ಆರಂಭದಲ್ಲೇ ಜಗ್ಗೇಶ್ 'ರಂಗನಾಯಕ'ನಿಗೆ ಟೈಟಲ್ ಕಿರಿಕ್!! ಏನಿದು ಹೊಸ ವಿವಾದ?

'ನವರಸ ನಾಯಕ' ಜಗ್ಗೇಶ್-'ಮಠ' ಗುರುಪ್ರಸಾದ್ ಹತ್ತು ವರ್ಷಗಳ ನಂತರ 'ರಂಗನಾಯಕ' ಚಿತ್ರಕ್ಕಾಗಿ ಒಂದಾಗಿದ್ದು, ಇತ್ತೀಚೆಗಷ್ಟೇ ಅದರ ಟೀಸರ್ ರಿಲೀಸ್ ಆಗಿತ್ತು. ನೋಡಿದವರಿಂದ ಉತ್ತಮ ಮೆಚ್ಚುಗೆಯೂ ದಕ್ಕಿತ್ತು. ಆದರೆ, ಶೀರ್ಷಿಕೆಯಿಂದಲೇ ವಿವಾದವೊಂದು ಹುಟ್ಟಿಕೊಂಡಿದೆ.
ದೂರ ದೂರ ಆಗಿದ್ದ ಜಗ್ಗೇಶ್ ಮತ್ತು 'ಮಠ' ಖ್ಯಾತಿಯ ಗುರುಪ್ರಸಾದ್ ಈಗ ಒಂದಾಗಿದ್ದೇಕೆ? ಜಗ್ಗೇಶ್ ಹೇಳಿದ್ದೇನು?
'ರಂಗನಾಯಕ' ಶೀರ್ಷಿಕೆ ನಮ್ಮದು, ಬಹಳ ಹಿಂದೆಯೇ ಆ ಶೀರ್ಷಿಕೆಯಡಿಯಲ್ಲಿ ಸಿನಿಮಾ ಮಾಡಲಿದ್ದೇವೆ ಎಂದು ಘೋಷಣೆ ಮಾಡಿಕೊಂಡಿದ್ದೇವೆ ಎಂದು ನಿರ್ದೇಶಕರೊಬ್ಬರು ಈಗ ಅಳಲು ತೋಡಿಕೊಂಡಿದ್ದಾರೆ. ಅಷ್ಟಕ್ಕೂ ಏನಿದು ಕಥೆ? ಇಲ್ಲಿದೆ ಫುಲ್‌ ಡಿಟೈಲ್ಸ್. ಈಚೆಗೆ ನಡೆದ 'ರಂಗನಾಯಕ' ಪ್ರೆಸ್‌ಮೀಟ್‌ನಲ್ಲಿ ಜಗ್ಗೇಶ್ ಮಾತನಾಡುವಾಗ, 'ಈ ಟೈಟಲ್ ಬೇರೆಯವರ ಬಳಿ ಇತ್ತು. ಅವರು ಪ್ರೀತಿಯಿಂದ ಬಿಟ್ಟುಕೊಟ್ಟಿದ್ದಾರೆ' ಎಂದು ಹೇಳಿದ್ದರು. ಆದರೆ, ನಿರ್ದೇಶಕ ರಾಧ ಅದು ನನ್ನದೇ ಶೀರ್ಷಿಕೆ ನನ್ನದೇ ಎನ್ನುತ್ತಿದ್ದಾರೆ.

ಯಾರು ಈ ರಾಧ?
ಕೆಲ ತಿಂಗಳ ಹಿಂದೆ 'ಖನನ' ಸಿನಿಮಾವನ್ನು ತೆರೆಗೆ ತಂದಿದದ್ದರು ನಿರ್ದೇಶಕ ರಾಧ. ಆ ಸಿನಿಮಾ ತೆರೆಕಾಣುವುದಕ್ಕೂ ಮೊದಲೇ ನನ್ನ ಮುಂದಿನ ಸಿನಿಮಾ 'ರಂಗನಾಯಕ' ಎಂದು ಘೋಷಣೆ ಮಾಡಿಕೊಂಡಿದ್ದರು. ಅದಕ್ಕಾಗಿ ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಶೀರ್ಷಿಕೆಯನ್ನೂ ನೋಂದಾಯಿಸಿದ್ದರು. ಅದಕ್ಕೆ ಕೃಷ್ಣೇಗೌಡ ಸಾರಥ್ಯದ 'ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿ' ಶೀರ್ಷಿಕೆಯನ್ನು 2018ರ ಫೆಬ್ರವರಿಯಲ್ಲೇ ನೀಡಿತ್ತು. ಅಲ್ಲದೆ, ಬಹಳ ಹಿಂದೆಯೇ ರಾಧ ಸಾಕಷ್ಟು ಸಂದರ್ಶನಗಳಲ್ಲಿ, ನನ್ನ ಮುಂದಿನ ಸಿನಿಮಾದ ಶೀರ್ಷಿಕೆ 'ರಂಗನಾಯಕ' ಎಂದು ಹೇಳಿಕೊಂಡಿದ್ದರಂತೆ! ಆದರೆ, ಗುರುಪ್ರಸಾದ್ ಅದೇ ಟೈಟಲ್ ಇಟ್ಟುಕೊಂಡು ಸಿನಿಮಾ ಮಾಡುತ್ತಿರುವುದು ನಿರ್ದೇಶಕ ರಾಧಗೆ ಬೇಸರ ತಂದಿದೆ.
ರಂಗನಾಯಕಿ ಒಬ್ಬಳೇ ಅಲ್ಲ, ರಂಗನಾಯಕನೂ ಬಂದ!!! ಮುಂದೇನು?
ಗೊಂದಲಕ್ಕೆ ಕಾರಣವೇನು? ಚಂದನವನದಲ್ಲಿ ಎರಡು ವಾಣಿಜ್ಯ ಮಂಡಳಿಗಳು ಕಾರ್ಯನಿರ್ವಹಿಸುತ್ತಿವೆ. ಒಂದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ, ಮತ್ತೊಂದು ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿ. ಇವೆರಡಲ್ಲೂ ಸಿನಿಮಾಗಳನ್ನು ನೋಂದಾಯಿಸಿಕೊಂಡು, ತೆರೆಗೆ ತರಬಹುದಾಗಿದೆ. ಒಂದೇ ಟೈಟಲನ್ನು ಎರಡು ಕಡೆ ಪಡೆಯುವ ಅವಕಾಶ ಇದೆ. ಇದಕ್ಕೆ ಯಾವುದೇ ನಿರ್ಬಂಧಗಳಿಲ್ಲ. ಬಹುಶಃ ಇದೇ ಈ ಗೊಂದಲಕ್ಕೆ ಕಾರಣವಾಗಿರಬಹುದು.