ಕೋವಿಡ್‌ ತೀವ್ರತೆಯಿಂದಾಗಿ ಸದ್ಯಕ್ಕೆ ಚಿತ್ರರಂಗದ ಎಲ್ಲಾ ಕೆಲಸಗಳು ನಿಂತಿವೆ. ಇಂತಹ ಸಮಯದಲ್ಲಿ ಓಟಿಟಿ ವೇದಿಕೆ ಚಿತ್ರರಂಗಕ್ಕೆ ಭವಿಷ್ಯ ಸೃಷ್ಟಿಯಾಗುತ್ತದಾ ಅಥವಾ ಹೊಸಬರ ಚಿತ್ರಗಳು ಚಿತ್ರಮಂದಿರಕ್ಕೆ ಕೆಲ ಕಾಲ ಆಸರೆಯಾಗುತ್ತವಾ ಎಂಬ ಪ್ರಶ್ನೆ ಈಗ ಉದ್ಭವವಾಗಿದೆ. ಈ ಬಗ್ಗೆ ಚಿತ್ರರಂಗದಲ್ಲಿ ವಿವಿಧ ರೀತಿಯ ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆ.
ನೇರವಾಗಿ ಓಟಿಟಿ ರಿಲೀಸ್‌
ಮಲಯಾಳಂ ಚಿತ್ರರಂಗದಲ್ಲಿ ಓಟಿಟಿಯಲ್ಲಿ ಸಿನಿಮಾಗಳ ನೇರ ರಿಲೀಸ್‌ಗಳು ಹೆಚ್ಚಾಗಿವೆ. ಮೋಹನ್‌ಲಾಲ್‌ರಂತಹ ದೊಡ್ಡ ಸ್ಟಾರ್‌ಗಳು ಸಹ ತಮ್ಮ ಸಿನಿಮಾಗಳನ್ನು ಓಟಿಟಿಯಲ್ಲಿ ನೇರವಾಗಿ ಬಿಡುಗಡೆ ಮಾಡುತ್ತಿದ್ದಾರೆ. ಆ ಚಿತ್ರಗಳು ಹಿಟ್‌ ಕೂಡ ಆಗುತ್ತಿವೆ. ಈ ಮಾದರಿ ಕನ್ನಡಕ್ಕೂ ಬರಲಿ ಎನ್ನುವುದು ಕೆಲವರ ವಾದ. ಆದರೆ ಇದು ಬಿಗ್‌ ಬಜೆಟ್‌ ಚಿತ್ರಗಳಿಗೆ ನೆರವಾಗುವುದಿಲ್ಲ ಎಂಬ ವಾದವೂ ಇದೆ.
ಕ್ವಾಲಿಟಿ ಸಿನಿಮಾ ಮುಖ್ಯ
ಓಟಿಟಿಗಳಲ್ಲಿ ಸುಖಾಸುಮ್ಮನೆ ಸಿನಿಮಾಗಳನ್ನು ಕೊಂಡುಕೊಳ್ಳುವುದಿಲ್ಲ. ಮಾಮೂಲಿ ಕಮರ್ಷಿಯಲ್‌ ಮತ್ತು ಲವ್‌ ಸ್ಟೋರಿಗಳ ಬದಲಿಗೆ ಔಟ್‌ ಆಫ್‌ ದಿ ಬಾಕ್ಸ್‌ ಸಿನಿಮಾಗಳನ್ನು ಅವು ಹೆಚ್ಚಾಗಿ ಕೊಂಡುಕೊಳ್ಳುತ್ತವೆ. ಅವರಿಗೆ ಮೇಕಿಂಗ್‌ ಕ್ವಾಲಿಟಿ ಮತ್ತು ಪ್ರೆಸೆಂಟೇಶನ್‌ ಬಹಳ ಮುಖ್ಯವಾಗುತ್ತವೆ. ಕಥೆಯ ವಿಚಾರದಲ್ಲಿಯೂ ಒಳ್ಳೊಳ್ಳೆಯ ಕಥೆಗಳೇ ಓಟಿಟಿಗಳಿಗೆ ಬೇಕು. ಮಾಲಿವುಡ್‌ ಮತ್ತು ಕಾಲಿವುಡ್‌ನಲ್ಲಿಅಂತಹ ಕಂಟೆಂಟ್‌ಗಳು ಅವರಿಗೆ ಸಿಗುತ್ತಿರುವ ಕಾರಣ ಅಲ್ಲಿನ ಸಿನಿಮಾಗಳನ್ನು ನೇರವಾಗಿ ಹಣ ಕೊಟ್ಟು ಕೊಂಡುಕೊಳ್ಳುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ನಮ್ಮಲ್ಲೂಇಂಥ ಬೆಳವಣಿಗೆ ಆರಂಭವಾಗಬೇಕು.
