'ವಿಚಾರಣೆಯಲ್ಲಿ ರಾಗಿಣಿ ಬಗ್ಗೆ ನನಗೇನೂ ಕೇಳಿಲ್ಲ'- ನಟ 'ಲೂಸ್ ಮಾದ' ಯೋಗಿ ಹೇಳಿಕೆ!

ಡ್ರಗ್ ಮಾಫಿಯಾ ಜಾಲದ ಜೊತೆಗೆ ಸ್ಯಾಂಡಲ್‌ವುಡ್‌ ನಂಟಿರುವ ಕುರಿತು ಈಗಾಗಲೇ ಸಿಸಿಬಿ ಅಧಿಕಾರಿಗಳು ಎಲ್ಲ ಕೋನದಲ್ಲೂ ತನಿಖೆ ಆರಂಭಿಸಿದ್ದಾರೆ. ಇಬ್ಬರು ನಟಿಯರ ಜೈಲು ಪಾಲಾಗಿದ್ದರೆ, ಒಂದಷ್ಟು ಕಲಾವಿದರಿಗೆ ನೋಟಿಸ್‌ ನೀಡಿ ವಿಚಾರಣೆಗೆ ಕರೆಯಿಸಿಕೊಳ್ಳುತ್ತಿದ್ದಾರೆ. ಈಚೆಗೆ ನಟ 'ಲೂಸ್ ಮಾದ' ಯೋಗಿ ಅವರಿಗೂ ಕೂಡ ನೋಟಿಸ್ ನೀಡಿ, ವಿಚಾರಣೆ ಮಾಡಲಾಗಿದೆ. ಆ ಕುರಿತು ಸ್ವತಃ ಯೋಗಿ ಮಾಧ್ಯಮಗಳ ಎದುರು ಮಾತನಾಡಿದ್ದಾರೆ. ಇದೇ ವೇಳೆ, ವಿಚಾರಣೆಯಲ್ಲಿ ನಟಿ ರಾಗಿಣಿ ಬಗ್ಗೆ ನನಗೆ ಯಾವುದೇ ಪ್ರಶ್ನೆಗಳನ್ನು ಕೇಳಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಈ ಕುರಿತು ಮಾತನಾಡಿರುವ ಯೋಗಿ, 'ನನ್ನ ವೈಯಕ್ತಿಕ ಮನವಿ ಏನೆಂದರೆ, ನಾನು ಮತ್ತು ರಾಗಿಣಿ 2013ರಲ್ಲಿ ಒಂದು ಸಿನಿಮಾ ಮಾಡಿದ್ದೆವು, ಅದು ರಿಲೀಸ್ ಆಗಿತ್ತು. ಅಷ್ಟೇ ನಮ್ಮ ಸಂಬಂಧ. ಅವತ್ತಿನಿಂದ ಇವತ್ತಿನವರೆಗೂ ನಮ್ಮಿಬ್ಬರ ಮಧ್ಯೆ ಒಂದು ಫೋನ್ ಕಾಲ್‌ ಆಗಲಿ, ಮಸೇಜ್ ಆಗಲಿ ಶೇರ್ ಆಗಿಲ್ಲ. ದಯವಿಟ್ಟು ಅದನ್ನೇ ಹೈಲೈಟ್ ಹಾಕಬೇಡಿ. ನನಗೆ ಫ್ಯಾಮಿಲಿ ಇದೆ. ಒಂದೂವರೆ ವರ್ಷದ ಮಗು ಇದೆ. ಕುಟುಂಬ ಡಿಸ್ಟರ್ಬ್‌ ಆಗಬಾರದು ಎಂಬ ದೃಷ್ಟಿಯಿಂದ ನಾನು ಮನವಿ ಮಾಡಿಕೊಳ್ಳುತ್ತಿದ್ದೇನೆ. ನನ್ನ ವಿಚಾರಣೆಯಲ್ಲಿ ರಾಗಿಣಿ ಬಗ್ಗೆ ಯಾವುದೇ ಪ್ರಸ್ತಾಪ ಆಗಿಲ್ಲ. ಐಂದ್ರಿತಾ, ದಿಗಂತ್ ಬಗ್ಗೆಯೂ ಕೂಡ ಕೇಳಿಲ್ಲ' ಎಂದು ತಿಳಿಸಿದ್ದಾರೆ.

