'ಕಣ್ಸನ್ನೆ ಸುಂದರಿ' ಪ್ರಿಯಾ ವಾರಿಯರ್‌ಗೆ ಖುಲಾಯಿಸಿದ ಅದೃಷ್ಟ! ಸ್ಟಾರ್ ಹೀರೋ ಸಿನಿಮಾದಲ್ಲಿ ಚಾನ್ಸ್

ಮಲಯಾಳಂನ 'ಒರು ಅಡಾರ್ ಲವ್' ಸಿನಿಮಾದ ಒಂದು ಹಾಡಿನಲ್ಲಿ ಕಣ್ಣು ಮಿಟುಕಿಸುವ ಒಂದು ದೃಶ್ಯದ ಮೂಲಕ ರಾತ್ರೋರಾತ್ರಿ ದೇಶಾದ್ಯಂತ ಫೇಮಸ್ ಆದ ನಟಿ ಪ್ರಿಯಾ ಪ್ರಕಾಶ್ ವಾರಿಯರ್‌. ಆನಂತರ ಅವರಿಗೆ ಸಿಕ್ಕಾಪಟ್ಟೆ ಸಿನಿಮಾಗಳ ಅವಕಾಶಗಳು ಬರುವುದಕ್ಕೆ ಶುರುವಾಗಿದ್ದು ನಿಜ. ಆದರೆ, ಇದುವರೆಗೂ ಅವರಿಗೆ ನಾಯಕಿಯಾಗಿ ದೊಡ್ಡಮಟ್ಟದಲ್ಲಿ ಇನ್ನೂ ಬ್ರೇಕ್ ಸಿಕ್ಕಿಲ್ಲ. ಸದ್ಯ ಅವರೀಗ ತೆಲುಗಿನ ಬಿಗ್ ಬಜೆಟ್ ಸಿನಿಮಾವೊಂದರ ನಾಯಕಿಯಾಗಿದ್ದು, ತಾರಾಗಣದ ಮೂಲಕವೇ ಈ ಚಿತ್ರ ಗಮನಸೆಳೆದಿದೆ.

ನಿತಿನ್‌ ಸಿನಿಮಾದಲ್ಲಿ ಪ್ರಿಯಾ
'ಭೀಷ್ಮ' ಚಿತ್ರದ ಮೂಲಕ ಮತ್ತೆ ಸಕ್ಸಸ್ ಹಳಿಗೆ ಮರಳಿರುವ ನಟ ನಿತಿನ್ ಕೈಯಲ್ಲಿ ಈಗ ಸಿಕ್ಕಾಪಟ್ಟೆ ಸಿನಿಮಾಗಳಿವೆ. ಅವರು ಈ ಹಿಂದೆ ಒಪ್ಪಿಕೊಂಡ ಸಿನಿಮಾವೊಂದಕ್ಕೆ ಈಗ ಶೀರ್ಷಿಕೆ ಘೋಷಣೆ ಆಗಿದ್ದು, 'ಚೆಕ್‌' ಎಂದು ಹೆಸರಿಡಲಾಗಿದೆ. ಅಂದಹಾಗೆ, ಇದು ಬ್ಯಾಂಕ್‌ನಲ್ಲಿ ಬಳಸುವ ಚೆಕ್ ಅಲ್ಲ, ಚದುರಂಗದ ಚೆಕ್! ಇನ್ನು, ಈ ಸಿನಿಮಾಗೆ ಇಬ್ಬರು ನಾಯಕಿಯರು. ಒಬ್ಬರು ರಾಕುಲ್ ಪ್ರೀತ್ ಸಿಂಗ್. ಮತ್ತೊಬ್ಬರು ಪ್ರಿಯಾ ವಾರಿಯರ್‌. ಇದೇ ಮೊದಲ ಬಾರಿಗೆ ಒಬ್ಬ ಸ್ಟಾರ್ ನಟನ ಜೊತೆಗೆ ನಟಿಸುವ ಅವಕಾಶ ಪ್ರಿಯಾಗೆ ಸಿಕ್ಕಿರುವುದು. ಹಾಗಾಗಿ, ಅವರಿಗೆ ಇದು ಅದೃಷ್ಟವೆಂದೇ ಹೇಳಬಹುದು.