ಚಿತ್ರಮಂದಿರಕ್ಕೆ ಸಮಾನ
ಡಿಜಿಟಲ್‌ ವೇದಿಕೆ ಒಂದು ರೀತಿಯಲ್ಲಿ ಚಿತ್ರಮಂದಿರಕ್ಕೆ ಪರ್ಯಾಯ ಎಂಬ ಮಾತು ಕೂಡ ಕೇಳಿ ಬರುತ್ತಿದೆ. ಚಿತ್ರಮಂದಿರಗಳಲ್ಲಿ ಸಿನಿಮಾ ಯಶಸ್ವಿಯಾದರೆ ಅದಕ್ಕೆ ಓಟಿಟಿಯಲ್ಲಿಯೂ ಮಾನ್ಯತೆ ಸಿಗುತ್ತದೆ. ಇದಕ್ಕೆ ಸ್ಯಾಂಡಲ್‌ವುಡ್‌ನ ಉದಾಹರಣೆಗಳೆಂದರೆ 'ಲವ್‌ ಮಾಕ್‌ಟೇಲ್‌' ಮತ್ತು 'ದಿಯಾ' ಸಿನಿಮಾಗಳು. ಇದರಲ್ಲಿ'ಲವ್‌ ಮಾಕ್‌ಟೇಲ್‌' ಚಿತ್ರಮಂದಿರದಲ್ಲಿ ಕೂಡ ಉತ್ತಮ ಕಲೆಕ್ಷನ್‌ ಕಂಡಿತ್ತು. 'ದಿಯಾ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿಉತ್ತಮ ಕಲೆಕ್ಷನ್‌ ಮಾಡದೆ ಇದ್ದರೂ ಓಟಿಟಿಯಲ್ಲಿ ಹೆಚ್ಚಿನ ವೀಕ್ಷಣೆ ಪಡೆದುಕೊಂಡಿತು. ಇದರಿಂದ ಆ ನಿರ್ಮಾಪಕರ ಮತ್ತೊಂದು ಸಿನಿಮಾವನ್ನು ನೇರವಾಗಿ ಓಟಿಟಿಯಲ್ಲಿ ಬಿಡುಗಡೆ ಮಾಡಲು ಸಾಧ್ಯವಾಯಿತು. ಇದಕ್ಕೆ ಕಾರಣವಾಗಿದ್ದು, ಆ ಸಿನಿಮಾಗಳ ಕ್ವಾಲಿಟಿ ಮತ್ತು ಹೊಸತನದ ಕಥೆ. ಹಾಗಾಗಿ ಹೊಸತನವಿರುವ ಕಥೆಗಳು ಸಿನಿಮಾವಾದರೆ ಓಟಿಟಿಗಳು ಕೊಂಡುಕೊಳ್ಳುತ್ತವೆ.
ಓಟಿಟಿ ಮತ್ತು ಸೋಶಿಯಲ್‌ ಮೀಡಿಯಾ ಕಡಿವಾಣಕ್ಕೆ ಕೇಂದ್ರ ಸರ್ಕಾರದಿಂದ ಹೊಸ ನಿಯಮಗಳು ಜಾರಿ!
