ಕೈ ಕೊಟ್ಟನಾ ಡಿಸ್ಕೋ ರಾಜಾ?
ರವಿ ತೇಜ ಮುಖ್ಯ ಭೂಮಿಕೆ ನಿಭಾಯಿಸಿದ್ದ 'ಡಿಸ್ಕೋ ರಾಜಾ' ಸಿನಿಮಾ ಬಗ್ಗೆ ಟಾಲಿವುಡ್‌ನಲ್ಲಿ ದೊಡ್ಡ ಮಟ್ಟದ ನಿರೀಕ್ಷೆ ಇಟ್ಟುಕೊಳ್ಳಲಾಗಿತ್ತು. ಅದರಲ್ಲಿ ನಭಾ ನಟೇಶ್‌ ಮುಖ್ಯ ಭೂಮಿಕೆ ನಿಭಾಯಿಸಿದ್ದರು. ಡಿಫರೆಂಟ್‌ ಗೆಟಪ್‌ನಲ್ಲಿ ರವಿ ತೇಜ ಕಾಣಿಸಿಕೊಂಡರು. ಹಾಗಿದ್ದರೂ ನಿರೀಕ್ಷಿತ ಮಟ್ಟದಲ್ಲಿ ಗಳಿಕೆ ಮಾಡಲು ಈ ಸಿನಿಮಾ ಸೋತಿದೆ. ಬಿಡುಗಡೆಯಾಗಿ ಮೊದಲ ವೀಕೆಂಡ್‌ ಕಳೆದಿದ್ದರೂ ಸಹ ನಿರ್ಮಾಪಕರ ಬೊಕ್ಕಸಕ್ಕೆ ಬಂದು ಬಿದ್ದಿರುವುದು ಚಿಲ್ಲರೆ ಹಣ ಮಾತ್ರ ಎಂಬುದು ಬಾಕ್ಸ್‌ ಆಫೀಸ್‌ ಮೂಲಗಳ ಮಾಹಿತಿ. ಹಾಗಾಗಿ ಈ ಚಿತ್ರದ ಬಗ್ಗೆ ನಿರೀಕ್ಷೆ ಇಟ್ಟುಕೊಂಡಿದ್ದ ತಂಡಕ್ಕೆ ನಿರಾಸೆ ಆಗಿದೆ. ನಭಾ ನಟೇಶ್‌ ಕರಿಯರ್‌ಗೆ ಕೊಂಚ ಹಿನ್ನಡೆ ಆದಂತಾಗಿದೆ.
ಸಂಭಾವನೆ ಹೆಚ್ಚಿಸಿಕೊಳ್ಳುವ ಆಸೆಗೆ ಬ್ರೇಕ್‌!
ಇತ್ತೀಚೆಗೆ ನಭಾ ನಟೇಶ್‌ ಬಗ್ಗೆ ಒಂದು ಸುದ್ದಿ ಹಬ್ಬಿತ್ತು. ಈ ಹಿಂದೆ ಅವರು ನಟಿಸಿದ್ದ 'ಇಸ್ಮಾರ್ಟ್‌ ಶಂಕರ್‌' ಚಿತ್ರ ಬ್ಲಾಕ್‌ ಬಸ್ಟರ್‌ ಹಿಟ್‌ ಆಗಿದ್ದರಿಂದ ಸಂಭಾವನೆ ಹೆಚ್ಚಿಸಿಕೊಳ್ಳುವ ಬಗ್ಗೆ ನಭಾ ಚಿಂತಿಸುತ್ತಿದ್ದಾರೆ ಎನ್ನಲಾಗಿತ್ತು. ಮೂಲಗಳ ಪ್ರಕಾರ, ಹತ್ತಿರ ಹತ್ತಿರ 80 ಲಕ್ಷ ರೂ. ಬೇಡಿಕೆ ಇಡಲು ಅವರು ಸಜ್ಜಾಗಿದ್ದರಂತೆ. ಟಾಲಿವುಡ್‌ನಲ್ಲಿ ಸ್ಟಾರ್‌ ಸಿನಿಮಾಗಳ ಅವಕಾಶಗಳು ಹರಿದುಬರುತ್ತಿರುವ ಬೆನ್ನಲ್ಲೇ ಅವರು ಈ ಪರಿ ಸಂಭಾವನೆ ಕೇಳುತ್ತಿದ್ದಾರೆ ಎಂಬ ಮಾತು ಕೇಳಿಬಂತು. ಅಲ್ಲದೆ, 'ಡಿಸ್ಕೋ ರಾಜಾ' ಸೂಪರ್‌ ಹಿಟ್‌ ಆಗುತ್ತದೆ ಎಂಬ ಭರವಸೆ ಮೇರೆಗೆ ಅವರ ಸಂಭಾವನೆ ಹೆಚ್ಚಿಸಿಕೊಳ್ಳಲು ನಿರ್ಧರಿಸಿದ್ದರು ಎನ್ನಲಾಗಿದೆ. ಆದರೆ 'ಡಿಸ್ಕೋ ರಾಜಾ' ಸೋತಿರುವುದರಿಂದ ಅಂಥ ಆಸೆಗೆ ಬ್ರೇಕ್‌ ಬಿದ್ದಂತಾಗಿದೆ.
