ಶಿಲ್ಪಾ ಶೆಟ್ಟಿ, ರಾಜ್‌ ಕುಂದ್ರಾ ವಿರುದ್ಧ ಚಿನ್ನದ ವಂಚನೆ ದೂರು

ಮುಂಬಯಿ: ಬಾಲಿವುಡ್‌ ನಟಿ ಶಿಲ್ಪಾ ಶೆಟ್ಟಿ ಹಾಗೂ ಅವರ ಪತಿ ರಾಜ್‌ ಕುಂದ್ರಾ ವಿರುದ್ಧ ವಂಚನೆ ದೂರು ದಾಖಲಾಗಿದೆ. ಅನಿವಾಸಿ ಭಾರತೀಯ ಸಚಿನ್‌ ಜೋಶಿ ಅವರು ಮುಂಬಯಿ ಖಾರ್‌ ಠಾಣೆಗೆ ದಂಪತಿ ವಿರುದ್ಧ ದೂರು ನೀಡಿದ್ದಾರೆ.

ಶಿಲ್ಪಾ ಮತ್ತು ರಾಜ್‌ ಸತ್ಯಯುಗ ಗೋಲ್ಡ್‌ ಪ್ರೈ. ಲಿಮಿಟೆಡ್‌ ಎಂಬ ಚಿನ್ನದ ವಹಿವಾಟು ನಡೆಸುವ ಕಂಪನಿಯ ನಿರ್ದೇಶಕರಾಗಿದ್ದರು. ಸಚಿನ್‌ ಈ ಕಂಪನಿಯಿಂದ 2014ರ ಮಾರ್ಚ್‌ನಲ್ಲಿ 18.58 ಲಕ್ಷ ರೂ. ಮೌಲ್ಯದ ಒಂದು ಕೆ.ಜಿ ಚಿನ್ನ ಖರೀದಿಸಿದ್ದರು. ಆಗ ಖರೀದಿದಾರರಿಗೆ ಗೋಲ್ಡ್‌ ಕಾರ್ಡ್‌ ಹೆಸರಿನ ಕಾರ್ಡ್‌ ನೀಡಿ, ಐದು ವರ್ಷಗಳಲ್ಲಿ ನಿರ್ದಿಷ್ಟ ಮೌಲ್ಯದ ಚಿನ್ನವನ್ನು ಬೋನಸ್‌ ರೀತಿಯಲ್ಲಿ ಮತ್ತು ಈ ಅವಧಿಯಲ್ಲಿ ಕಂಪನಿಯಿಂದ ಚಿನ್ನ ಖರೀದಿಸಿದರೆ ರಿಯಾಯಿತಿ ನೀಡುವುದಾಗಿ ಭರವಸೆ ಕೊಡಲಾಗಿತ್ತು.

ಅದರಂತೆ ಐದು ವರ್ಷದ ಒಳಗೆ ಬೋನಸ್‌ ಚಿನ್ನ ಪಡೆಯಲು ಪ್ರಯತ್ನಿಸಿದಾಗ ಕಂಪನಿ ಮುಚ್ಚಿರುವುದು ಬೆಳಕಿಗೆ ಬಂತು. ಮತ್ತಷ್ಟು ವಿಚಾರಿಸಿದಾಗ ಶಿಲ್ಪಾ 2016ರಲ್ಲಿ, ಕುಂದ್ರಾ 2017ರಲ್ಲಿ ನಿರ್ದೇಶಕ ಮಂಡಳಿಗೆ ರಾಜೀನಾಮೆ ನೀಡಿರುವ ವಿಷಯ ತಿಳಿಯಿತು. ಶಿಲ್ಪಾ ಮತ್ತು ರಾಜ್‌ ಸುಳ್ಳು ಭರವಸೆ ನೀಡಿ ತಮ್ಮನ್ನು ವಂಚಿಸಿದ್ದಾರೆ ಎಂದು ಭಾವಿಸಿದ ಸಚಿನ್‌ ಪೊಲೀಸರಿಗೆ ದೂರು ನೀಡಿದ್ದಾರೆ. ದೂರು ದಾಖಲಿಸಿಕೊಂಡಿರುವ ಪೊಲೀಸರು ಎಫ್‌ಐಆರ್‌ ದಾಖಲಿಸಿಲ್ಲ.