'ಸಲಗ' ಚಿತ್ರಕ್ಕಾಗಿ 'ಕೆಜಿಎಫ್‌' ಕಲಾ ನಿರ್ದೇಶಕನಿಂದ ಮಿನರ್ವ ಮಿಲ್‌ನಲ್ಲಿ ಅದ್ದೂರಿ ಸೆಟ್‌

ಕೆಜಿಎಫ್‌ ಸಿನಿಮಾದ ಅದ್ದೂರಿ ಸೆಟ್‌ಗಳು ಜನಮೆಚ್ಚುಗೆ ಪಡೆದುಕೊಂಡಿದ್ದವು. ಕಲಾ ನಿರ್ದೇಶಕ ಶಿವಕುಮಾರ್‌ ಅವರ ಕೈ ಚಳಕದಲ್ಲಿ ಅವು ಮೂಡಿಬಂದಿದ್ದವು. ಈಗ 'ಸಲಗ' ಚಿತ್ರಕ್ಕಾಗಿ ಶಿವಕುಮಾರ್‌ ವಿಶೇಷ ಸೆಟ್‌ ನಿರ್ಮಿಸುತ್ತಿದ್ದಾರೆ.

ಸಲಗ ಚಿತ್ರದ ಶೀರ್ಷಿಕೆ ಗೀತೆಯನ್ನು ಕಲರ್‌ಫುಲ್‌ ಆಗಿ ಚಿತ್ರಿಸಬೇಕು ಎಂದು ಪ್ಲ್ಯಾನ್‌ ಮಾಡಿಕೊಳ್ಳಲಾಗಿದೆ. ಅದಕ್ಕಾಗಿ ಈ ಸೆಟ್‌ ಹಾಕಲಾಗುತ್ತಿದೆ. 'ಸಿನಿಮಾದಲ್ಲಿ ಟೈಟಲ್‌ ಟ್ರ್ಯಾಕ್‌ ಅದ್ಧೂರಿಯಾಗಿ ಮೂಡಿ ಬರಬೇಕು ಎಂಬ ಉದ್ದೇಶದಿಂದ ಶಿವಕುಮಾರ್‌ ಅವರಿಂದ ಈ ಸೆಟ್‌ ಹಾಕಿಸುತ್ತಿದ್ದೇವೆ. ಚರಣ್‌ರಾಜ್‌ ಅದ್ಭುತವಾಗಿ ಕಂಪೋಸ್‌ ಮಾಡಿದ್ದಾರೆ. ಈ ಸೆಟ್‌ನಲ್ಲಿ ಬಹುಶಃ ಮೂರ್ನಾಲ್ಕು ದಿನಗಳ ಕಾಲ ಚಿತ್ರೀಕರಣ ಮಾಡುತ್ತೇವೆ' ಎನ್ನುತ್ತಾರೆ ನಿರ್ಮಾಪಕ ಶ್ರೀಕಾಂತ್‌.

'ಮಂಗಳೂರು ಭಾಗದ ಚಿತ್ರೀಕರಣ ಮುಗಿಸಿಕೊಂಡು ಬಂದಿದ್ದೇವೆ. ಶಿವಕುಮಾರ್‌ ಅವರ ಕಲಾ ನಿರ್ದೇಶನದಲ್ಲಿ ಸೆಟ್‌ ನಿರ್ಮಾಣ ಆಗುತ್ತಿರುವುದು ಖುಷಿಯ ವಿಚಾರ. ಅಭಿಮಾನಿಗಳು ಇಷ್ಟಪಡುವಂತಹ ಮಾಸ್‌ ಹಾಡು ಇದಾಗಲಿದೆ' ಎನ್ನುವುದು ದುನಿಯಾ ವಿಜಯ್‌ ಅವರ ಮಾತಾಗಿದೆ. ಫೆಬ್ರವರಿ ಕೊನೆಯ ವಾರದಲ್ಲಿಸಿನಿಮಾವನ್ನು ರಿಲೀಸ್‌ ಮಾಡಲು ಚಿತ್ರತಂಡ ಪ್ಲ್ಯಾನ್‌ ಮಾಡಿಕೊಂಡಿದ್ದು, ಸದ್ಯದಲ್ಲೇ ದಿನಾಂಕವನ್ನು ತಿಳಿಸಲಿದೆ.

ಅದ್ದೂರಿ ಮೇಕಿಂಗ್‌ನ ಕಾರಣದಿಂದಾಗಿಯೇ 'ಸಲಗ' ಮೇಲೆ ನಿರೀಕ್ಷೆ ಹೆಚ್ಚುವಂತಾಗಿದೆ. ಕೆಲವು ದಿನಗಳ ಹಿಂದೆ ಮೇಕಿಂಗ್‌ ವಿಡಿಯೋ ಬಿಡುಗಡೆಯಾಗಿ ಮೆಚ್ಚುಗೆ ಗಳಿಸಿತ್ತು. 'ಸೂರಿಯಣ್ಣ...' ಲಿರಿಕಲ್‌ ಗೀತೆಯೂ ಸಖತ್‌ ಸೌಂಡು ಮಾಡಿದೆ. ಪೋಸ್ಟರ್‌ಗಳಲ್ಲಿ ದುನಿಯಾ ವಿಜಯ್‌, ನಾಯಕಿ ಸಂಜನಾ ಆನಂದ್‌ ಗಮನ ಸೆಳೆಯುತ್ತಿದ್ದಾರೆ.