ಹೆಚ್ಚು ಖ್ಯಾತಿ ತಂದುಕೊಟ್ಟ 'ಇಸ್ಮಾರ್ಟ್‌ ಶಂಕರ್‌'
ನಭಾ ವೃತ್ತಿ ಜೀವನದ ಅತಿ ದೊಡ್ಡ ಹಿಟ್‌ ಆಗಿ 'ಇಸ್ಮಾರ್ಟ್‌ ಶಂಕರ್‌' ಮೂಡಿಬಂದಿತ್ತು. ಪುರಿ ಜಗನ್ನಾಥ್‌ ನಿರ್ದೇಶನದ ಆ ಸಿನಿಮಾದಲ್ಲಿ ರಾಮ್‌ ಪೋತಿನೇನಿ ಜೊತೆ ನಭಾ ತೆರೆ ಹಂಚಿಕೊಂಡಿದ್ದರು. ಕೊಂಚ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡಿದ್ದ ಅವರನ್ನು ಕಂಡು ತೆಲುಗು ಪ್ರೇಕ್ಷಕರು ಫಿದಾ ಆದರು. ಬಾಕ್ಸ್‌ ಆಫೀಸ್‌ನಲ್ಲಿ '..ಶಂಕರ್‌' ಧೂಳೆಬ್ಬಿಸಿದ ಪರಿಗೆ ಎಲ್ಲರೂ ಬೆರಗಾದರು. ಆದರೆ ಅಷ್ಟು ದೊಡ್ಡ ಗೆಲುವಿನ ಬಳಿಕ, 'ಡಿಸ್ಕೋ ರಾಜಾ' ಚಿತ್ರದಲ್ಲಿ ನಭಾಗೆ ಸೋಲು ಉಂಟಾಗಿದೆ. ಸದ್ಯ, ಸಾಯಿ ಧರಮ್‌ ತೇಜ್‌ ಮತ್ತು ಬೆಲ್ಲಂಕೊಂಡ ಶ್ರೀನಿವಾಸ್‌ ಜತೆಗಿನ ಸಿನಿಮಾಗಳು ನಭಾ ಕೈಯಲ್ಲಿವೆ.
ಚಂದನವನದ ಕಡೆಗೆ ಸುಳಿಯದ ಕನ್ನಡತಿ!
ಶಿವರಾಜ್‌ಕುಮಾರ್‌ ನಾಯಕತ್ವದ 'ವಜ್ರಕಾಯ' ಸಿನಿಮಾ ಮೂಲಕ ನಭಾ ನಟೇಶ್‌ ಬಣ್ಣದ ಲೋಕಕ್ಕೆ ಕಾಲಿಟ್ಟರು. ಆ ಬಳಿಕ ಈವರೆಗೂ ಅವರು ಸ್ಯಾಂಡಲ್‌ವುಡ್‌ ಕಡೆಗೆ ಸುಳಿಯಲಿಲ್ಲ. ಮನೋರಂಜನ್‌ ರವಿಚಂದ್ರನ್‌ ನಟನೆಯ 'ಸಾಹೇಬ' ಚಿತ್ರದ ಒಂದು ಹಾಡಿನಲ್ಲಿ ಕಾಣಿಸಿಕೊಂಡಿದ್ದು ಬಿಟ್ಟರೆ, ಬೇರಾವುದೇ ಕನ್ನಡ ಸಿನಿಮಾವನ್ನೂ ನಭಾ ಒಪ್ಪಿಕೊಳ್ಳಲಿಲ್ಲ. ಸದ್ಯ ಅವರ ಗಮನವೆಲ್ಲ ಟಾಲಿವುಡ್‌ನಲ್ಲಿದೆ. ದುಬಾರಿ ಸಂಭಾವನೆ ಕೇಳುತ್ತಾರೆ ಎಂಬ ಕಾರಣಕ್ಕಾಗಿಯೂ ಕನ್ನಡದ ನಿರ್ಮಾಪಕರು ಅವರತ್ತ ಸುಳಿಯುತ್ತಿಲ್ಲ ಎಂಬ ಮಾತು ಚಾಲ್ತಿಯಲ್ಲಿದೆ.