ಡ್ರಗ್ಸ್‌ ದಂಧೆ: ಸಂಜನಾ ಗಲ್ರಾನಿ ಮನೆಯಲ್ಲಿ ಅಧಿಕಾರಿಗಳಿಗೆ ಸಿಕ್ಕ ವಸ್ತುಗಳು ಯಾವ ಸಾಕ್ಷಿ ನೀಡಲಿವೆ?

ಡ್ರಗ್ಸ್‌ ಪ್ರಕರಣದಲ್ಲಿ ನಟಿ ಸಂಜನಾ ಗಲ್ರಾನಿ ಅವರ ಮೇಲೆ ಕೆಲವು ದಿನಗಳ ಹಿಂದೆಯೇ ಅನುಮಾನ ಮೂಡಿತ್ತು. ಅವರ ಆಪ್ತ ರಾಹುಲ್‌ ಎಂಬಾತನನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡ ನಂತರವೇ ಸಂಜನಾ ಹೆಸರು ಕೇಳಿಬರಲು ಆರಂಭ ಆಯಿತು. ತಮ್ಮ ಮೇಲೆ ಯಾವುದೇ ಸಂದರ್ಭದಲ್ಲೂ ಪೊಲೀಸರು ಕ್ರಮ ಕೈಗೊಳ್ಳಬಹುದು ಎಂಬ ಸಂಶಯ ಸ್ವತಃ ಸಂಜನಾ ಅವರಿಗೂ ಇದ್ದೇ ಇರುತ್ತದೆ. ತಮ್ಮ ಮನೆಯಲ್ಲಿ ಇದ್ದ ಕೆಲವು ಪ್ರಮುಖ ಸಾಕ್ಷಿಗಳನ್ನು ಅವರು ಕಳೆದ ನಾಲ್ಕೈದು ದಿನಗಳಲ್ಲಿ ನಾಶಪಡಿಸಿಲ್ಲವೇ? ಅಷ್ಟರ ನಂತರವೂ ಸಿಸಿಬಿ ಪೊಲೀಸರಿಗೆ ಕೆಲವು ವಸ್ತುಗಳು ಸಿಕ್ಕಿವೆ ಎಂಬುದು ಅಚ್ಚರಿ.

ಸಾಕ್ಷಿ ಆಗಬಲ್ಲ ವಸ್ತುಗಳು!
ಮಂಗಳವಾರ ನಡೆದ ದಾಳಿಯಲ್ಲಿ ಏನೇನು ಸಿಕ್ಕಿವೆ ಎಂಬುದರ ಬಗ್ಗೆ ಜಂಟಿ ಪೊಲೀಸ್‌ ಆಯುಕ್ತ ಸಂದೀಪ್‌ ಪಾಟೀಲ್‌ ಅವರು ಹೇಳಿಕೆ ನೀಡಿದ್ದಾರೆ. ಸಂಜನಾ ಮನೆಯಲ್ಲಿ ವಶ ಪಡಿಸಿಕೊಂಡ ವಸ್ತುಗಳ ಬಗ್ಗೆ ಅವರು ಸ್ಪಷ್ಟ ಮಾಹಿತಿ ಬಿಟ್ಟುಕೊಟ್ಟಿಲ್ಲ. ಆದರೆ ಪ್ರಕರಣಕ್ಕೆ ಸಾಕ್ಷಿ ಆಗಬಲ್ಲಂತಹ ಕೆಲವು ವಸ್ತುಗಳನ್ನು ಪೊಲೀಸರು ಸಂಗ್ರಹಿಸಿದ್ದಾರೆ ಎಂಬ ಮಾಹಿತಿ ಕೇಳಿಬಂದಿದೆ.