ಶೇರಿಂಗ್‌ ಪದ್ಧತಿ
ಸದ್ಯಕ್ಕೆ ಕನ್ನಡ ಚಿತ್ರಗಳಲ್ಲಿ ಸ್ಟಾರ್‌ಗಳ ಸಿನಿಮಾ ಬಿಟ್ಟು ಉಳಿದವುಗಳನ್ನು ರೆವೆನ್ಯೂ ಶೇರಿಂಗ್‌ ಪದ್ಧತಿಯಲ್ಲಿ ಕೊಂಡುಕೊಳ್ಳಲಾಗುತ್ತಿದೆ. ತಮ್ಮ ಸಿನಿಮಾದ ಮೇಲೆ ನಂಬಿಕೆ ಇರುವವರು ರೆವೆನ್ಯೂ ಶೇರಿಂಗ್‌ ಪದ್ಧತಿಯಲ್ಲಿ ಬಿಡುಗಡೆ ಮಾಡಿ ಯಶಸ್ಸು ಗಳಿಸಬಹುದು. ಈ ನಿಟ್ಟಿನಲ್ಲಿ ಮಂಸೋರೆ ಅವರ 'ಆ್ಯಕ್ಟ್ 1978' ಮತ್ತು ಅರವಿಂದ್‌ ಕಾಮತ್‌ ಅವರ 'ಅರಿಷಡ್ವರ್ಗ' ಸಿನಿಮಾಗಳಿಗೆ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ. ರೆವೆನ್ಯೂ ಶೇರಿಂಗ್‌ನಿಂದಾಗಿ ಮತ್ತೆ ಕ್ವಾಲಿಟಿ ಸಿನಿಮಾಗಳೇ ಮುಖ್ಯವಾಗುತ್ತವೆ.
ಹಿಂದಿಗೆ ರಿಮೇಕ್‌ ಆಗಲಿದೆ ಕನ್ನಡದ ACT-1978! ನಾಯಕಿಯಾಗಿ ಬಾಲಿವುಡ್‌ನ ಸ್ಟಾರ್ ನಟಿ?
ರೆಡಿಯಾಗಿರುವ ಚಿತ್ರಕ್ಕೆ ಅನುಕೂಲ
ಈಗ ವಿವಿಧ ಭಾಷೆಗಳಲ್ಲಿ ನೂರಾರು ಸಿನಿಮಾಗಳು ಬಿಡುಗಡೆಗೆ ರೆಡಿಯಾಗಿವೆ. ಅವುಗಳನ್ನು ಧೈರ್ಯ ಮಾಡಿ ಓಟಿಟಿಯಲ್ಲಿ ಬಿಡುಗಡೆ ಮಾಡಬಹುದು. ಸಿನಿಮಾ ಚೆನ್ನಾಗಿದ್ದರೆ ಜನರು ಖಂಡಿತ ನೋಡುತ್ತಾರೆ. ಹಿಂದಿಯಲ್ಲಿ ಸಲ್ಮಾನ್‌ ಖಾನ್‌, ತಮ್ಮ 'ರಾಧೆ: ಯುವರ್‌ ಮೋಸ್ಟ್‌ ವಾಂಟೆಡ್‌ ಭಾಯಿ' ಸಿನಿಮಾವನ್ನು ಓಟಿಟಿಯಲ್ಲಿ ನೇರವಾಗಿ ಬಿಡುಗಡೆ ಮಾಡಿದ್ದಾರೆ. ಒಂದು ವೇಳೆ ಇದೇ ಪರಿಸ್ಥಿತಿ ಮುಂದುವರಿದರೆ ಮುಂದಿನ ದಿನಗಳಲ್ಲಿಇನ್ನೊಂದಿಷ್ಟು ದೊಡ್ಡ ಸಿನಿಮಾಗಳು ಓಟಿಟಿಯಲ್ಲಿ ಬಂದರೆ ಅಚ್ಚರಿಯಿಲ್ಲ. ಏಕೆಂದರೆ ಭಾರತೀಯ ಚಿತ್ರರಂಗದಲ್ಲಿ ಕನಿಷ್ಠ 30ಕ್ಕೂ ಹೆಚ್ಚು ಸ್ಟಾರ್‌ಗಳ ಸಿನಿಮಾಗಳು ಚಿತ್ರೀಕರಣಗೊಂಡು ಬಿಡುಗಡೆಗಾಗಿ ಕಾಯುತ್ತಿವೆ.
