೇಶನ ಮಾಡಿದ್ದು, 'ಖರಾಬು' ಹಾಡು ಈಗಾಗಲೇ ಯೂಟ್ಯೂಬ್‌ನಲ್ಲಿ ಧೂಳೆಬ್ಬಿಸಿದೆ. ಚಿತ್ರದ ಬಗ್ಗೆ ಹೈಪ್‌ ಸೃಷ್ಟಿಯಾಗುವಲ್ಲಿ ಈ ಹಾಡು ಕೂಡ ಕಾರಣ ಆಗಿದೆ.

also read: 'ಪೊಗರು' ಬಳಿಕ ಧ್ರುವ ಸರ್ಜಾ ನಟಿಸಲಿರುವ ಹೊಸ ಸಿನಿಮಾ ಬಗ್ಗೆ ಇಂಟರೆಸ್ಟಿಂಗ್‌ ಮಾಹಿತಿ ಬಹಿರಂಗ!