ನಾನು ಜಾಸ್ತಿ ಏನೂ ಹೇಳುವಂತಿಲ್ಲ!
ಅಧಿಕಾರಿಗಳು ವಿಚಾರಣೆ ನಡೆಸಿದ್ದರ ಬಗ್ಗೆ ಮಾಹಿತಿ ನೀಡಿದ ಯೋಗಿ, 'ಈ ಬಗ್ಗೆ ನಾನು ಜಾಸ್ತಿ ಏನು ಹೇಳೋಕೆ ಆಗುವುದಿಲ್ಲ. ನನ್ನ ಕಡೆಯಿಂದ ಏನಾದರೂ ಮಾಹಿತಿ ಸಿಗಬಹುದಾ ಎಂಬ ಕಾರಣಕ್ಕೆ ನನ್ನನ್ನು ಕರೆದಿದ್ದಾರೆ ಎಂದು ನಾನು ಅಂದುಕೊಂಡಿದ್ದೇನೆ, ವಿಚಾರಣೆಯಲ್ಲಿ ಅವರು ಕೂಡ ಅದೇ ಥರ ಕೇಳಿದರು. ನನಗೆ ಜಾಸ್ತಿ ಏನು ಪ್ರಶ್ನೆ ಮಾಡಿಲ್ಲ. ರಾಗಿಣಿಗೆ ಸಂಬಂಧಪಟ್ಟಂತೆ ನನಗೆ ಯಾವುದೇ ಪ್ರಶ್ನೆಗಳನ್ನು ಕೇಳಿಲ್ಲ. ನನ್ನ ಒಬ್ಬನಿಗೆ ಅಲ್ಲ, ಇನ್ನೂ 15-20 ಜನರಿಗೆ ನೋಟಿಸ್‌ ಹೋಗಿದೆ ಎಂಬ ಮಾಹಿತಿ ಇದೆ. ನಾನಂತೂ ಯಾವುದೇ ಪಾರ್ಟಿಯಲ್ಲೂ ಕಾಣಿಸಿಕೊಂಡಿಲ್ಲ. ಇದನ್ನೇ ನಾನು ಅವರಿಗೆ ಹೇಳಿರುವುದು. 2011-12ರ ನಂತರ ನಾನೆಲ್ಲೂ ಹೊರಗೆ ಹೋಗಿಲ್ಲ. ನನಗೆ ಕಂಡಂತೆ ಯಾವುದೇ ಪಾರ್ಟಿಗಳಲ್ಲೂ ಡ್ರಗ್ಸ್‌ ನೋಡಿಲ್ಲ. ನನ್ನ ಗಮನಕ್ಕೂ ಅದು ಬಂದಿಲ್ಲ. ಈ ಪ್ರಕರಣದಲ್ಲಿ ಆರೋಪಿಗಳಾಗಿರುವವರು ಕೂಡ ನನಗೆ ಯಾರೂ ಪರಿಚಯ ಇಲ್ಲ' ಎಂದು ಸ್ಪಷ್ಟಪಡಿಸಿದ್ದಾರೆ.

