ಬಿಗ್ ಬಾಸ್ ನಂತರ ಸಿನಿಮಾಗಳಲ್ಲಿ ಬ್ಯುಸಿ
ಕನ್ನಡ ಚಿತ್ರರಂಗದ ಬಹುಬೇಡಿಕೆಯ ಹಾಸ್ಯ ನಟರಲ್ಲಿ ಕುರಿ ಪ್ರತಾಪ್ ಕೂಡ ಒಬ್ಬರು. ಬಿಗ್ ಬಾಸ್ಗೆ ತೆರಳುವುದಕ್ಕೂ ಮುನ್ನ ಹಲವು ಚಿತ್ರಗಳಲ್ಲಿ ಅವರು ತೊಡಗಿಕೊಂಡಿದ್ದರು. ಕೆಲವು ಸಿನಿಮಾ ಕೆಲಸಗಳು ಅರ್ಧಕ್ಕೆ ಇರುವಾಗಲೇ ಅವರಿಗೆ ದೊಡ್ಮನೆಗೆ ಹೋಗುವ ಅವಕಾಶ ಬಂತು. ಆ ಪೈಕಿ 'ನಟ ಭಯಂಕರ' ಚಿತ್ರದ ಡಬ್ಬಿಂಗ್ ಅನ್ನು ತರಾತುರಿಯಲ್ಲಿ ಮುಗಿಸಿಕೊಟ್ಟರು. ಆದರೆ ಇನ್ನುಳಿದ ಚಿತ್ರಗಳನ್ನು ಬಿಗ್ ಬಾಸ್ನಿಂದ ಹೊರಬಂದ ಬಳಿಕ ಮುಂದುವರಿಸುವುದು ಅವರ ಪ್ಲ್ಯಾನ್ ಆಗಿತ್ತು. ಅದರಂತೆ ಈಗ ನಡೆದುಕೊಳ್ಳುತ್ತಿದ್ದಾರೆ. ರನ್ನರ್ ಅಪ್ ಆಗಿ ಹೊರಹೊಮ್ಮಿದ ಅವರು ಈಗ 'ಪೊಗರು' ಸಿನಿಮಾದ ಶೂಟಿಂಗ್ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಶೂಟಿಂಗ್ ಸೆಟ್ನಲ್ಲಿ ಕಾಣಿಸಿಕೊಂಡ ಕುರಿ
ಪ್ರಸ್ತುತ ಕುರಿ ಪ್ರತಾಪ್ ನಟಿಸುತ್ತಿರುವ ಸಿನಿಮಾಗಳಲ್ಲಿ 'ಪೊಗರು' ಪ್ರಮುಖವಾದದ್ದು. ಧ್ರುವ ಸರ್ಜಾ ನಟನೆಯ ಈ ಚಿತ್ರಕ್ಕೆ ನಂದಕಿಶೋರ್ ನಿರ್ದೇಶನ ಮಾಡುತ್ತಿದ್ದಾರೆ. ನಾಯಕಿಯಾಗಿ ರಶ್ಮಿಕಾ ಮಂದಣ್ಣ ನಟಿಸುತ್ತಿದ್ದರೆ, ಇನ್ನುಳಿದ ಪಾತ್ರಗಳಲ್ಲಿ ಕುರಿ ಪ್ರತಾಪ್, ಚಿಕ್ಕಣ್ಣ ಮುಂತಾದವರು ಇದ್ದಾರೆ. ಕುರಿ ಬಿಗ್ ಬಾಸ್ಗೆ ಹೋಗುವ ಮುನ್ನ ಬಹುತೇಕ ಕೆಲಸಗಳನ್ನು ಮುಗಿಸಿಕೊಟ್ಟಿದ್ದರು. ಆದರೆ ಕೆಲವು ದೃಶ್ಯಗಳ ಶೂಟಿಂಗ್ ಬಾಕಿ ಇತ್ತು. ಅದನ್ನು ಪೂರ್ಣಗೊಳಿಸಲು ಅವರೀಗ ಶೂಟಿಂಗ್ ಸೆಟ್ಗೆ ಹಾಜರಾಗಿದ್ದಾರೆ. ಅವರ ಆತ್ಮೀಯ ಗೆಳೆಯ ಚಿಕ್ಕಣ್ಣ ಕೂಡ ಸಾಥ್ ನೀಡಿದ್ದಾರೆ.
