ಚಿರು-ಮೇಘನಾ ಕಂದನನ್ನು ನೋಡಲು ಕೇರಳದಿಂದ ಬಂದ ಮಲಯಾಳಂ 'ಸ್ಟಾರ್' ದಂಪತಿ!

ನಟಿ ಮೇಘನಾ ರಾಜ್ ಸರ್ಜಾ ಅವರಿಗೆ ಗುರುವಾರ (ಅ.22) ಗಂಡು ಮಗು ಜನಿಸಿತ್ತು. ಚಿರಂಜೀವಿ ಸರ್ಜಾ ಅವರ ಅಗಲಿಕೆಯಿಂದ ತೀವ್ರ ದುಃಖದಲ್ಲಿದ್ದ ಸರ್ಜಾ ಕುಟುಂಬಕ್ಕೆ ಈ ಮಗುವಿನ ಜನನ ಸಂತಸ ಉಂಟು ಮಾಡಿತ್ತು. ಇದೀಗ ತಾಯಿ-ಮಗುವನ್ನು ನೋಡಲು ಭಾನುವಾರ (ಅ.25) ದೂರದ ಕೊಚ್ಚಿಯಿಂದ ಮಲಯಾಳಂ ಚಿತ್ರರಂಗದ 'ಸ್ಟಾರ್‌' ದಂಪತಿಯಾದ ನಜ್ರಿಯಾ ನಜೀಮ್-ಫಹಾದ್ ಫಾಸಿಲ್ ಬೆಂಗಳೂರಿಗೆ ಆಗಮಿಸಿದ್ದಾರೆ.

ನಟಿ ಮೇಘನಾ ಕನ್ನಡದ ಜೊತೆಗೆ ಮಲಯಾಳಂ ಚಿತ್ರರಂಗದಲ್ಲೂ ಗುರುತಿಸಿಕೊಂಡಿದ್ದಾರೆ. ಅಲ್ಲಿಯೂ ಅವರಿಗೆ ಸಾಕಷ್ಟು ಜನ ಸ್ನೇಹಿತರಿದ್ದಾರೆ. ಹಾಗೆಯೇ ನಟಿ ನಜ್ರಿಯಾ ಜೊತೆಗೆ ಮೇಘನಾಗೆ ಉತ್ತಮ ಒಡನಾಟ ಇದೆ. 'ಮ್ಯಾಡ್ ಡ್ಯಾಡ್‌' ಅನ್ನೋ ಮಲಯಾಳಂ ಸಿನಿಮಾದಲ್ಲಿ ಇಬ್ಬರು ಒಟ್ಟಿಗೆ ನಟಿಸಿದ್ದರು. ಈ ಹಿಂದೆ ಮೇಘನಾ-ಚಿರು ಮದುವೆ ಸಮಯದಲ್ಲೂ ನಜ್ರಿಯಾ ಹಾಜರಿದ್ದರು. ಮಗು ಜನಿಸಿದ ದಿನವೇ 'ಚಿರು ಮತ್ತೆ ಬಂದ್ರು' ಅಂತ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೆದುಕೊಂಡಿದ್ದರು ನಜ್ರಿಯಾ. ಇದೀಗ ಜೂನಿಯರ್ ಚಿರುವನ್ನು ನೋಡಲು ಪತಿ, ಮಲಯಾಳಂ 'ಸೂಪರ್ ಸ್ಟಾರ್' ಫಹಾದ್ ಫಾಸಿಲ್‌ ಅವರೊಂದಿಗೆ ಬೆಂಗಳೂರಿಗೆ ಬಂದಿದ್ದಾರೆ.