ಪ್ರಿ-ಲುಕ್‌ ರಿಲೀಸ್
ತೆಲುಗಿನ ಖ್ಯಾತ ನಿರ್ದೇಶಕ ಕೊರಟಾಲ ಶಿವ ಈ ಸಿನಿಮಾದ ಟೈಟಲ್‌ ಮತ್ತು ಪ್ರಿ-ಲುಕ್ ಅನ್ನು ರಿಲೀಸ್ ಮಾಡಿದ್ದಾರೆ. 'ಐತೆ', 'ಅನುಕೊಕುಂಡ ಓಕಾ ರೋಜು', 'ಒಕ್ಕಾಡುನ್ನಾಡು', 'ಸಾಹಸಂ' ಸೇರಿದಂತೆ ಸಾಕಷ್ಟು ಹಿಟ್ ಸಿನಿಮಾಗಳನ್ನು ನಿರ್ದೇಶನ ಮಾಡಿರುವ ಚಂದ್ರಶೇಖರ್ ಯೆಲೆಟಿ 'ಚೆಕ್‌'ಗೆ ಡೈರೆಕ್ಷನ್ ಮಾಡಿದ್ದಾರೆ. 2016ರಲ್ಲಿ 'ಮನಮಂತಾ' ಮಾಡಿದ್ದ ಅವರು ಸಣ್ಣ ಗ್ಯಾಪ್‌ ನಂತರ ನಿತಿನ್ ಜೊತೆಗೆ ಸಿನಿಮಾ ಮಾಡುತ್ತಿದ್ದಾರೆ. 'ಚೆಕ್‌' ಚಿತ್ರವನ್ನು ವಿ. ಆನಂದ್ ಪ್ರಸಾದ್‌ ನಿರ್ಮಾಣ ಮಾಡಿದ್ದು, 'ಬಾಹುಬಲಿ' ಖ್ಯಾತಿಯ ಎಂಎಂ ಕೀರವಾಣಿ ಸಂಗೀತ ನಿರ್ದೇಶನ ಮಾಡಿದ್ದಾರೆ. ಸಿನಿಮಾದ ಬಹುತೇಕ ಶೂಟಿಂಗ್ ಮುಗಿಸಿರುವ ಚಿತ್ರತಂಡ ಈಗ ಟೈಟಲ್ ಮತ್ತು ಪಾತ್ರವರ್ಗದ ಕುರಿತು ಮಾಹಿತಿ ಹಂಚಿಕೊಂಡಿದೆ.

ಕಣ್‌ಸನ್ನೆ ಹುಡುಗಿ ಪ್ರಿಯಾ ಪ್ರಕಾಶ್ ವಾರಿಯರ್‌ ಕನ್ನಡ ಪ್ರೇಮ

ಕನ್ನಡಕ್ಕೂ ಎಂಟ್ರಿ ಕೊಟ್ಟಿರುವ ಪ್ರಿಯಾ
'ಒರು ಅಡಾರ್ ಲವ್' ಸಿನಿಮಾ ಪ್ರಿಯಾಗೆ ಜನಪ್ರಿಯತೆ ತಂದುಕೊಟ್ಟಿತ್ತು. ಆದರೆ, ಆ ಸಿನಿಮಾ ಗೆಲ್ಲಲಿಲ್ಲ. ಆನಂತರ ಅವರು ಮಾಡಿರುವ 'ಶ್ರೀದೇವಿ ಬಂಗ್ಲೋ' ಇನ್ನೂ ತೆರೆಕಂಡಿಲ್ಲ. ಇದೀಗ ಕನ್ನಡದಲ್ಲಿ ಶ್ರೇಯಸ್ ಮಂಜು ಜೊತೆ 'ವಿಷ್ಣುಪ್ರಿಯ' ಸಿನಿಮಾ ಮಾಡುತ್ತಿದ್ದಾರೆ. ವಿ.ಕೆ. ಪ್ರಕಾಶ್ ಇದರ ನಿರ್ದೇಶಕರು. ಕನ್ನಡದ ಜೊತೆಗೆ 'ವಿಷ್ಣುಪ್ರಿಯ' ಮಲಯಾಳಂನಲ್ಲೂ ತೆರೆಗೆ ಬರಲಿದೆ. ಈ ಮಧ್ಯೆ ನಿತಿನ್ ಸಿನಿಮಾದಲ್ಲಿ ನಟಿಸಿರುವುದರಿಂದ ಪ್ರಿಯಾ ವೃತ್ತಿಜೀವನಕ್ಕೆ ತಿರುವು ಸಿಗಬಹುದು ಎಂಬ ನಿರೀಕ್ಷೆ ಇದೆ.