ವೆಬ್‌ ಸಿರೀಸ್‌ನತ್ತ ಮುಖ ಮಾಡಿದ ನಟ/ನಿರ್ದೇಶಕ ರಮೇಶ್‌ ಅರವಿಂದ್‌!
ತೆಲುಗಿನಲ್ಲಿ ಶುರುವಾಗಿದೆ ಆಹಾ
ತೆಲುಗು ಭಾಷೆಯಲ್ಲಿ ನಿರ್ಮಾಪಕ ಅಲ್ಲು ಅರವಿಂದ್‌ ಆರಂಭಿಸಿರುವ ಓಟಿಟಿಯೊಂದು ಸಿಕ್ಕಾಪಟ್ಟೆ ಹೆಸರು ಮಾಡುತ್ತಿದೆ. ಅದಕ್ಕೆ ಕರ್ನಾಟಕದಲ್ಲಿಯೂ ಅಸಂಖ್ಯಾತ ಸಬ್‌ಸ್ಕ್ರೈಬರ್ಸ್ ಇದ್ದಾರೆ. ಅದನ್ನು ಅಭಿವೃದ್ಧಿಗೊಳಿಸಲು ಅಲ್ಲಿನ ಸ್ಟಾರ್ ನಟರಾದ ಅಲ್ಲುಅರ್ಜುನ್‌, ಸಮಂತಾ, ರಾಣಾ ದಗ್ಗುಬಾಟಿ ಸಹ ಕೈ ಜೋಡಿಸಿದ್ದಾರೆ. ಅದಕ್ಕಾಗಿ ಅವರು ಒಳ್ಳೊಳ್ಳೆಯ ಸಿನಿಮಾಗಳನ್ನು ಸಹ ಕೊಂಡುಕೊಂಡು ಪ್ರಸಾರ ಮಾಡುತ್ತಿದ್ದಾರೆ. ಉತ್ತಮ ಕಂಟೆಂಟ್‌ಗಳ ಮೂಲಕ ಅದು ನಿಧಾನವಾಗಿ ತೆಲುಗು ಭಾಷಿಕರು ಮತ್ತು ತೆಲುಗೇತರರಿಗೆ ರೀಚ್‌ ಆಗಿದೆ. ಅಂತಹದ್ದೊಂದು ಸ್ಥಳೀಯ ಓಟಿಟಿ ಕನ್ನಡಕ್ಕೂ ಬೇಕು. ಆಗ ಬಹುಶಃ ಕನ್ನಡದಲ್ಲಿಯೂ ಉತ್ತಮ ಕಂಟೆಂಟ್‌ನ ಸಿನಿಮಾಗಳಿಗೆ ವೇದಿಕೆ ಸೃಷ್ಟಿಯಾಗಬಹುದು ಎಂಬ ಅಭಿಪ್ರಾಯವನ್ನು ಕೆಲವರು ವ್ಯಕ್ತಪಡಿಸಿದ್ದಾರೆ.
ಧಾರ್ಮಿಕ ಭಾವನೆಗೆ ಧಕ್ಕೆ ತರುವ ವೆಬ್‌ ಸಿರೀಸ್‌ಗಳಿಗೆ ಇನ್ಮುಂದೆ ಕೇಂದ್ರ ಸರ್ಕಾರ ಹಾಕಲಿದೆ ಕಡಿವಾಣ!