ಅಯ್ಯಯ್ಯೋ... ಇದೇನಿದು ಚಂದನ್‌ ಶೆಟ್ಟಿ ಫೇಸ್‌ಬುಕ್‌ ಖಾತೆಯಲ್ಲಿ ಅಶ್ಲೀಲ, ಅಸಭ್ಯ, ಅವಾಂತರ!

ರ‍್ಯಾಪ್‌ ಸಿಂಗರ್‌ ಚಂದನ್‌ ಶೆಟ್ಟಿ ಅವರು ಇತ್ತೀಚೆಗೆ ಒಂದು ವಿವಾದ ಮೈಮೇಲೆ ಎಳೆದುಕೊಂಡರು. ಅವರು ಹೊಸದಾಗಿ ಕಂಪೋಸ್‌ ಮಾಡಿದ್ದ ಕೋಲುಮಂಡೆ ಹಾಡು ಅನೇಕರ ಅಸಮಾಧಾನಕ್ಕೆ ಕಾರಣ ಆಗಿತು. ಆ ಹಾಡನ್ನು ಡಿಲೀಟ್‌ ಮಾಡಿದ್ದೂ ಅಲ್ಲದೆ, ಜನರ ಕ್ಷಮೆ ಕೇಳುವ ಮೂಲಕ ಆ ವಿವಾದಕ್ಕೆ ಚಂದನ್‌ ತೆರೆ ಎಳೆದರು. ಆದರೆ ಅದರ ಬೆನ್ನಲ್ಲೇ ಅವರಿಗೆ ಇನ್ನೊಂದು ಕಾಟ ಆರಂಭ ಆಗಿದೆ.

ಸೋಶಿಯಲ್‌ ಮೀಡಿಯಾದಲ್ಲಿ ಚಂದನ್‌ ಶೆಟ್ಟಿಗೆ ಸಾಕಷ್ಟು ಫಾಲೋವರ್ಸ್‌ ಇದ್ದಾರೆ. ಬುಧವಾರ (ಆ.26) ಅವರ ಫೇಸ್‌ಬುಕ್‌ ಖಾತೆಗೆ ಯಾರೋ ಒಬ್ಬ ಕಿಡಿಗೇಡಿ ಖನ್ನ ಹಾಕಿದ್ದಾನೆ! ಚಂದನ್‌ ಶೆಟ್ಟಿ ಪ್ರೊಫೈಲ್ ಫೋಟೋ ಬದಲಿಗೆ ಹ್ಯಾಕರ್‌ನ ಫೋಟೋ ಒಂದಷ್ಟು ಹೊತ್ತು ಕಾಣಿಸಿಕೊಂಡಿದೆ. ಅದಕ್ಕೆ ಅನೇಕರು ಕಾಮೆಂಟ್‌ ಮಾಡಿದ್ದಾರೆ. ಇದು ಇಷ್ಟಕ್ಕೇ ನಿಂತಿಲ್ಲ. ಆ ಹ್ಯಾಕರ್‌ ಲೈವ್‌ ಕೂಡ ಬಂದಿದ್ದಾನೆ.

ಬುಧವಾರ ರಾತ್ರಿ ಚಂದನ್‌ ಶೆಟ್ಟಿ ಅವರ ಫೇಸ್‌ ಖಾತೆ ಮೂಲಕ ವ್ಯಕ್ತಿಯೊಬ್ಬ ಲೈವ್ ಬಂದಿದ್ದಾನೆ. ಅಂದಾಜು ಅರ್ಧ ಗಂಟೆಗಳ ಕಾಲ ಆತ ಇಲ್ಲಸಲ್ಲದ ಕಿತಾಪತಿ ಮಾಡಿದ್ದಾನೆ. ಆತನ ಸಹಚರನೊಬ್ಬ ಮುಖಕ್ಕೆ ಮುಸುಕು ಹಾಕಿಕೊಂಡು ಅಶ್ಲೀಲವಾಗಿ ನಡೆದುಕೊಂಡಿದ್ದಾನೆ. ಅಸಭ್ಯವಾದ ಸನ್ನೆಗಳನ್ನು ಮಾಡುವ ಮೂಲಕ ಸಾರ್ವಜನಿಕವಾಗಿ ಮುಜುಗರ ಆಗುವ ರೀತಿಯಲ್ಲಿ ವರ್ತಿಸಿದ್ದಾನೆ. ಯಾವ ಕಾರಣಕ್ಕಾಗಿ ಆತ ಹ್ಯಾಕ್‌ ಮಾಡಿದ್ದಾನೆ ಎಂಬುದು ತಿಳಿದು ಬಂದಿಲ್ಲ.

also read: 'ಕೋಲುಮಂಡೆ' ಹಾಡು ವಿವಾದ: ಚಾಮರಾಜನಗರದ ಜನರಿಗೆ ಕ್ಷಮೆ ಕೇಳಿದ ಚಂದನ್‌ ಶೆಟ್ಟಿ

ಇಷ್ಟೆಲ್ಲ ನಡೆದಿದ್ದರೂ ಚಂದನ್‌ ಶೆಟ್ಟಿ ಈ ಬಗ್ಗೆ ಎಲ್ಲಿಯೂ ಹೇಳಿಕೊಂಡಿಲ್ಲ. ಸಾಮಾನ್ಯವಾಗಿ ಈ ರೀತಿ ಹ್ಯಾಕ್‌ ಆದಾಗ ಬೇರೆ ಸೋಶಿಯಲ್‌ ಮೀಡಿಯಾ ಪ್ಲಾಟ್‌ಫಾರ್ಮ್‌ಗಳ ಮೂಲಕ ಅಭಿಮಾನಿಗಳಿಗೆ ಎಚ್ಚರಿಕೆ ನೀಡುತ್ತಾರೆ ಸೆಲೆಬ್ರಿಟಿಗಳು. ಆದರೆ ಚಂದನ್‌ ಶೆಟ್ಟಿ ಸದ್ಯಕ್ಕೆ ಮೌನವಾಗಿದ್ದಾರೆ. ಸೈಬರ್‌ ಕ್ರೈಂ ಪೊಲೀಸರಿಗೆ ಅವರು ದೂರು ನೀಡಿರುವ ಬಗ್ಗೆಯೂ ಮಾಹಿತಿ ಸಿಕ್ಕಿಲ್ಲ. ಈಗ ಅವರ ಖಾತೆ ಸರಿಯಾದಂತಿದೆ. ಪ್ರೊಫೈಲ್ ಫೋಟೋ ಜಾಗದಲ್ಲೀಗ ಮತ್ತೆ ಚಂದನ್‌ ಶೆಟ್ಟಿ ಫೋಟೋ ಕಾಣಿಸಿದೆ. ಕಿಡಿಗೇಡಿಯ ಲೈವ್‌ ವಿಡಿಯೋ ಕೂಡ ಡಿಲೀಟ್‌ ಆಗಿದೆ.

also read: ಮಲೈ ಮಹದೇಶ್ವರ ದೇವರು, ಚಂದನ್ ಶೆಟ್ಟಿ ವಿವಾದದ ಬಗ್ಗೆ ಮೌನ ಮುರಿದ ನಟ ಚೇತನ್!