ಕಾರಿನಲ್ಲೇ ಬಂದ ದಂಪತಿ
ಕೊಚ್ಚಿಯಿಂದ ಬೆಂಗಳೂರಿಗೆ ಬರೋಬ್ಬರಿ 550 ಕಿ.ಮೀ. ದೂರ ಇದೆ. ಕೊರೊನಾ ಇರುವ ಹಿನ್ನೆಲೆಯಲ್ಲಿ ಸುರಕ್ಷತೆಯ ದೃಷ್ಟಿಯಿಂದ ವಿಮಾನಯಾನ ಮಾಡದೆ, ತಮ್ಮ ಐಷಾರಾಮಿ ಕಾರಿನಲ್ಲಿ ಪತಿ-ಪತ್ನಿ ಬಂದಿದ್ದಾರೆ. ಭಾನುವಾರ ಬೆಳಗ್ಗೆ ಆಸ್ಪತ್ರೆಗೆ ಆಗಮಿಸಿದ ದಂಪತಿಯು ಕೆಲಹೊತ್ತು ಮೇಘನಾ ರಾಜ್ ಹಾಗೂ ಮಗುವನ್ನು ನೋಡಿಕೊಂಡು, ಕನಕಪುರ ರಸ್ತೆಯ ಧ್ರುವ ಸರ್ಜಾ ಒಡೆತನದ ಬೃಂದಾವನ ಫಾರ್ಮ್ ಹೌಸ್‌ನಲ್ಲಿರುವ ಚಿರು ಸಮಾಧಿಗೆ ತೆರಳಿದ್ದಾರೆ. ಈ ದಂಪತಿಗೆ ನಿರ್ದೇಶಕ, ಚಿರು ಸ್ನೇಹಿತ ಪನ್ನಗಭರಣ ಸಾಥ್ ನೀಡಿದ್ದಾರೆ. ಕೆಲಹೊತ್ತು ಬೆಂಗಳೂರಿನಲ್ಲಿ ವಿಶ್ರಾಂತಿ ಪಡೆದು, ನಂತರ ಇಬ್ಬರು ಕೇರಳಕ್ಕೆ ಮರಳಲಿದ್ದಾರೆ ಎನ್ನಲಾಗಿದೆ.

ಕಳೆದ ನಾಲ್ಕು ತಿಂಗಳು 40 ವರ್ಷದ ರೀತಿ ಆಗೋಗಿತ್ತು: ಮೇಘನಾ ರಾಜ್ ತಂದೆ ಸುಂದರ್ ರಾಜ್!

ಚೆನ್ನೈನಿಂದ ಬಂದಿದ್ದ ಅರ್ಜುನ್ ಸರ್ಜಾ
ಮೇಘನಾಗೆ ಮಗು ಜನಿಸಿದ ವಿಷಯ ಕೇಳಿ ಸಂತಸಗೊಂಡ ಅರ್ಜುನ್ ಸರ್ಜಾ, ಚೆನ್ನೈನಿಂದ ಕುಟುಂಬಸಮೇತ ಬಂದು ತಾಯಿ-ಮಗುವನ್ನು ನೋಡಿದರು. 'ದೇವರೇ ಇಲ್ಲ ಅನ್ನೋ ಸ್ಥಿತಿಗೆ ನಾವು ಹೊರಟು ಹೋಗಿದ್ದೆವು. ಈಗ ದೇವರು ಇದ್ದಾನೆ ಅನ್ನಿಸುತ್ತಿದೆ. ಒಳ್ಳೆಯ ದಿನ, ಒಳ್ಳೆಯ ಗಳಿಗೆಯಲ್ಲಿ ಮಗು ಹುಟ್ಟಿದೆ. ಚಿರಂಜೀವಿ ಇಲ್ಲ ಅನ್ನೋ ವಿಚಾರವನ್ನು ನಮ್ಮ ಕುಟುಂಬಕ್ಕೆ ಜೀರ್ಣಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಮಗು ಹುಟ್ಟುವ ಮೂಲಕ ಎರಡು ಕುಟುಂಬಗಳಲ್ಲೂ ಸಂತಸ ಮೂಡಿದೆ. 36 ವರ್ಷಗಳ ಹಿಂದೆ, ಇದೇ ತಿಂಗಳಲ್ಲಿ, ನನ್ನ ತಾಯಿ ಕರೆ ಮಾಡಿದ್ದರು. 'ಹೇ, ನಿನ್ನ ತಂಗಿಗೆ ಗಂಡು ಮಗು ಆಗಿದೆ ಕಣೋ' ಅಂತ ಹೇಳಿದ್ರು. ನಾನು ಚೆನ್ನೈನಲ್ಲಿ ಶೂಟಿಂಗ್ ನಿಲ್ಲಿಸಿ, ಚಿರು ನೋಡಲು ಬೆಂಗಳೂರಿಗೆ ಬಂದಿದ್ದೆ. ಈಗ ಅವನ ಮಗುವನ್ನು ನೋಡಲು ಬಂದಿದ್ದೇನೆ. 20 ವರ್ಷ ಆದಮೇಲೆ ಇವನನ್ನು ಹೀರೋ ಆಗಿ ನಾನೇ ಲಾಂಚ್ ಮಾಡುತ್ತೇನೆ' ಎಂದು ಅವರು ಹೇಳಿದ್ದರು.

ಮೇಘನಾ-ಚಿರು ಮಗು ಬಗ್ಗೆ ಜಗ್ಗೇಶ್‌ ಮೊದಲ ಮಾತು! ರಾಯರ ಪ್ರಾರ್ಥನೆ ಮಾಡಿದ ನವರಸ ನಾಯಕ!