ಸಂಜನಾ ಮೊಬೈಲ್‌ನಲ್ಲಿ ಏನೇನಿದೆ?
ಮೊಟ್ಟ ಮೊದಲನೆಯದಾಗಿ ನಟಿ ಸಂಜನಾ ಗಲ್ರಾನಿ ಅವರ ಮೊಬೈಲ್‌ ಫೋನ್‌ ಅನ್ನು ಪೊಲೀಸರು ತಮ್ಮ ಸುಪರ್ದಿಗೆ ಪಡೆದುಕೊಂಡಿದ್ದಾರೆ. ಡಿಜಿಟಲ್‌ ಯುಗದಲ್ಲಿ ನಡೆಯುವ ಎಲ್ಲ ಅಪರಾಧ ಪ್ರಕರಣಗಳಲ್ಲಿ ಮೊಬೈಲ್‌ ಅತಿ ಮುಖ್ಯ ಸಾಕ್ಷಿ ಆಗುತ್ತಿದೆ. ಮಾದಕ ವಸ್ತು ಜಾಲದ ನಂಟು ಇವರು ಯಾವೆಲ್ಲ ವ್ಯಕ್ತಿಗಳಿಗೆ ಸಂಜನಾ ಕರೆ ಮಾಡಿದ್ದರು? ಅವರ ಮೊಬೈಲ್‌ನಲ್ಲಿ ಇರುವ ಫೋಟೋ ಮತ್ತು ವಿಡಿಯೋಗಳಿಂದ ಏನಾದರೂ ಸುಳಿವು ಸಿಗಲಿದೆಯೇ ಎಂಬ ಆಯಾಮದಲ್ಲಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

also read:ಸ್ಯಾಂಡಲ್‌ವುಡ್ ಡ್ರಗ್ಸ್‌ ಮಾಫಿಯಾ: ನಟಿ ಸಂಜನಾ ಗಲ್ರಾನಿ ಮನೆ ಮೇಲೆ ಸಿಸಿಬಿ ದಾಳಿ!

ನಕಲಿ ಪೊಲೀಸ್‌ ಸಮವಸ್ತ್ರದ ಸತ್ಯ ಏನು?
ಡ್ರಗ್ಸ್‌ ಮಾಫಿಯಾ ಕೇಸ್‌ನಲ್ಲಿ ಸಿಕ್ಕಿ ಹಾಕಿಕೊಂಡಿರುವ ಮತ್ತೋರ್ವ ಆರೋಪಿ ವಿರೇನ್‌ ಖನ್ನಾ. ಆತನ ಮನೆ ಮೇಲೂ ಸಿಸಿಬಿ ಪೊಲೀಸರು ದಾಳಿ ಮಾಡಿದ್ದಾರೆ. ತುಂಬ ಅಚ್ಚರಿ ಮೂಡಿಸಿರುವ ಸಂಗತಿ ಏನೆಂದರೆ, ವಿರೇನ್‌ ಖನ್ನಾ ಮನೆಯಲ್ಲಿ ಕರ್ನಾಟಕ ರಾಜ್ಯ ಪೊಲೀಸ್‌ ಇಲಾಖೆಯ ಸಮವಸ್ತ್ರ ಸಿಕ್ಕಿದೆ. ಇದರ ಬಗ್ಗೆ ಜಂಟಿ ಪೊಲೀಸ್‌ ಆಯುಕ್ತ ಸಂದೀಪ್‌ ಪಾಟೀಲ್‌ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ. ಆ ಪೊಲೀಸ್‌ ಯೂನಿಫಾರ್ಮ್‌ ಹಿಂದಿನ ರಹಸ್ಯ ಏನು ಎಂಬ ಬಗ್ಗೆ ತನಿಖೆ ಜಾರಿಯಲ್ಲಿದೆ.

also read: ಸಂಜನಾ ಗಲ್ರಾನಿ ಬಳಿ 3 ಕಾರು, ದೊಡ್ಡ ಮನೆ ಹೇಗೆ ಬಂತು? ಇಲ್ಲಿದೆ ಸ್ಪಷ್ಟ ಉತ್ತರ!