'ಸ್ಪೂಕಿ ಕಾಲೇಜ್' ಸೇರಿಕೊಂಡ ಗಟ್ಟಿಮೇಳ ಧಾರಾವಾಹಿ ನಟಿ ಶರಣ್ಯಾ ಶೆಟ್ಟಿ!

'ಗಟ್ಟಿಮೇಳ' ಧಾರಾವಾಹಿಯಲ್ಲಿ ಸಾಹಿತ್ಯ ಪಾತ್ರದ ಮೂಲಕ ಕಿರುತೆರೆ ಮಂದಿಗೆ ಪರಿಚಿತವಾದ ನಟಿ, ಮಾಡೆಲ್ ಶರಣ್ಯಾ ಶೆಟ್ಟಿ ಪ್ರಸ್ತುತ ಯಾವುದೇ ಧಾರಾವಾಹಿಯಲ್ಲಿ ನಟಿಸುತ್ತಿಲ್ಲ, 'ಗಟ್ಟಿಮೇಳ'ದಲ್ಲೂ ಸದ್ಯ ಅವರ ಪಾತ್ರ ಇಲ್ಲ. ಹಾಗಾದರೆ ಶರಣ್ಯಾ ಯಾವಾಗ ತೆರೆ ಮೇಲೆ ಕಾಣಿಸಿಕೊಳ್ಳುತ್ತಾರೆ ಎಂಬ ಕುತೂಹಲ ಕೆಲವರಿಗೆ ಇರಬಹುದು.

ಸ್ಪೂಕಿ ಕಾಲೇಜ್‌
'ರಂಗಿತರಂಗ', 'ಅವನೇ ಶ್ರೀಮನ್ನಾರಾಯಣ' ಸಿನಿಮಾದ ನಿರ್ಮಾಪಕ ಎಚ್‌ಕೆ ಪ್ರಕಾಶ್ ನಿರ್ಮಾಣದ 'ಸ್ಪೂಕಿ ಕಾಲೇಜ್‌' ಸಿನಿಮಾದಲ್ಲಿ ಶರಣ್ಯಾ ಶೆಟ್ಟಿ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಖುಷಿ ರವಿ, ವಿವೇಕ್ ಸಿಂಹ, ಪೃಥ್ವಿ ರಾಷ್ಟ್ರಕೂಟ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸುತ್ತಿದ್ದಾರೆ. ಪ್ರಸ್ತುತ ಉತ್ತರ ಕರ್ನಾಟಕದ ಕಡೆಯಲ್ಲಿ ಈ ಚಿತ್ರದ ಶೂಟಿಂಗ್ ನಡೆಯುತ್ತಿದೆ. ಧಾರವಾಡದಲ್ಲಿ 103 ವರ್ಷಗಳ ಇತಿಹಾಸವಿರುವ ಕಾಲೇಜಿನಲ್ಲಿ ಶೂಟಿಂಗ್ ನಡೆಯುತ್ತಿದೆ. ದ್ವಿತೀಯ ಹಂತದಲ್ಲಿ ದಾಂಡೇಲಿಯ ಅರಣ್ಯದಲ್ಲಿ ಶೂಟಿಂಗ್ ನಡೆಯುತ್ತಿದೆ. ಮನೋಹರ್ ಜೋಶಿ ಛಾಯಾಗ್ರಹಣ ಈ ಚಿತ್ರಕ್ಕಿದೆ. ಅಜನೀಶ್ ಲೋಕನಾಥ್ ಸಂಗೀತ ಈ ಚಿತ್ರಕ್ಕಿದೆ. ಇಲ್ಲಿ ಶರಣ್ಯಾ ಕಾಲೇಜು ಹುಡುಗಿ ಪಾತ್ರದಲ್ಲಿ ಗ್ಲಾಮರಸ್ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ.

