ಬಹುಭಾಷೆಯಲ್ಲಿ ನಿರ್ಮಾಣವಾಗಿದೆ ಕನ್ನಡಿಗರ ಈ ವೆಬ್‌ ಸಿರೀಸ್‌! ಶೀಘ್ರದಲ್ಲೇ ಓಟಿಟಿಯಲ್ಲಿ ರಿಲೀಸ್‌

ಪ್ರಸ್ತುತ ಚಿತ್ರಮಂದಿರಗಳಲ್ಲಿ ಸಿನಿಮಾ ಪ್ರದರ್ಶನ ಇಲ್ಲದೇ ಇರುವುದರಿಂದ ಕೆಲ ಸಿನಿಮಾಗಳನ್ನು ಅನಿವಾರ್ಯವಾಗಿ ಓಟಿಟಿ ಪ್ಲಾಟ್‌ಫಾರ್ಮ್‌ನಲ್ಲಿ ರಿಲೀಸ್ ಮಾಡಬೇಕಾಗಿದೆ. ದಕ್ಷಿಣ ಭಾರತದಲ್ಲಿ ಸಣ್ಣ ಬಜೆಟ್‌ನ ಸಿನಿಮಾಗಳು ಓಟಿಟಿಯಲ್ಲಿ ರಿಲೀಸ್ ಆಗುತ್ತಿದ್ದರೆ, ಬಾಲಿವುಡ್‌ನಲ್ಲಿ ದೊಡ್ಡ ದೊಡ್ಡ ಬಜೆಟ್‌ನ ಸಿನಿಮಾಗಳೇ ಆನ್‌ಲೈನ್‌ ರಿಲೀಸ್ ಆಗೋಕೆ ಕಾಯುತ್ತಿವೆ. ಬರೀ ಸಿನಿಮಾ ಮಾತ್ರವಲ್ಲದೆ, ವೆಬ್ ಸಿರೀಸ್‌ಗೂ ಓಟಿಟಿಯಲ್ಲಿ ದೊಡ್ಡ ಬೇಡಿಕೆ ಇದೆ. ಇದುವರೆಗೂ ಹಿಂದಿಯಲ್ಲಿ ಮಾತ್ರ ಉತ್ತಮ ಗುಣಮಟ್ಟದ ವೆಬ್ ಸಿರೀಸ್‌ ಬಂದಿವೆ. ಕನ್ನಡದಲ್ಲಿ ಆ ಪ್ರಮಾಣ ತೀರಾ ಕಮ್ಮಿ. ಸದ್ಯಕ್ಕೆ ಸ್ಯಾಂಡಲ್‌ವುಡ್‌ನಲ್ಲೂ ಅಂಥದ್ದೊಂದು ಪ್ರಯತ್ನ ಆಗುತ್ತಿದೆ. ಏಕಕಾಲಕ್ಕೆ ಕನ್ನಡ ಮತ್ತು ಹಿಂದಿಯಲ್ಲಿ ವೆಬ್‌ ಸಿರೀಸ್‌ವೊಂದು ನಿರ್ಮಾಣವಾಗಿದೆ.

ನಿರ್ದೇಶಕ ದೇವರಾಜ್ ಪೂಜಾರಿ ಅಂಥದ್ದೊಂದು ಪ್ರಯತ್ನಕ್ಕೆ ಮುಂದಾಗಿದ್ದು, ಕನ್ನಡ ಮತ್ತು ಹಿಂದಿಯಲ್ಲಿ 'ಕಾರ್ಗಲ್ ನೈಟ್ಸ್' ಎಂಬ ವೆಬ್ ಸೀರಿಸ್ ಸಿದ್ಧಪಡಿಸಿದ್ದಾರೆ. ಲಾಕ್‌ಡೌನ್‌ಗೂ ಮುನ್ನವೇ ಶೂಟಿಂಗ್ ಮುಗಿಸಿದ್ದ ತಂಡ, ಇತ್ತೀಚೆಗೆ ಪೋಸ್ಟ್ ಪ್ರೊಡಕ್ಷನ್ ಕಾರ್ಯಗಳನ್ನೂ ಮುಗಿಸಿಕೊಂಡಿದೆ. ಹರ್ಷಿಲ್ ಕೌಶಿಕ್, ಅಕ್ಷತಾ ಅಶೋಕ್ ಪ್ರಮುಖ ಪಾತ್ರ ನಿರ್ವಹಿಸಿದ್ದು, ಸಂದೀಪ್ ನಾಗರಾಜ್, ನಾಗರಾಜ್ ಬೈಂದೂರ್, ಅರ್ಚನಾ ಮೊಸಳೆ, ಸುಚನ್ ಶೆಟ್ಟಿ ಹಾಗೂ ಚಂದ್ರಕಾಂತ್ ಮೊದಲಾದವರು ಉಳಿದ ಪಾತ್ರವರ್ಗದಲ್ಲಿದ್ದಾರೆ.