ಕುರಿ ಜೊತೆ ಚಿಕ್ಕಣ್ಣನ ಕಾಮಿಡಿ
ಚಿಕ್ಕಣ್ಣನ ಜೊತೆ ಶೂಟಿಂಗ್ ವೇಳೆ ಕ್ಲಿಕ್ಕಿಸಿಕೊಂಡ ಫೋಟೋವನ್ನು ಕುರಿ ಪ್ರತಾಪ್ ಶೇರ್ ಮಾಡಿಕೊಂಡಿದ್ದಾರೆ. ಅದನ್ನು ಸಾವಿರಾರು ಅಭಿಮಾನಿಗಳು ಲೈಕ್ ಮಾಡಿದ್ದಾರೆ. 'ಜೋಡೆತ್ತುಗಳು' ಎಂಬ ಕಾಮೆಂಟ್ ಕೂಡ ಬಂದಿದೆ. ಅಂದಹಾಗೆ, 'ಪೊಗರು' ಚಿತ್ರದ ಒಂದು ಹಾಡಿನಲ್ಲಿ ಕುರಿ ಮತ್ತು ಚಿಕ್ಕಣ್ಣ ಕಾಣಿಸಿಕೊಳ್ಳುತ್ತಿದ್ದಾರೆ. ಅದರ ಶೂಟಿಂಗ್ ಬಾಕಿ ಉಳಿದಿದ್ದು, ಅದನ್ನು ಈಗ ಪೂರ್ಣಗೊಳಿಸುವುದರ ಜೊತೆಗೆ ಕೆಲವು ದೃಶ್ಯಗಳನ್ನೂ ಸೆರೆ ಹಿಡಿಯಲಾಗುತ್ತಿದೆ. ಡಬ್ಬಿಂಗ್ ಆಗುವುದು ಬಾಕಿ ಇದೆ. ಇಬ್ಬರ ಕಾಂಬಿನೇಷನ್ ಹೇಗೆ ಮೂಡಿಬಂದಿದೆ ಎಂಬುದನ್ನು ತಿಳಿದುಕೊಳ್ಳುವ ಹಂಬಲ ಅಭಿಮಾನಿಗಳಲ್ಲಿ ಹೆಚ್ಚಾಗಿದೆ.
ನಂದಕಿಶೋರ್ ಜೊತೆ ಬಹುಕಾಲದ ಗೆಳೆತನ
ಕುರಿ ಪ್ರತಾಪ್ ಅವರ ಈ ಹಾಡು ಮತ್ತು ದೃಶ್ಯಗಳ ಶೂಟಿಂಗ್ಗಾಗಿ ಬಿಗ್ ಬಾಸ್ ಮುಗಿಯುವವರೆಗೂ 'ಪೊಗರು' ಚಿತ್ರದ ನಿರ್ದೇಶಕ ನಂದಕಿಶೋರ್ ಕಾದಿದ್ದರು. ಬಿಗ್ ಬಾಸ್ ಬಳಿಕ ಸಣ್ಣ ಬ್ರೇಕ್ ತೆಗೆದುಕೊಂಡು ಸಿನಿಮಾ ಕೆಲಸಗಳನ್ನು ಮುಂದುವರಿಸಿದ್ದಾರೆ. 'ಕುರಿ ಪ್ರತಾಪ್ ನನಗೆ ಇಂದು ನಿನ್ನೆಯ ಸ್ನೇಹಿತ ಅಲ್ಲ. ನಮ್ಮ ಫ್ರೆಂಡ್ಶಿಪ್ ಹತ್ತು ವರ್ಷಕ್ಕಿಂತಲೂ ಮುಂಚಿನದ್ದು. ಅವರು ನಮ್ಮ ಫ್ಯಾಮಿಲಿ ಸದಸ್ಯ ಇದ್ದಂತೆ. ಅವರ ಪ್ರತಿಭೆ ಏನು ಎಂಬುದು ನನಗೆ ಗೊತ್ತು. ಅದಕ್ಕೆ ಸೂಕ್ತವಾದ ಪಾತ್ರವೇ 'ಪೊಗರು' ಸಿನಿಮಾದಲ್ಲಿ ಅವರಿಗೆ ನೀಡಿದ್ದೇವೆ' ಎಂದು ಕುರಿ ಪ್ರತಾಪ್ ಬಗ್ಗೆ ಮಾತನಾಡಿದ್ದಾರೆ ನಿರ್ದೇಶಕ ನಂದಕಿಶೋರ್.