ಮದುವೆ ವಿಚಾರಕ್ಕೆ ಕನ್ನಡದ 'ಜೋಶ್' ಸಿನಿಮಾ ನಟಿ ಶಾಮ್ನಾಗೆ ವಂಚನೆ! ಏನಿದು ಪ್ರಕರಣ?

ಕೇರಳ ಪೊಲೀಸರು ಬುಧವಾರ ನಟಿ ಶಾಮ್ನಾ ಕಾಸಿಂಗೆ ಹಣ ಬೆದರಿಕೆ ಹಾಕಿ ಸುಲಿಗೆ ಮಾಡುತ್ತಿದ್ದವರನ್ನು ಬಂಧಿಸಿದ್ದಾರೆ. 'ನಾಲ್ಕು ಜನ ಬಂಧಿತರನ್ನು ನ್ಯಾಯಾಂಗದ ಮುಂದೆ ಹಾಜರುಪಡಿಸಬೇಕಿದೆ. ತನಿಖೆ ನಡೆಯುತ್ತಿದೆ' ಎಂದು ಪೊಲೀಸರು ಹೇಳಿಕೆ ನೀಡಿದ್ದಾರೆ.

ನಟಿ ಮಾಧ್ಯಮದ ಮುಂದೆ ಹೇಳಿದ್ದೇನು?
ನಟಿಯ ಹಳೆಯ ವಿಡಿಯೋಗಳನ್ನು ಲೀಕ್ ಮಾಡುವುದಾಗಿ ಈ ನಾಲ್ಕು ಜನರು ಬೆದರಿಕೆಯೊಡ್ಡಿದ್ದಾರೆ ಎಂದು ನಟಿಯ ತಂದೆ ದೂರು ಕೊಟ್ಟಿದ್ದರು. ಮಲಯಾಳಂ ಮಾಧ್ಯಮದ ಬಳಿ ಮಾತನಾಡಿರುವ ಶಾಮ್ನಾ, 'ಯಾರಾದರೊಬ್ಬರು ಇದಕ್ಕೆ ಬಲಿಯಾಗುತ್ತಾರೆ. ಹೀಗಾಗಿ ನನ್ನ ಪಾಲಕರ ಬಳಿ ದೂರು ನೀಡಲು ಹೇಳಿದೆ. ಇದು ಒಂದು ಗ್ಯಾಂಗ್‌ನ ಪಾರ್ಟ್' ಎಂದಿದ್ದಾರೆ.

ಏನಿದು ಘಟನೆ?
ಮದುವೆ ವಿಚಾರಕ್ಕೆ ಸಂಬಂಧಪಟ್ಟಂತೆ ವ್ಯಕ್ತಿಯೋರ್ವ ಶಾಮ್ನಾ ತಂದೆಗೆ ಕರೆ ಮಾಡಿ, ದುಬೈನಲ್ಲಿ ಉದ್ಯಮಿಯೋರ್ವನಿದ್ದಾನೆ. ಈತನ ಮೂಲ ನಾರ್ತ್ ಕೇರಳ ಎಂದು ಹೇಳಿದ್ದಾರೆ. 6 ಜನರು ಶಾಮ್ನಾ ಅವರ ಕೋಚಿ ಮನೆಗೆ ಭೇಟಿ ನೀಡಿದ್ದಾರೆ. ಅಷ್ಟೇ ಅಲ್ಲದೆ ಅವರ ಸಂಬಂಧಿಕರ ವಿಡಿಯೋ ಕೂಡ ಮಾಡಿದ್ದಾರೆ. ಶಾಮ್ನಾ ತಂದೆಗೆ ಪುನಃ ಪುನಃ ಕಾಲ್ ಮಾಡಿ ಹಣ ಕೇಳಲಾಗುತ್ತಿದೆ. ಹಣ ಕೊಡಲು ನಟಿ ಮನೆಯವರು ಒಪ್ಪದಿದ್ದಾಗ ವಿಡಿಯೋ ಲೀಕ್ ಮಾಡುವುದಾಗಿ ಹೇಳಿದ್ದಾರೆ, ಅಷ್ಟೇ ಅಲ್ಲದೆ ಪೊಲೀಸ್ ಬಳಿ ಹೋಗದಂತೆ ಧಮ್ಕಿ ಹಾಕಿದ್ದಾರೆ. ಮೂರು ವರ್ಷಗಳ ಹಿಂದೆ ಈ ನಟಿಗೆ ಲೈಂಗಿಕ ದೌರ್ಜನ್ಯವಾಗಿತ್ತು. ಇದರ ಕುರಿತ ಕೇಸ್ ಇನ್ನೂ ಕೋರ್ಟ್‌ನಲ್ಲಿ ನಡೆಯುತ್ತಿದೆ.

ಕನ್ನಡದಲ್ಲಿ ನಟಿಸಿದ್ದ ಶಾಮ್ನಾ
ಶಾಮ್ನಾರನ್ನು ಪೂರ್ಣ ಎಂದು ಕರೆಯಲಾಗುತ್ತದೆ. ತಮಿಳು, ಮಲಯಾಳಂ ಸಿನಿಮಾಗಲ್ಲಿ ಇವರು ನಟಿಸಿದ್ದಾರೆ. 13 ವರ್ಷಗಳ ಸಿನಿ ಜೀವನದಲ್ಲಿ 40 ಸಿನಿಮಾಗಳಲ್ಲಿ ಇವರು ನಟಿಸಿದ್ದಾರೆ. 2004ರಿಂದ ಶಾಮ್ನಾ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ 'ಜೋಶ್', 'ರಾಧನ್ ಗಂಡ' ಸಿನಿಮಾದಲ್ಲಿಯೂ ನಟಿಸಿದ್ದರು.