ಎನ್. ಮಂಜುನಾಥ್ ಮತ್ತು ಜೆ.ಎನ್. ಪ್ರದೀಪ್ ಜಂಟಿಯಾಗಿ 'ಕಾರ್ಗಲ್ ನೈಟ್ಸ್' ನಿರ್ಮಿಸಿದ್ದಾರೆ. ಈ ಹಿಂದೆ 'ಕಿನಾರೆ' ಸಿನಿಮಾ ಮಾಡಿ ಅನುಭವವಿರುವ ದೇವರಾಜ್, 'ಕಾರ್ಗಲ್ ನೈಟ್ಸ್' ಅನ್ನು ಸಿನಿಮಾ ಮಾದರಿಯಲ್ಲೇ ಮೇಕಿಂಗ್ ಮಾಡಿದ್ದಾರಂತೆ. 1995ರಲ್ಲಿ ಮಲೆನಾಡು ಸುತ್ತಮುತ್ತ ನಡೆದ ನೈಜ ಘಟನೆಯನ್ನು ಎಳೆಯಾಗಿಟ್ಟುಕೊಂಡು 'ಕಾರ್ಗಲ್ ನೈಟ್ಸ್' ಸಿದ್ಧಪಡಿಸಲಾಗಿದೆ. ರೆಟ್ರೋ ಕ್ರೈಂ-ಥ್ರಿಲ್ಲರ್ ಕಥಾಹಂದರವಿರುವ ಈ ವೆಬ್ ಸಿರೀಸ್, ಸಿಂಕ್ ಸೌಂಡ್‌ನಲ್ಲಿ ತಯಾರಾಗಿರುವುದು ವಿಶೇಷ.

ಇನ್ನಷ್ಟು ಕಾಡುಗಳ್ಳ ವೀರಪ್ಪನ್ 'ಅಟ್ಟಹಾಸ' ತೋರಿಸಲಿದ್ದಾರೆ ಕನ್ನಡ ನಟ ಕಿಶೋರ್!

ಶಿವಮೊಗ್ಗ, ಸಾಗರ, ಜೋಗ್‌ಫಾಲ್ಸ್ ಮೊದಲಾದ ಪ್ರದೇಶಗಳಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಛಾಯಾಗ್ರಹಣ ಮತ್ತು ಸಂಕಲನವನ್ನು ಅರುಣ್ ಮಾಡಿದ್ದರೆ. ಬಿ.ಆರ್‌. ಸುರೇಂದ್ರನಾಥ್ ಸಂಗೀತ ನೀಡಿದ್ದಾರೆ. ಮೇಕಿಂಗ್ ಹಂತದಲ್ಲಿರುವಾಗಲೇ ಒಟಿಟಿ ಪ್ಲಾಟ್‌ಫಾರ್ಮ್‌ಗಳಿಂದ ಸಾಕಷ್ಟು ಬೇಡಿಕೆ ಬಂದಿದ್ದರೂ, ಎಲ್ಲವೂ ಒಂದು ಹಂತಕ್ಕೆ ಬಂದಮೇಲೆ ನಂತರ ಮುಂದುವರೆಯುವ ಬಗ್ಗೆ ತಂಡ ಆಲೋಚನೆ ನಡೆಸಿತ್ತಂತೆ. ಕನ್ನಡ ಮತ್ತು ಹಿಂದಿಯಲ್ಲಿ ತಯಾರಾಗಿರುವ 'ಕಾರ್ಗಲ್ ನೈಟ್ಸ್' ವೆಬ್ ಸಿರೀಸ್ ಅನ್ನು ನಂತರ ತಮಿಳು-ತೆಲುಗಿಗೂ ಡಬ್ ಮಾಡುವ ಆಲೋಚನೆಯಲ್ಲಿ ತಂಡಕ್ಕಿದೆ.

ಅಂಥ ಕೆಲಸ ಮಾಡಿಕೊಂಡು ನನ್ನ ಅಭಿಮಾನಿಗಳನ್ನು ಕಳೆದುಕೊಳ್ಳಲಾರೆ: ನಟಿ ಹರಿಪ್ರಿಯಾ!