ಶಿವರಾಜ್‌ಕುಮಾರ್ ನಟನೆಯ 'ಭಜರಂಗಿ 2' ಸಿನಿಮಾದ ಶೂಟಿಂಗ್ ಆಗಸ್ಟ್ 10ರಿಂದ ಎಂದ ನಿರ್ದೇಶಕ ಹ‍ರ್ಷ!

ಕೊರೊನಾ ವೈರಸ್‌ನಿಂದಾಗಿ ಸಿನಿಮಾ ಕೆಲಸಗಳೆಲ್ಲವೂ ನಿಂತಿವೆ. ಆದರೆ ಇನ್ಮುಂದೆ ಲಾಕ್‌ಡೌನ್ ಇರೋದಿಲ್ಲ ಎಂದು ರಾಜ್ಯ ಸರ್ಕಾರ ಹೇಳಿದೆ. ಹೀಗಾಗಿ ಎಲ್ಲವೂ ಮೊದಲಿನಂತೆ ಆಗುತ್ತಿದೆ, ಜನಜೀವನ ನಿಧಾನವಾಗಿ ಸಹಜ ಸ್ಥಿತಿಗೆ ಬರುತ್ತಿದೆ. ನಟ ಶಿವರಾಜ್‌ಕುಮಾರ್ ಮನೆಯಲ್ಲಿ ಕೆಲ ದಿನಗಳಿಂದ ಪದೇ ಪದೇ ಚಿತ್ರರಂಗದ ವಿಚಾರವಾಗಿ ಸಭೆ ನಡೆಯತ್ತಿದೆ. ನಟ ಶಿವರಾಜ್‌ಕುಮಾರ್ ಅವರು ಈ ತಿಂಗಳಿನಿಂದಲೇ ಶೂಟಿಂಗ್‌ನಲ್ಲಿ ಪಾಲ್ಗೊಳ್ಳಲಿದ್ದಾರಂತೆ.

12 ದಿನದ ಶೂಟಿಂಗ್ ಬಾಕಿಯಿದೆ!
'ಬೆಂಗಳೂರು ಟೈಮ್ಸ್‌'ಗೆ ನೀಡಿದ ಸಂದರ್ಶನದಲ್ಲಿ ನಟ ಶಿವರಾಜ್‌ಕುಮಾರ್ ಅವರು ಅಗಸ್ಟ್‌ನಿಂದ ಇವರ ಸಿನಿಮಾಗಳ ಪೋಸ್ಟ್ ಪ್ರೊಡಕ್ಷನ್ ಕೆಲಸ ನಡೆಯುವ ಬಗ್ಗೆ ಅಧಿಕೃತವಾಗಿ ಮಾತನಾಡಿದ್ದರು. ಭಜರಂಗಿ 2 ಸಿನಿಮಾದ 12 ದಿನಗಳ ಶೂಟಿಂಗ್ ನಡೆಯಬೇಕಿದೆ. ಶಿವರಾಜ್‌ಕುಮಾರ್ ಅವರ ಜೊತೆಗೆ 6 ದಿನದ ಚಿತ್ರೀಕರಣ ಕೂಡ ಬಾಕಿಯಿದೆ.

ಶಿವಣ್ಣ ಓಕೆ ಎಂದಾಯ್ತು!
ನಿರ್ದೇಶಕ ಹರ್ಷ ಮಾತನಾಡಿ, 'ಶೂಟಿಂಗ್ ಈಗ ಶುರು ಮಾಡುವುದೋ ಅಥವಾ ಮುಂದಿನ ದಿನಗಳಲ್ಲಿ ಮಾಡೋಣ ಅಂತ ಶಿವಣ್ಣ ಅವರನ್ನು ಕೇಳಿದೆ. ಆಗ ಶಿವಣ್ಣ ಅವರು ಶೂಟಿಂಗ್ ಶುರು ಮಾಡಬೇಕು, ಇದು ನನ್ನ ಕರ್ತವ್ಯ. ಸುಮ್ಮನೆ ಹೀಗೆ ಕುಳಿತು ಚಿತ್ರರಂಗದವರಿಗೆ ತೊಂದರೆ ನೀಡಬಾರದು. ನನ್ನಿಂದಲೇ ಶುರುವಾಗಬೇಕು ಅಂತ ತಿಳಿಸಿದರು' ಅಂತ ಹೇಳಿದ್ದಾರೆ. ಬೆಂಗಳೂರಿನಲ್ಲಿ ಸ್ಟುಡಿಯೋ ಒಳಗಡೆ ಶೂಟಿಂಗ್ ಮಾಡಲಾಗುವುದಂತೆ. ಈಗಾಗಲೇ ಶೂಟಿಂಗ್‌ಗೋಸ್ಕರ ಮಾಡಿರುವ ಸೆಟ್ ಕೂಡ ಇದೆಯಂತೆ. 'ಅಗಸ್ಟ್ 10ರ ನಂತರ ಶೂಟಿಂಗ್ ಆರಂಭಿಸುತ್ತೇವೆ. ಶಿವಣ್ಣನ ಜೊತೆಯಿರುವ ಸೀನ್ ಎಲ್ಲವನ್ನು ಮೊದಲು ಶೂಟ್ ಮಾಡಬೇಕು ಎಂದುಕೊಂಡಿದ್ದೇನೆ. ಈ ತಿಂಗಳು ಮುಗಿಯುವುದರೊಳಗೆ ಶೂಟಿಂಗ್ ಮಾಡಿ ಮುಗಿಸುವ ಪ್ಲ್ಯಾನ್ ಇದೆ. ಆಮೇಲೆ ಪೋಸ್ಟ್ ಪ್ರೊಡಕ್ಷನ್ ಕೆಲಸ ಮಾಡುತ್ತೇವೆ' ಎಂದು ಹರ್ಷ ಹೇಳಿದ್ದಾರೆ.

Also Read-ಕನ್ನಡದ ಕಡೆಗೆ ಪರಭಾಷೆಯವರು ಮತ್ತೆ ತಿರುಗಿ ನೋಡುವಂತೆ ಮಾಡಿದ ಶಿವಣ್ಣನ 'ಭಜರಂಗಿ 2'!

ಮೂರನೇ ಬಾರಿಗೆ ಹರ್ಷ ಮತ್ತು ಶಿವರಾಜ್‌ಕುಮಾರ್ 'ಭಜರಂಗಿ 2' ಸಿನಿಮಾ ಮೂಲಕ ಒಂದಾಗುತ್ತಿದ್ದಾರೆ. ಈ ಸಿನಿಮಾದಲ್ಲಿ ನಟಿ ಭಾವನಾ, ಸೌರವ್ ಲೋಕೇಶದ, ಶ್ರುತಿ ಕೂಡ ನಟಿಸುತ್ತಿದ್ದಾರೆ. ಇದೊಂದು ಪೀರಿಯಡ್ ಥ್ರಿಲ್ಲರ್ ಡ್ರಾಮಾ. ಇತ್ತೀಚೆಗೆ ನಡೆದ ಶಿವರಾಜ್‌ಕುಮಾರ್ ಬರ್ತಡೇಯಂದು ಈ ಸಿನಿಮಾದ ಕುತೂಹಲಕಾರಿ ಟ್ರೇಲರ್ ರಿಲೀಸ್ ಮಾಡಲಾಗಿತ್ತು.