Father's Day: ಅಪ್ಪಂದಿರ ಪ್ರೀತಿ ಬಗ್ಗೆ ಮಾತನಾಡಿದ ಕನ್ನಡದ ಸ್ಟಾರ್ ನಟರ ಪುತ್ರಿಯರು

ನೇತ್ರಾವತಿ ಕೃಷ್ಣಮೂರ್ತಿ

ಸ್ಯಾಂಡಲ್‌ವುಡ್‌ ಸ್ಟಾರ್‌ ಶಿವರಾಜ್‌ಕುಮಾರ್‌, ಹಿರಿಯ ನಟ ರಾಮ್‌ಕುಮಾರ್‌ ಮತ್ತು ಲವ್ಲಿಸ್ಟಾರ್‌ ಪ್ರೇಮ್‌ ಪುತ್ರಿಯರು ಅಪ್ಪಂದಿರ ದಿನವನ್ನು ತಮ್ಮ ಮನದಾಳದ ಮಾತುಗಳ ಮೂಲಕ ವಿಶೇಷವಾಗಿ ಆಚರಿಸಿಕೊಂಡಿದ್ದಾರೆ. ವೃತ್ತಿಜೀವನದಲ್ಲಿ ಹೊಸ ಹೆಜ್ಜೆ ಇಡುತ್ತಿರುವ ನಿವೇದಿತಾ ಶಿವರಾಜ್‌ಕುಮಾರ್‌, ಅಮೃತಾ ಪ್ರೇಮ್‌ ಮತ್ತು ಧನ್ಯಾ ರಾಮ್‌ಕುಮಾರ್‌ ತಂದೆಯೇ ನಮಗೆ ಉತ್ತಮ ಸ್ನೇಹಿತ, ಸ್ಫೂರ್ತಿ, ಶಕ್ತಿ ಎಂದಿದ್ದಾರೆ.

ಅಪ್ಪ ಬೆಸ್ಟ್‌ ಫ್ರೆಂಡ್‌: ನಿವೇದಿತಾ ಶಿವರಾಜ್‌ಕುಮಾರ್‌
ನನ್ನ ಮತ್ತು ನನ್ನ ಅಪ್ಪನ ನಡುವೆ ತಂದೆ ಮಗಳ ಸಂಬಂಧಕ್ಕಿಂತ ಹೆಚ್ಚಾಗಿ ಸ್ನೇಹ ಸಂಬಂಧವಿದೆ. ಅಪ್ಪ ನನ್ನ ಬೆಸ್ಟ್‌ ಫ್ರೆಂಡ್‌. ನಾನು ಚಿಕ್ಕವಳಿದ್ದಾಗಿನಿಂದಲೂ ನನ್ನ ಮತ್ತು ಅವರ ನಡುವೆ ಉತ್ತಮ ಬಾಂಧವ್ಯ ಬೆಸೆದುಕೊಂಡಿದೆ. ಪಠ್ಯವಿರಲಿ ಅಥವಾ ಪಠ್ಯೇತರ ವಿಷಯವಾಗಲಿ ಅವರು ನನಗೆ ಸಾಕಷ್ಟು ಪ್ರೋತ್ಸಾಹ, ಸಲಹೆ ನೀಡಿದ್ದಾರೆ. ಶೂಟಿಂಗ್‌ನಲ್ಲಿ ಎಷ್ಟೇ ಬಿಝಿ ಇದ್ದರೂ, ಪ್ರತಿದಿನ ಶಾಲೆಗೆ ಬಿಡುವುದು, ವಾಪಸ್‌ ಕರೆದುಕೊಂಡು ಬರುವುದು, ಸ್ವಿಮ್ಮಿಂಗ್‌ ತರಗತಿಗೆ ಡ್ರಾಪ್‌ ಮಾಡುವುದನ್ನು ಅವರೇ ಮಾಡುತ್ತಿದ್ದರು. ಸಿನಿಮಾ ಚಿತ್ರೀಕರಣ ಬೆಂಗಳೂರಿನಲ್ಲಿರಲಿ, ಹೊರಗಡೆ ಇರಲಿ, ನಮಗಾಗಿ ಅವರು ಸಮಯ ಕೊಡುತ್ತಿದ್ದರು. ಅವರನ್ನು ನಾವು ಎಂದಿಗೂ ಮಿಸ್‌ ಮಾಡಲಿಲ್ಲ. ನಾವು ಪ್ರತಿ ವಿಷಯವನ್ನು ಪರಸ್ಪರ ಹಂಚಿಕೊಳ್ಳುತ್ತೇವೆ. ಮನೆಯಲ್ಲಿ ಹೆಚ್ಚಾಗಿ ಸಿನಿಮಾಗಳ ಬಗ್ಗೆ ಚರ್ಚೆ ಮಾಡುತ್ತೇವೆ. ನಾನು ನಿರ್ಮಾಪಕಿಯಾಗಿ ವೃತ್ತಿ ಜೀವನ ಆರಂಭಿಸಿರುವುದಕ್ಕೆ ಅವರು ಬೆನ್ನು ತಟ್ಟಿ ಪ್ರೋತ್ಸಾಹಿಸಿದ್ದಾರೆ. ನನ್ನ ತಂದೆ ನನಗೆ ಹೇಳಿಕೊಟ್ಟಿರುವ ಪಾಠ ‘ಹಾನೆಸ್ಟ್‌ ಆಗಿರು, ಹಾರ್ಡ್‌ವರ್ಕ್ ಮಾಡು’ ಎಂದು. ಅದನ್ನು ನನ್ನ ಜೀವನದಲ್ಲಿಅಳವಡಿಸಿಕೊಂಡಿದ್ದೇನೆ ಎಂದು ನಿವೇದಿತಾ ಶಿವರಾಜ್‌ ಕುಮಾರ್‌ ಹೇಳಿದ್ದಾರೆ.