31 ಡೇಸ್‌ ಸಿನಿಮಾದಲ್ಲಿ ಶರಣ್ಯಾ ನಾಯಕಿ!
'31 ಡೇಸ್' ಸಿನಿಮಾದಲ್ಲಿ ಶರಣ್ಯಾ ಶೆಟ್ಟಿ ನಟಿಸುತ್ತಿದ್ದಾರೆ. ಈ ಮೂಲಕ ಅವರು ಕನ್ನಡ ಚಿತ್ರರಂಗಕ್ಕೆ ನಾಯಕಿಯಾಗಿ ಪರಿಚಯ ಆಗುತ್ತಿದ್ದಾರೆ. ಕೃಷ್ಣ ಹೊಳ್ಳ ನಿರ್ದೇಶನವಿರುವ ಈ ಚಿತ್ರದಲ್ಲಿ 'ಜಾಲಿಡೇಸ್', 'ಕೇಸ್ ನಂಬರ್ 18/9' ನಿರಂಜನ್ ಶೆಟ್ಟಿ ನಾಯಕನಾಗಿ ನಟಿಸುತ್ತಿದ್ದಾರೆ. ವಿ ಮನೋಹರ್ ಈ ಸಿನಿಮಾಕ್ಕೆ ಸಂಗೀತ ನಿರ್ದೇಶನ ಮಾಡುತ್ತಿದ್ದಾರೆ. ಇದು ಲವ್ ಸ್ಟೋರಿಯಂತೆ. ಶರಣ್ಯಾರಿಗೆ ಎಲ್ಲ ರೀತಿಯ ಕಾಸ್ಟ್ಯೂಮ್ ಕೂಡ ಹಾಕಿಸಿದ್ದಾರೆ. ಇಲ್ಲಿ ಶರಣ್ಯಾರದ್ದು ಮುಗ್ಧೆ ಪಾತ್ರವೋ ಅಥವಾ ಜೋರೋ ಎನ್ನೋದು ಸಿನಿಮಾ ಕೊನೆಯಲ್ಲಿ ಗೊತ್ತಾಗುತ್ತದಂತೆ.

1980 ಸಿನಿಮಾದಲ್ಲಿ ಶರಣ್ಯಾ ನಟನೆ
ರಾಜ್‌ ಕಿರಣ್‌ ಜೆ ನಿರ್ದೇಶನದ ಮೊದಲ ಚಿತ್ರ '1980'ದಲ್ಲಿ ನಟಿ ಪ್ರಿಯಾಂಕಾ ಉಪೇಂದ್ರ ನಟಿಸುತ್ತಿದ್ದಾರೆ. ಇದು ಪಿರಿಯಾಡಿಕಲ್‌ ಕಥೆ ಹೊಂದಿದ್ದು, ಪ್ರಿಯಾಂಕಾ ಇದರಲ್ಲಿ ರೆಟ್ರೋ ಲುಕ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಸಸ್ಪೆನ್ಸ್‌ ಥ್ರಿಲ್ಲರ್‌ ಚಿತ್ರವಿದು. ಶರಣ್ಯಾ ಶೆಟ್ಟಿ ಕೂಡ ಈ ಸಿನಿಮಾದಲ್ಲಿ ಮುಖ್ಯ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದರಲ್ಲಿ ಶರಣ್ಯಾರದ್ದು 18 ವರ್ಷದ ಹುಡುಗಿಯ ಪಾತ್ರ. ಅವಳು ತುಂಬ ಬಾಲಿಶವಾಗಿರುತ್ತಾಳೆ. ಇನ್ನು ಶರಣ್ಯಾ ಅವರ ಇಂಜಿನಿಯರಿಂಗ್ ಕೊನೆಯ ವರ್ಷದ ಪರೀಕ್ಷೆ ಕೂಡ ಇದ್ದು ಸಿನಿಮಾ ಕೆಲಸಗಳನ್ನು ಬ್ಯಾಲೆನ್ಸ್ ಮಾಡಿಕೊಳ್ಳಬೇಕಿದೆ. ಸಾಧ್ಯ ಆದರೆ ಮುಂದಿನ ದಿನಗಳಲ್ಲಿ ಮತ್ತೆ ಕಿರುತೆರೆಗೆ ಮರಳುವ ಯೋಚನೆಯಲ್ಲಿ ಶರಣ್ಯಾ ಇದ್ದಾರೆ.

Also Read-ನನ್ನ ಜೀವನದಲ್ಲಿ ಯಾವತ್ತೂ ಈ ರೀತಿ ಟ್ರೀಟ್ ಮಾಡಿಸಿಕೊಂಡಿರಲಿಲ್ಲ: 'ಗಟ್ಟಿಮೇಳ' ನಟಿ ಶರಣ್ಯಾ ಶೆಟ್ಟಿ