ಆ ಪ್ರಿಯತಮೆ ಮನೆಗೆ 15 ವರ್ಷಗಳ ಬಳಿಕ ಭೇಟಿ ನೀಡಿದ ಕಿಚ್ಚ ಸುದೀಪ್‌! ವಿಡಿಯೋ ವೈರಲ್‌

ನಟ ಕಿಚ್ಚ ಸುದೀಪ್‌ ಏಕಾಏಕಿ ನೆನಪುಗಳಿಗೆ ಜಾರಿದ್ದಾರೆ. ಬರೋಬ್ಬರಿ 15 ವರ್ಷಗಳ ಒಂದು ಹಳೇ ಘಟನೆ ಮತ್ತು ಸ್ಥಳದ ಬಗ್ಗೆ ಈಗ ಮೆಲುಕು ಹಾಕಿದ್ದಾರೆ. ಆ ಜಾಗ ಕೇರಳದಲ್ಲಿದೆ. ಅಂದಹಾಗೆ, ಅದು 'ಮೈ ಆಟೋಗ್ರಾಫ್‌' ಸಿನಿಮಾ ಶೂಟಿಂಗ್‌ ನಡೆದ ಸ್ಥಳ. ಅಲ್ಲಿಗೆ ಸುದೀಪ್‌ ಭೇಟಿ ನೀಡಿದ್ದಾರೆ. ಒಂದೂವರೆ ದಶಕದ ಬಳಿಕ ಆ ಜಾಗಕ್ಕೆ ತೆರಳಿರುವ ಅವರು ವಿಡಿಯೋ ಮೂಲಕ ತಮ್ಮ ಭಾವನೆ ಹಂಚಿಕೊಂಡಿದ್ದಾರೆ.

2006ರಲ್ಲಿ ಬಂದ 'ಮೈ ಆಟೋಗ್ರಾಫ್‌' ಸಿನಿಮಾದಲ್ಲಿ ಶಂಕರ್‌ ಎಂಬ ಪಾತ್ರವನ್ನು ಸುದೀಪ್‌ ನಿವರ್ಹಿಸಿದ್ದರು. ಲತಿಕಾ ಎಂಬ ಕೇರಳ ಹುಡುಗಿಯ ಪಾತ್ರದಲ್ಲಿ ಮಲಯಾಳಂ ನಟಿ ಶ್ರೀದೇವಿಕಾ ಅಭಿನಯಿಸಿದ್ದರು. ಈ ಎರಡು ಪಾತ್ರಗಳ ನಡುವಿನ ಲವ್‌ ಸ್ಟೋರಿ ತುಂಬ ರೊಮ್ಯಾಂಟಿಕ್‌ ಆಗಿ ಮೂಡಿಬಂದಿತ್ತು. ಆದರೆ ಕಡೆಗೂ ಲತಿಕಾ ಮತ್ತು ಶಂಕರ್‌ ಒಂದಾಗುವುದಿಲ್ಲ. ಕೇರಳದ ಒಂದು ಪುರಾತನ ಮನೆಯನ್ನು ಲತಿಕಾ ಮನೆ ಎಂಬಂತೆ ತೋರಿಸಲಾಗಿತ್ತು. ಅದೇ ಮನೆಗೆ ಸುದೀಪ್‌ ಈಗ ಭೇಟಿ ನೀಡಿದ್ದಾರೆ.

15 ವರ್ಷಗಳ ಬಳಿಕ ಅದೇ ಶಂಕರ್‌ ಈಗ ಮತ್ತೆ ಲತಿಕಾಳನ್ನು ಹುಡುಕಿಕೊಂಡು ಬಂದಿರಬಹುದೇನೋ ಎಂಬಷ್ಟು ಭಾವನಾತ್ಮಕವಾಗಿ ಸುದೀಪ್‌ ಒಂದು ವಿಡಿಯೋ ಹಂಚಿಕೊಂಡಿದ್ದಾರೆ. ತಾವು ಅಂದು ಶೂಟಿಂಗ್‌ ಮಾಡಿದ ಸ್ಥಳಗಳಲ್ಲಿ ಈಗ ಮತ್ತೆ ಓಡಾಡಿ ಹಳೇ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ. ಮನೆಯನ್ನು ಮತ್ತೊಮ್ಮೆ ಕಣ್ತುಂಬಿಕೊಂಡಿರುವ ಸುದೀಪ್‌, 'ಇದು ತುಂಬ ದೊಡ್ಡ ಮನೆ. ಇದರ ಜೊತೆ ಸಾಕಷ್ಟು ನೆನಪುಗಳಿವೆ' ಎಂದಿದ್ದಾರೆ.

also read: ನಟ ಕಿಚ್ಚ ಸುದೀಪ್‌ ಸಿನಿಯಾನಕ್ಕೆ 25 ವರ್ಷ: 'ಫ್ಯಾಂಟಮ್' ಚಿತ್ರತಂಡದ ಜೊತೆ ದುಬೈನ ಬುರ್ಜ್ ಖಲೀಫಾದಲ್ಲಿ ಸಂಭ್ರಮ!

ಸ್ವತಃ ಸುದೀಪ್‌ ನಿರ್ದೇಶನ ಮಾಡಿದ್ದ 'ಮೈ ಆಟೋಗ್ರಾಫ್‌' ಸಿನಿಮಾ ಸೂಪರ್‌ ಹಿಟ್‌ ಆಗಿತ್ತು. ಆ ಚಿತ್ರದ ಬಗ್ಗೆ ಅವರಿಗೆ ವಿಶೇಷ ಪ್ರೀತಿ ಇದೆ. 'ಕೆಲವು ನೆನಪುಗಳಿಗೆ ಸಾಟಿಯೇ ಇಲ್ಲ. ಆಟೋಗ್ರಾಫ್‌ ಸಿನಿಮಾ ಯಾವಾಗಲೂ ನನ್ನ ಒಂದು ಭಾಗವಾಗಿರುತ್ತದೆ. ಮುಂದೇ ನಾನು ಎಷ್ಟೇ ಸಿನಿಮಾಗಳಿಗೆ ನಿರ್ದೇಶನ ಮಾಡಿದರೂ ಈ ಸಿನಿಮಾ ನನ್ನ ಪಾಲಿಗೆ ಸ್ಪೆಷಲ್‌' ಎಂದಿದ್ದಾರೆ ಸುದೀಪ್‌. ಅವರು ಹಂಚಿಕೊಂಡಿರುವ ವಿಡಿಯೋ ಸೋಶಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ.

also read: ಕಟ್ಟುಮಸ್ತಾದ ಸುದೀಪ್‌ ಫೋಟೋ ಕಂಡು ಫ್ಯಾನ್ಸ್‌ ಫಿದಾ! 'ಫ್ಯಾಂಟಮ್‌' ಚಿತ್ರಕ್ಕಾಗಿ ಕಿಚ್ಚನ ಕಸರತ್ತು!