ಅಮೆರಿಕನ್ ಗಾಯಕಿ ಸಂಸ್ಕೃತದಲ್ಲಿ ಮಾಡಿದ ಟ್ವೀಟ್‌ಗೆ ತಲೆಕೆಡಿಸಿಕೊಂಡ ಅಭಿಮಾನಿಗಳು

ಸಂಸ್ಕೃತವನ್ನು 'ದೇವಭಾಷೆ' ಎಂದು ಕರೆಯುವ ಪರಿಪಾಠವಿದೆ. ಭಾರತೀಯ ಸಂಸ್ಕೃತಿ, ಸಂಪ್ರದಾಯ, ಆಚಾರ-ವಿಚಾರಗಳು ಜಗತ್ತಿಗೆ ಮಾದರಿ. ಈ ಸಂಸ್ಕೃತಿಯನ್ನು ಇತರ ದೇಶಗಳು ಅನುಸರಿಸುತ್ತಿವೆ. ಈ ನಿಟ್ಟಿನಲ್ಲಿ ಅಮೆರಿಕನ್ ಗಾಯಕಿ ಲೇಡಿ ಗಾಗಾ ಸಂಸ್ಕೃತದಲ್ಲಿ ಟ್ವೀಟ್ ಮಾಡಿ ದೊಡ್ಡ ಸುದ್ದಿಯಾಗಿದ್ದಾರೆ. ಹಾಗಿದ್ದರೆ ಏನದು?

ಲೇಡಿ ಗಾಗ ಸಂಸ್ಕೃತದಲ್ಲಿ ಮಾಡಿದ ಟ್ವೀಟ್ ಏನು?
ಇವರು ಇತ್ತೀಚೆಗೆ ಮಾಡಿದ ಟ್ವೀಟ್ ಸಿಕ್ಕಾಪಟ್ಟೆ ವೈರಲ್ ಆಗಿದೆ. ಸಂಸ್ಕೃತದಲ್ಲಿ 'ಲೋಕಾಃ ಸಮಸ್ತಾಃ ಸುಖಿನೋ ಭವಂತು' ಎಂದು ಟ್ವೀಟ್ ಮಾಡಿದ್ದಾರೆ. ಅಮೆರಿಕನ್ ಗಾಯಕಿ ಟ್ವೀಟ್ ಕಂಡು ಹಲವರು ಇದರ ಅರ್ಥ ಏನು ಎಂದು ತಲೆಕೆಡಿಸಿಕೊಂಡಿದ್ದರು. ಇವರ ಭಾರತೀಯ ಅಭಿಮಾನಿಗಳು ಈ ಟ್ವೀಟ್ ನೋಡಿ ಖುಷಿಪಟ್ಟಿದ್ದರೆ, ಪರದೇಶದವರು ತುಂಬ ಗೊಂದಲಕ್ಕೀಡಾಗಿದ್ದರು. ಈವರೆಗೆ 1 ಲಕ್ಷಕ್ಕೂ ಅಧಿಕ ಮಂದಿ ಈ ಟ್ವೀಟ್ ಇಷ್ಟಪಟ್ಟಿದ್ದಾರೆ. 31 ಸಾವಿರಕ್ಕೂ ಅಧಿಕ ಮಂದಿ ಇದನ್ನು ರಿಟ್ವೀಟ್ ಮಾಡಿದ್ದಾರೆ. 8 ಸಾವಿರ ಜನರು ಕಾಮೆಂಟ್ ಮಾಡಿದ್ದಾರೆ. ಅವರಲ್ಲಿ ಕೆಲವರು 'ಜೈ ಶ್ರೀರಾಮ್' ಎಂದು ಕಾಮೆಂಟ್ ಮಾಡಿದ್ದಾರೆ.

ಲೇಡಿ ಗಾಗ ಟ್ವೀಟ್ ಅರ್ಥವೇನು?
"ಸ್ವಸ್ತಿ ಪ್ರಜಾಭ್ಯಾಂ ಪರಿಪಾಲಯಂತಾಂ, ನ್ಯಾಯೇನ ಮಾರ್ಗೇನ ಮಹೀನ್ ಮಹೀಶಾಃ, ಗೋಭ್ರಾಹ್ಮಣೇಭ್ಯಃ, ಶುಭಮಸ್ತು ನಿತ್ಯಂ, ಲೋಕಾಃ ಸಮಸ್ತಾಃ ಸುಖಿನೋ ಭವಂತು" ಎಂಬುದು ಪೂರ್ಣ ಸಂಸ್ಕೃತ ಸುಭಾಷಿತ. ಸುಭಾಷಿತ. ಯಾರು ಪ್ರಜೆಗಳನ್ನು ಚೆನ್ನಾಗಿ ನೊಡಿಕೊಳ್ಳುತ್ತಾರೋ, ನ್ಯಾಯ ಮಾರ್ಗದಲ್ಲಿ ನಡೆಯುತ್ತಾರೋ, ಗೋವು, ಬ್ರಾಹ್ಮಣರನ್ನು ಸುಖವಾಗಿ ನೋಡಿಕೊಳ್ಳುತ್ತಾರೋ ಅವರೆಲ್ಲರೂ ಸುಖವಾಗಿರಲಿ ಎಂಬುದು ಈ ಸುಭಾಷಿತದ ಅರ್ಥ. ಲೋಕಾಃ ಸಮಸ್ತಾಃ ಸುಖಿನೋ ಭವಂತು ಅಂದರೆ ಲೋಕದಲ್ಲಿರುವ ಎಲ್ಲರೂ ಸುಖವಾಗಿರಲಿ ಎಂದರ್ಥ. ಈ ಅರ್ಥದಲ್ಲಿಯೇ ಲೇಡಿ ಗಾಗಾ ಟ್ವೀಟ್ ಮಾಡಿದ್ದಾರೆ.