'ಒಮ್ಮೆ ಸಡಗರ, ಮಗದೊಮ್ಮೆ ಕಹಿ ಸುಖ..'; ಮುದ್ದಿನ ಮಗನ ಬಗ್ಗೆ ನಟ ವಿಜಯ್ ಸೂರ್ಯ ಬರಹ

ಅಪ್ಪ ಎಂದರೆ ಪಾಸಿಟಿವ್‌: ಅಮೃತಾ ಪ್ರೇಮ್‌
ನನ್ನ ತಂದೆ ಸೆಲೆಬ್ರಿಟಿಯಾಗಿದ್ದರೂ ಸಾಮಾನ್ಯ ತಂದೆಯಂತೆಯೇ ನಮ್ಮ ಜತೆಗೆ ನಡೆದುಕೊಳ್ಳುತ್ತಾರೆ. ನಮ್ಮ ತಪ್ಪು, ಸರಿಗಳನ್ನು ನೇರವಾಗಿ ಹೇಳಿ ಬಿಡುತ್ತಾರೆ. ಯಾವುದನ್ನೂ ಮುಚ್ಚಿಡುವುದಿಲ್ಲ. ಇಂದಿನ ತಲೆಮಾರಿನವರಾದ ನಮಗೆ ಒವರ್‌ ಥಿಂಕಿಂಗ್‌ ಜಾಸ್ತಿ. ಆದರೆ ಅವರು ತುಂಬಾ ಪ್ರ್ಯಾಕ್ಟಿಕಲ್‌. ಯಾವುದೇ ಕೆಲಸವನ್ನೂ ಮುನ್ನುಗ್ಗಿ ಮಾಡಬೇಕು ಎಂದು ಸದಾ ಪ್ರೋತ್ಸಾಹಿಸುತ್ತಿರುತ್ತಾರೆ. ಯಾವುದೇ ಕೆಲಸ ಮಾಡುವುದಿದ್ದರೂ ಅದರಲ್ಲಿ ಸಂಪೂರ್ಣ ತೊಡಗಿಸಿಕೊಂಡು ಶ್ರದ್ಧೆ, ಭಕ್ತಿಯಿಂದ ಕಾರ್ಯ ನಿರ್ವಹಿಸಬೇಕು ಎನ್ನುತ್ತಾರೆ. ನಾನು ವೃತ್ತಿಯಲ್ಲಿನಟಿಯಾಗಿ ಹೊಸ ಹೆಜ್ಜೆ ಇಟ್ಟಿದ್ದೇನೆ. ಇದು ನನ್ನದೇ ಆಯ್ಕೆ. ಆಗ ಅವರು ಹೇಳಿದ್ದು ಇಷ್ಟೆ, ‘ನಿನ್ನ ಕೆಲಸವನ್ನು ಪ್ರಾಮಾಣಿಕವಾಗಿ, ಶ್ರದ್ಧೆಯಿಂದ ಮಾಡು. ಫಲಿತಾಂಶದ ಬಗ್ಗೆ ಯೋಚಿಸಬೇಡ’ ಎಂದು. ಅವರು ದೊಡ್ಡವರು, ಚಿಕ್ಕವರೆನ್ನದೆ ಎಲ್ಲರನ್ನೂ ಗೌರವದಿಂದ ಕಾಣುತ್ತಿರುತ್ತಾರೆ. ಸಾಕಷ್ಟು ವಿಷಯಗಳಲ್ಲಿನನಗೆ ಸ್ಫೂರ್ತಿಯಾಗಿದ್ದಾರೆ. ಅವರಲ್ಲಿನನಗೆ ಇಷ್ಟವಾಗುವ ಗುಣವೆಂದರೆ ಏನೇ ನೋವಿದ್ದರೂ, ಎಷ್ಟೇ ಕಷ್ಟ ಬಂದರೂ ನಗುತ್ತಾ ಇರುತ್ತಾರೆ. ಸದಾ ಸಕಾರಾತ್ಮಕವಾಗಿ ಯೋಚಿಸುತ್ತಾರೆ. ನನಗೆ ಅಪ್ಪ ಎಂದರೆ ಪಾಸಿಟಿವ್‌ ಎಂದು ಅಮೃತಾ ಪ್ರೇಮ್‌ ಹೇಳಿದ್ದಾರೆ.