ಸಂದರ್ಶನದಲ್ಲಿ ಹೇಳಿದ್ದ ಮಾತೇ ಮುಳುವಾಯಿತೇ?
ಕೆಲ ತಿಂಗಳ ಹಿಂದೆ ಸಂದರ್ಶನವೊಂದರಲ್ಲಿ, 'ನಾನು ಮಾಡಬಾರದ ಚಟಗಳನ್ನೆಲ್ಲ ಮಾಡಿಬಿಟ್ಟೆ' ಎಂದು ಯೋಗಿ ಹೇಳಿಕೊಂಡಿದ್ದರು. ಆ ಬಗ್ಗೆಯೂ ಈಗ ಸ್ಪಷ್ಟನೆ ನೀಡಿದ್ದಾರೆ. 'ಸಂದರ್ಶನವೊಂದರಲ್ಲಿ ನಾನು ಈ ಹಿಂದೆ ಒಂದಷ್ಟು ವಿಷಯಗಳನ್ನು ಮಾತನಾಡಿದ್ದೆ. ಅದರಲ್ಲಿ, ಒಂದು ಸಮಯದಲ್ಲಿ ನಾನು ಮಾಡಬಾರದ ಚಟಗಳನ್ನೆಲ್ಲ ಮಾಡಿದ್ದೆ ಎಂದು ಹೇಳಿದ್ದೆ. ನಾನು ಮೊದಲು ಸಿಕ್ಕಾಪಟ್ಟೆ ಕುಡಿಯುತ್ತಿದ್ದೆ. ಸಿಗರೇಟ್, ಗುಟ್ಕಾ ಹಾಕುತ್ತಿದ್ದೆ. ಅದು ಬಿಟ್ಟೆರೆ ಬೇರೆ ಏನೂ ಚಟಗಳಿರಲಿಲ್ಲ. ಅದನ್ನೇ ಆ ರೀತಿ ಹೇಳಿದ್ದೆ. ಬಹುಶಃ ಆ ಹೇಳಿಕೆಯಿಂದಾಗಿಯೇ ಹೀಗೆ ನನ್ನನ್ನು ಕರೆದಿರಬಹುದು. ಮತ್ತೆ ಬನ್ನಿ ಎಂದು ಅವರು ಹೇಳಿಲ್ಲ. ಏನಾದರೂ ಮಾಹಿತಿ ಬೇಕೆಂದಾಗ ಕರೆಯುತ್ತೇವೆ. ಆಗ ಬರಬೇಕು ಎಂದಿದ್ದಾರೆ' ಎನ್ನುತ್ತಾರೆ ಯೋಗಿ.

ಡ್ರಗ್ ಮಾಫಿಯಾ ಕುರಿತು ಮತ್ತೊಮ್ಮೆ ಸ್ಫೋಟಕ ಹೇಳಿಕೆ ನೀಡಿದ ಇಂದ್ರಜಿತ್ ಲಂಕೇಶ್‌!

ನನಗೆ ಯಾವುದೇ ಭಯ ಇಲ್ಲ!
'ಅವರು ಕೇಳಿದ ಪ್ರಶ್ನೆಗಳಿಗೆಲ್ಲ ನಾನು ಸರಿಯಾಗಿಯೇ ಉತ್ತರ ನೀಡಿದ್ದೇನೆ. ನನಗೆ ಏನೂ ಭಯ ಇಲ್ಲ. ನನ್ನ ಪಾಸ್‌ಪೋರ್ಟ್‌ ಅವಧಿ 2018ರಲ್ಲಿ ಮುಕ್ತಾಯವಾಗಿದೆ. ಅದನ್ನು ಕೂಡ ನಿನ್ನೆ ಅಧಿಕಾರಿಗಳೇ ಗಮನಕ್ಕೆ ತಂದರು. ನಾನು ಈಚೆಗೆ ವಿದೇಶಕ್ಕೆ ಹೋಗಿಲ್ಲ. ಈ ಹಿಂದೆ ರಾಜ್‌ ಕಪ್ ಸಂದರ್ಭದಲ್ಲಿ ಶ್ರೀಲಂಕಾಕ್ಕೆ ಹೋಗಿದ್ದೆ. ಮ್ಯಾಚ್ ಮುಗಿಸಿಕೊಂಡು ಸೀದಾ ಮನೆಗೆ ಬಂದಿದ್ದೆ. ನಾನು ತಪ್ಪು ಮಾಡಿದ್ರೆ ಇಷ್ಟೊಂದು ಧೈರ್ಯವಾಗಿ ಮಾಧ್ಯಮಗಳ ಮುಂದೆ ಮಾತನಾಡುತ್ತಿರಲಿಲ್ಲ' ಎಂದಿದ್ದಾರೆ ಯೋಗಿ.