ಯಾರು ಈ ಲೇಡಿ ಗಾಗಾ?
ಲೇಡಿ ಗಾಗಾ ಪ್ರಖ್ಯಾತ ಅಮೆರಿಕನ್ ಗಾಯಕಿ ಮತ್ತು ಗೀತರಚನೆಕಾರ್ತಿ, ನಟಿಯೂ ಹೌದು. 2016ರ ಜನವರಿವರೆಗೆ 27 ಮಿಲಿಯನ್ ಆಲ್ಬಮ್ಸ್ ಮತ್ತು 146 ಮಿಲಿಯನ್ ಮ್ಯೂಸಿಕ್ ಸಿಂಗಲ್ಸ್ ಮಾರಾಟ ಮಾಡಿ, ವಿಶ್ವದ ಬೆಸ್ಟ್‌ ಸೆಲ್ಲಿಂಗ್ ಮ್ಯೂಸಿಕ್ ಆರ್ಟಿಸ್ಟ್‌ಗಳಲ್ಲಿ ಒಬ್ಬಳು ಎಂಬ ಖ್ಯಾತಿ ಪಡೆದಿದ್ದಾರೆ. ಕೆಲವು ಗಿನ್ನಿಸ್ ಅವಾರ್ಡ್, ಗ್ರಾಮಿ ಪ್ರಸಸ್ತಿ ಪಡೆದಿದ್ದಾರೆ. 'ದಿ ಫೇಮ್, ಬಾರ್ನ್ ದಿಸ್ ವೇ, ಆರ್ಟ್‌ಪಾಪ್, ಚೀಕ್ ಟು ಚೀಕ್ಮ ಜಾನ್ನೆ' ಅವರ ಪ್ರಖ್ಯಾತ ಮ್ಯೂಸಿಕ್ ಆಲ್ಬಮ್‌ಗಳು. 'ದಿ ಜೆನ್ ಆಫ್ ಬೆನ್ನೆಟ್, ಕಾಟಿ ಪಾರ್ಟಿ, ಮಚೆಟೆ ಕಿಲ್ಸ್, ಸಿನ್ ಸಿಟಿ, ಎ ಸ್ಟಾರ್ ಈಜ್ ಬಾರ್ನ್' ಮುಂತಾದ ಸಿನಿಮಾಗಳಲ್ಲಿ ಲೇಡಿ ಗಾಗಾ ಕೆಲಸ ಮಾಡಿದ್ದಾರೆ.

ಪರಭಾಷಾ ಸೆಲೆಬ್ರಿಟಿಗಳ ಸಂಸ್ಕೃತ ಪ್ರೇಮ
ಪರಭಾಷಿಗರು ಸಂಸ್ಕೃತವನ್ನು ತುಂಬ ಇಷ್ಟಪಡುತ್ತಾರೆ. ಸಂಸ್ಕೃತ ಶ್ಲೋಕಗಳ ಅರ್ಥ ತಿಳಿದುಕೊಂಡು ಅದನ್ನು ಅವರ ಜೀವನದಲ್ಲಿ ಅಳವಡಿಸಿಕೊಳ್ಳಲು ಬಯಸುತ್ತಾರೆ. ಪರಭಾಷಾ ಗಾಯಕಿ ರೆಹನ್ನಾ, ಏಂಜಲಿನಾ ಭಗವದ್ಗೀತೆಯ ಶ್ಲೋಕವೊಂದನ್ನು ಟ್ಯಾಟೂ ಆಗಿ ಅವರ ಕೈಮೇಲೆ ಹಾಕಿಸಿಕೊಂಡಿದ್ದರು. ಅಷ್ಟೇ ಅಲ್ಲದೆ ಯೋಗವನ್ನು, ಸನಾತನ ಸಂಸ್ಕೃತಿಯನ್ನು ಹಾಲಿವುಡ್ ಸೆಲೆಬ್ರಿಟಿಗಳು ಅನುಸರಿಸುತ್ತಿದ್ದಾರೆ. ಗಾಯಕಿ ಮಡೋನ್ನ ಹಿಂದೂ ಪ್ರಾರ್ಥನೆಯಾದ 'ಶಾಂತಿ ಅಷ್ಟಂಗಿ'ಯನ್ನು ಈ ಹಿಂದೆ ಹಾಡಿದ್ದರು.

ಬಿದ್ದು ಸುದ್ದಿಯಾಗಿದ್ದ ಲೇಡಿ ಗಾಗ
ಕೆಲದಿನಗಳ ಹಿಂದೆ ಅಮೆರಿಕದ ಲಾಸ್ ವೆಗಾಸ್‌ನಲ್ಲಿ ವೇದಿಕೆಯಲ್ಲಿ ಅಭಿಮಾನಿಯೊಂದಿಗೆ ಗಾಗಾ ಡಾನ್ಸ್ ಮಾಡುತ್ತಿರುವಾಗ ಆತ ಅವರನ್ನು ಎತ್ತಿಕೊಂಡಿದ್ದ, ಜೊತೆಗೆ ಬ್ಯಾಲೆನ್ಸ್ ತಪ್ಪಿ ಲೇಡಿ ಗಾಗಾ ಅವರ ಕೈಬಿಟ್ಟಿದ್ದನು. ಫ್ಲೋರ್‌ನಿಂದ ಇವರಿಬ್ಬರು ಕೆಳಗೆ ಬಿದ್ದಿದ್ದರು. ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು.