'ಲವ್ ಮಾಕ್‌ಟೇಲ್‌' ತೆಲುಗು ರಿಮೇಕ್‌ಗೆ ಟೈಟಲ್‌ ಫಿಕ್ಸ್! ಶೂಟಿಂಗ್‌ಗೆ ನಾಗಶೇಖರ್‌ ಪ್ಲ್ಯಾನ್‌

ನಟ 'ಡಾರ್ಲಿಂಗ್' ಕೃಷ್ಣ ಚೊಚ್ಚಲ ಬಾರಿಗೆ ನಿರ್ದೇಶನ ಮಾಡಿದ್ದ ಸಿನಿಮಾ 'ಲವ್ ಮಾಕ್‌ಟೇಲ್‌'. ಈ ವರ್ಷದ ಆರಂಭದಲ್ಲೇ ತೆರೆಗೆ ಬಂದ ಈ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಒಳ್ಳೆಯ ಕಮಾಯಿ ಮಾಡಿತು. ಪ್ರೇಕ್ಷಕರಿಂದಲೂ ಉತ್ತಮ ಮೆಚ್ಚುಗೆ ಪಡೆದುಕೊಂಡಿತು. ಒಂದು ಬ್ರೇಕ್‌ಗಾಗಿ ಕಾಯುತ್ತಿದ್ದ ನಟ ಕೃಷ್ಣಗೆ ಈ ಸಿನಿಮಾದಿಂದ ಉತ್ತಮ ಯಶಸ್ಸು ಸಿಕ್ಕಿತು. ಈ ಸಿನಿಮಾವನ್ನು ತೆಲುಗಿಗೆ ರಿಮೇಕ್ ಮಾಡಲಾಗುತ್ತಿದೆ ಎಂಬ ಮಾಹಿತಿ ಕೆಲ ದಿನಗಳ ಹಿಂದಷ್ಟೇ ಗೊತ್ತಾಗಿತ್ತು. ಕನ್ನಡದ ನಿರ್ದೇಶಕ ನಾಗಶೇಖರ್, ರಿಮೇಕ್ ಮಾಡುವುದಕ್ಕೆ ಮುಂದಾಗಿದ್ದಾರೆ. ಇದೀಗ ತೆಲುಗು ವರ್ಷನ್‌ಗೆ ಟೈಟಲ್‌ ಕೂಡ ಫಿಕ್ಸ್ ಆಗಿದೆ.

'ಲವ್‌ ಮಾಕ್‌ಟೇಲ್‌' ತೆಲುಗು ರಿಮೇಕ್‌ಗೆ 'ಗುರ್ತುಂದ ಶೀತಾಕಾಲಂ' ಎಂದು ಟೈಟಲ್‌ ಇಡಲಾಗಿದೆ. ಈಚೆಗಷ್ಟೇ 'ಉಮಾ ಮಹೇಶ್ವರ ಉಗ್ರರೂಪಸ್ಯ' ಚಿತ್ರದಲ್ಲಿ ನಟಿಸಿದ್ದ ಸತ್ಯದೇವ್‌ ಈ ರಿಮೇಕ್‌ನಲ್ಲಿ ಬಣ್ಣ ಹಚ್ಚಲಿದ್ದಾರೆ. ಅವರಿಗೆ ನಾಯಕಿಯಾಗಿ ಖ್ಯಾತ ನಟಿ ತಮನ್ನಾ ಕಾಣಿಸಿಕೊಳ್ಳಲಿದ್ದು, ಕನ್ನಡದ ನಟಿ ಕಾವ್ಯಾ ಶೆಟ್ಟಿ ಕೂಡ ಈ ಈ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದೆ. ಅವರು 'ಲವ್ ಮಾಕ್‌ಟೇಲ್‌'ನಲ್ಲಿ ಅಮೃತಾ ಅಯ್ಯಂಗಾರ್‌ ಮಾಡಿದ್ದ ಪಾತ್ರವನ್ನು ಮಾಡುವ ಸಾಧ್ಯತೆಗಳಿವೆ.

ನಿರ್ದೇಶನದ ಜೊತೆಗೆ ಈ ಸಿನಿಮಾದ ನಿರ್ಮಾಣದಲ್ಲೂ ಭಾಗಿಯಾಗಿದ್ದಾರೆ ನಾಗಶೇಖರ್‌. ಭವಾನಿ ರವಿ ಎಂಬುವವರು ಕೂಡ 'ಗುರ್ತುಂದ ಶೀತಾಕಾಲಂ'ಗೆ ಬಂಡವಾಳ ಹೂಡುತ್ತಿದ್ದಾರೆ. ಕಾಲ ಭೈರವ ಸಂಗೀತ ನಿರ್ದೇಶನ ಮಾಡುತ್ತಿದ್ದು, ಸತ್ಯ ಹೆಗಡೆ ಛಾಯಾಗ್ರಹಣದ ಹೊಣೆ ಹೊತ್ತುಕೊಂಡಿದ್ದಾರೆ. ಶೀಘ್ರದಲ್ಲೇ ಚಿತ್ರೀಕರಣ ಶುರು ಮಾಡುವುದಕ್ಕೆ ಸಕಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ.

ಡಾರ್ಲಿಂಗ್‌ ಕೃಷ್ಣ ಜೊತೆ ನಟಿಸಲು ರಾಧಿಕಾ ಕುಮಾರಸ್ವಾಮಿ ನೋ ಎಂದಿದ್ದಕ್ಕೆ ಸಿಕ್ತು ಕಾರಣ!

ಇತ್ತ ಪಾರ್ಟ್ 1 ಯಶಸ್ಸು ಕಂಡಿದ್ದರಿಂದ ನಿರ್ದೇಶಕ ಕೃಷ್ಣ, ಪಾರ್ಟ್‌ 2ಗೂ ತಯಾರಿ ನಡೆಸಿದ್ದಾರೆ. ಈಚೆಗಷ್ಟೇ ಅದರ ಫಸ್ಟ್‌ಲುಕ್ ಕೂಡ ರಿಲೀಸ್ ಮಾಡಿದ್ದರು. ಮೊದಲ ಪಾರ್ಟ್‌ನಲ್ಲಿ ಲವರ್‌ ಬಾಯ್‌ ಆಗಿದ್ದ ಡಾರ್ಲಿಂಗ್‌ ಕೃಷ್ಣ, 'ಲವ್‌ ಮಾಕ್‌ಟೇಲ್‌ 2'ನಲ್ಲಿ ಫಸ್ಟ್‌ಲುಕ್‌ ಪೋಸ್ಟರ್‌ನಲ್ಲಿ ಗಡ್ಡಧಾರಿಯಾಗಿ ಪೋಸ್‌ ನೀಡಿದ್ದಾರೆ. ಅತ್ತ ನಾಗಶೇಖರ್ ಕೂಡ 'srikrishna@gmail.com' ಚಿತ್ರವನ್ನು ಕೃಷ್ಣ ಜೊತೆ ಘೋಷಣೆ ಮಾಡಿದ್ದಾರೆ. ಇದರಲ್ಲಿ ಕೃಷ್ಣಗೆ 'ಟಗರು' ಖ್ಯಾತಿಯ ಭಾವನಾ ಮೆನನ್‌ ಜೊತೆಯಾಗಲಿದ್ದಾರೆ. ಕನ್ನಡ-ಮಲಯಾಳಂನಲ್ಲಿ ಈ ಸಿನಿಮಾ ಸಿದ್ಧಗೊಳ್ಳಲಿದೆ. ಸಂದೇಶ್‌ ನಾಗರಾಜ್‌ 'srikrishna@gmail.com' ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದಾರೆ.

'ಟಗರು' ಭಾವನಾ ಜೊತೆ ಮಾಲಿವುಡ್‌ಗೆ ಎಂಟ್ರಿ ಕೊಟ್ಟ ನಟ 'ಡಾರ್ಲಿಂಗ್' ಕೃಷ್ಣ!