'ಜೇಮ್ಸ್‌' ಮೇಲೆ ನಿರೀಕ್ಷೆ ಇಟ್ಟುಕೊಂಡಿರುವ ಪುನೀತ್‌ ರಾಜ್‌ಕುಮಾರ್‌ ಅಭಿಮಾನಿಗಳಿಗೆ ಇಲ್ಲಿದೆ ಗುಡ್‌ ನ್ಯೂಸ್‌!

ಬಹಳ ಹಿಂದೆಯೇ ಘೋಷಣೆ ಆದ ಸಿನಿಮಾ 'ಜೇಮ್ಸ್‌' ಬಗ್ಗೆ ತಿಳಿದುಕೊಳ್ಳಲು ಅಭಿಮಾನಿಗಳು ಕಾದಿದ್ದಾರೆ. 'ಭರ್ಜರಿ', 'ಬಹದ್ದೂರ್‌', 'ಭರಾಟೆ' ಖ್ಯಾತಿಯ ಚೇತನ್‌ ಕುಮಾರ್‌ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಸಿನಿಮಾ ಆದ್ದರಿಂದ ಇದರ ಬಗ್ಗೆ ಹೆಚ್ಚಿನ ನಿರೀಕ್ಷೆ ಇದೆ. ಈ ಚಿತ್ರದಲ್ಲಿ 'ಪವರ್‌ ಸ್ಟಾರ್‌' ಪುನೀತ್‌ ರಾಜ್‌ಕುಮಾರ್‌ ಸಖತ್ ಸ್ಟೈಲಿಶ್‌ ಆಗಿ ಕಾಣಿಸಿಕೊಳ್ಳಲಿದ್ದಾರೆ.

ಈ ಸಿನಿಮಾದ ಶೂಟಿಂಗ್‌ ಆದಷ್ಟು ಬೇಗ ಮುಗಿಯಬೇಕು ಎಂಬುದು ಅಭಿಮಾನಿಗಳ ಬಯಕೆ. ಅದನ್ನು ನಿರೀಕ್ಷಿಸುತ್ತಿರುವವರಿಗೆಲ್ಲ ಇಲ್ಲಿದೆ ಗುಡ್‌ ನ್ಯೂಸ್‌. ಅದೇನೆಂದರೆ ಇದೇ ತಿಂಗಳಲ್ಲೇ 'ಜೇಮ್ಸ್‌' ಚಿತ್ರೀಕರಣಕ್ಕೆ ವೇಗ ಸಿಗಲಿದೆ. ಅಂದರೆ, ಅ.13ರಿಂದ ಶೂಟಿಂಗ್‌ ಪುನಾರಂಭ ಮಾಡಲು ಚಿತ್ರತಂಡ ಸಕಲ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ಲಾಕ್‌ಡೌನ್‌ನಿಂದ ಅನೇಕ ಸಿನಿಮಾಗಳ ಚಿತ್ರೀಕರಣ ಸ್ಥಗಿತಗೊಂಡಿತ್ತು. ಈಗ ಹಲವು ತಂಡಗಳು ಹೊಸ ಹುಮ್ಮಸ್ಸಿನೊಂದಿಗೆ ಶೂಟಿಂಗ್‌ ಸೆಟ್‌ಗೆ ಮರಳುತ್ತಿವೆ.

ನಿರ್ದೇಶನದ ಜೊತೆಗೆ ಕಥೆ ಮತ್ತು ಚಿತ್ರಕಥೆಯನ್ನೂ ಚೇತನ್‌ ಕುಮಾರ್‌ ಅವರೇ ಬರೆದಿದ್ದಾರೆ. ಇದೇ ಮೊದಲ ಬಾರಿಗೆ ಅವರು ಪುನೀತ್‌ಗೆ ನಿರ್ದೇಶನ ಮಾಡುತ್ತಿದ್ದಾರೆ. ಈ ಚಿತ್ರ ಪಕ್ಕಾ ಆ್ಯಕ್ಷನ್‌ ಎಂಟರ್‌ಟೇನರ್‌ ಆಗಿರಲಿದೆ ಎಂಬುದಕ್ಕೆ ಈಗಾಗಲೇ ಬಿಡುಗಡೆ ಆಗಿರುವ ಕೆಲವು ಲುಕ್‌ಗಳು ಸಾಕ್ಷಿ ನೀಡುತ್ತಿವೆ. ಈ ಹಿಂದೆ ಚಿತ್ರತಂಡ ಹಂಚಿಕೊಂಡ ಪುನೀತ್‌ ಅವರ ಕೆಲವು ಫೋಟೋಗಳು ವೈರಲ್‌ ಆಗಿದ್ದವು.

also read: 'ಯುವರತ್ನ' ಚಿತ್ರದ ಈ ಕಲರ್‌ಫುಲ್‌ ಸಾಂಗ್‌ನಲ್ಲಿ ಅಪ್ಪು ಜೊತೆ ಕಾವ್ಯಾ ಶೆಟ್ಟಿ ಡ್ಯಾನ್ಸ್!

ಇದಲ್ಲದೆ, ಸಂತೋಷ್ ಆನಂದ್‌ ರಾಮ್‌ ನಿರ್ದೇಶನ ಮಾಡುತ್ತಿರುವ 'ಯುವರತ್ನ' ಸಿನಿಮಾದ ಕೆಲಸಗಳಲ್ಲೂ ಪುನೀತ್‌ ಬ್ಯುಸಿ ಆಗಿದ್ದಾರೆ. ಆ ಚಿತ್ರಕ್ಕೆ ನಾಯಕನ ಇಂಟ್ರೊಡಕ್ಷನ್‌ ಸಾಂಗ್‌ ಅನ್ನು ಇತ್ತೀಚೆಗೆ ಚಿತ್ರೀಕರಿಸಲಾಯಿತು. ಆ ಹಾಡಿನಲ್ಲಿ ಪುನೀತ್‌ ಜೊತೆ ನಟಿ ಕಾವ್ಯಾ ಶೆಟ್ಟಿ ಹೆಜ್ಜೆ ಹಾಕಿದ್ದಾರೆ. ಪುನೀತ್‌ ಕಾಲೇಜು ಹುಡುಗನ ಪಾತ್ರ ಮಾಡುತ್ತಿರುವುದರಿಂದ ಸಹಜವಾಗಿಯೇ 'ಯುವರತ್ನ' ಮೇಲೆ ನಿರೀಕ್ಷೆ ಹೆಚ್ಚಿದೆ.

also read: 'ಪುನೀತ್ ರಾಜ್‌ಕುಮಾರ್ ನನಗೆ ಕನ್ನಡ ಕಲಿಸಿದ ಗುರು'- 'ಕೆಜಿಎಫ್‌' ನಟ ಜಾನ್ ಕೊಕ್ಕೆನ್