ವಿಶ್ವ ಅಪ್ಪಂದಿರ ದಿನ; ವಿಶೇಷ ಫೋಟೋಗಳನ್ನು ಹಂಚಿಕೊಂಡ ನಟಿ ರಾಧಿಕಾ ಪಂಡಿತ್‌

ಶಿಸ್ತಿನ ಸಿಪಾಯಿ: ಧನ್ಯಾ ರಾಮ್‌ಕುಮಾರ್‌
ನನ್ನ ತಂದೆಯು ನನ್ನ ಹಾಗೂ ನನ್ನ ಸಹೋದರನ ಜೀವನದ ಮೇಲೆ ಸಾಕಷ್ಟು ಪ್ರಭಾವ ಬೀರಿದ್ದಾರೆ. ಚಿಕ್ಕಂದಿನಿಂದಲೂ ಅವರು ನಮಗೆ ರಾಮಾಯಣ, ಮಹಾಭಾರತದಂತಹ ಪೌರಾಣಿಕ ಕಥೆಗಳನ್ನು ಮತ್ತು ಭಾರತದ, ಕರ್ನಾಟಕದ ಐತಿಹಾಸಿಕ ಹಿನ್ನೆಲೆಗಳನ್ನು ಓದಿ ಹೇಳುತ್ತಿದ್ದರು. ಇತರರನ್ನು ಹೇಗೆ ಗೌರವಿಸಬೇಕು ಎಂಬುದನ್ನು ಹೇಳಿಕೊಟ್ಟಿದ್ದಾರೆ. ನಾನು ನಟನಾ ಕ್ಷೇತ್ರಕ್ಕೆ ಬರಬೇಕೆಂದುಕೊಂಡಾಗ ‘ನೀನು ನಟನೆ ಮಾಡು, ಆದರೆ ನಿನ್ನ ಕುಟುಂಬದ ಗೌರವ ಮತ್ತು ಮೌಲ್ಯ ಮನಸ್ಸಿನಲ್ಲಿರಲಿ’ ಎಂದಿದ್ದರು. ನನ್ನ ಮೊದಲ ಸಿನಿಮಾದ ನಟನೆ ನೋಡಿ ಬಹಳ ಹೆಮ್ಮೆ ಹಾಗೂ ಖುಷಿಪಟ್ಟರು. ಅಪ್ಪನೊಂದಿಗೆ ನನ್ನ ಆಂತರಿಕ ಪ್ರೀತಿ, ಗೌರವ ತುಂಬಾ ಬಲವಾಗಿದೆ. ನನ್ನ ತಂದೆಗೆ ಶಿಸ್ತು ಬಹಳ ಮುಖ್ಯ. ಶಿಸ್ತಿನ ಜೀವನವನ್ನು ನಮಗೂ ಹೇಳಿಕೊಟ್ಟಿದ್ದಾರೆ ಎಂದು ಧನ್ಯಾ ರಾಮ್‌ಕುಮಾರ್‌ ಹೇಳಿದ್ದಾರೆ.