'ಶುಗರ್‌ಲೆಸ್‌' ಸಿನಿಮಾಗೆ ಸಿಹಿ ತುಂಬಿಸಲು ಬಂದ 'ಗಣಪ' ಖ್ಯಾತಿಯ ಪ್ರಿಯಾಂಕಾ

'ಗಣಪ' ಸಿನಿಮಾ ಮೂಲಕ ಎಲ್ಲರ ಗಮನಸೆಳೆದ ನಟಿ ಪ್ರಿಯಾಂಕಾ ತಿಮ್ಮೇಶ್‌. ಆನಂತರ ಅವರು ಗಣೇಶ್‌ ನಟನೆಯ 'ಪಟಾಕಿ' ಸಿನಿಮಾದಲ್ಲಿ ಪ್ರಮುಖ ಪಾತ್ರ ಮಾಡಿದ್ದರು. ಈ ಮಧ್ಯೆ ಮಲಯಾಳಂ ನಟ ನಿವಿನ್‌ ಪೌಲಿ ಅಭಿನಯದ 'ಕಾಯಂಕುಳಂ ಕೊಚ್ಚುಣ್ಣಿ' ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದರು. ಈ ಮಧ್ಯೆ ಕೊಂಚ ಬ್ರೇಕ್ ಪಡೆದುಕೊಂಡ ಅವರೀಗ ಕನ್ನಡದ ಹೊಸ ಸಿನಿಮಾವನ್ನು ಒಪ್ಪಿಕೊಂಡಿದ್ದಾರೆ. ಯಾವುದು ಆ ಸಿನಿಮಾ? 'ಶುಗರ್‌ಲೆಸ್‌'.

ದಿಯಾ ಖ್ಯಾತಿಯ ಪೃಥ್ವಿ ಅಭಿನಯದ 'ಶುಗರ್‌ಲೆಸ್‌'
ಕೆಲ ದಿನಗಳ ಹಿಂದಷ್ಟೇ 'ದಿಯಾ' ಸಿನಿಮಾ ಖ್ಯಾತಿಯ ಪೃಥ್ವಿ ಅಂಬರ್ ನಾಯಕತ್ವದಲ್ಲಿ 'ಶುಗರ್‌ಲೆಸ್‌' ಚಿತ್ರ ಘೋಷಣೆ ಆಗಿತ್ತು. ನಿರ್ಮಾಪಕ ಶಶಿಧರ್‌ ಇದೇ ಮೊದಲ ಬಾರಿಗೆ ಈ ಸಿನಿಮಾ ಮೂಲಕ ನಿರ್ದೇಶಕರಾಗುತ್ತಿದ್ದಾರೆ. ಪುಷ್ಕರ್‌ ಮಲ್ಲಿಕಾರ್ಜುನಯ್ಯ ಚಿತ್ರವನ್ನು ಅರ್ಪಿಸಿದ್ದಾರೆ. ಇಂದು (ಆ.27) ಚಿತ್ರಕ್ಕೆ ಪೂಜೆ ಕೂಡ ಮಾಡಲಾಗಿದೆ. ಸೆಪ್ಟೆಂಬರ್ ಎರಡನೇ ವಾರದಿಂದ ಶೂಟಿಂಗ್ ಶುರು ಮಾಡುವುದಕ್ಕೆ ಚಿತ್ರತಂಡ ಪ್ಲ್ಯಾನ್ ಮಾಡಿಕೊಂಡಿದೆ. ಇದೇ ವೇಳೆ ಚಿತ್ರದ ನಾಯಕಿ ಹೆಸರನ್ನು ಘೋಷಣೆ ಮಾಡಲಾಗಿದೆ.

ಟೈಟಲ್‌ ಶುಗರ್‌ಲೆಸ್‌ ಆದ್ರೂ ಕಥೆ ಸ್ವೀಟ್ ಆಗಿದೆ
ಪ್ರಿಯಾಂಕಾ ಈ ಸಿನಿಮಾದ ಕಥೆ ಕೇಳಿದ ಕೂಡಲೇ ಬೇರೆ ಯೋಚನೆ ಮಾಡದೇ ಒಪ್ಪಿಕೊಂಡರಂತೆ. 'ನಿರ್ದೇಶಕರು ತುಂಬ ಚೆನ್ನಾಗಿರುವ ಕಥೆ ಮಾಡಿಕೊಂಡಿದ್ದಾರೆ. ಕಥೆ ಕೇಳುವಾಗಲೇ ನನಗೆ ಸಿಕ್ಕಾಪಟ್ಟೆ ನಗುಬಂತು. ಒಂದು ಕಾಯಿಲೆಯನ್ನು ಇಟ್ಟುಕೊಂಡು ಇಷ್ಟೊಂದು ಸುಂದರವಾಗಿ ಎಂಟರ್‌ಟೈನಿಂಗ್ ಆಗಿ ಕಥೆ ಮಾಡಬಹುದಾ ಎನಿಸಿತು. ತುಂಬ ಸ್ವೀಟ್ ಆದ ಸ್ಕ್ರಿಪ್ಟ್ ಇದು. ಸಂಪೂರ್ಣ ಕಥೆ ಕೇಳಿದ ಕೂಡಲೆ ನಟಿಸುವುದಕ್ಕೆ ನಾನು ಓಕೆ ಎಂದುಬಿಟ್ಟೆ. ಇನ್ನು, ನಟ ಪೃಥ್ವಿ ಜೊತೆ ನಟಿಸುವುದಕ್ಕೂ ತುಂಬ ಖುಷಿ ಇದೆ. ಅವರ 'ದಿಯಾ' ಸಿನಿಮಾವನ್ನು ನಾನು ತುಂಬ ಇಷ್ಟಪಟ್ಟಿದ್ದೆ. ಶೂಟಿಂಗ್‌ಗೆ ತಂಡ ತುಂಬ ಸಿದ್ಧತೆ ಮಾಡಿಕೊಂಡಿದೆ. ಬೇಗ ಚಿತ್ರೀಕರಣ ಶುರುವಾಗಲಿದೆ' ಎಂದು ಮಾಹಿತಿ ನೀಡುತ್ತಾರೆ ಪ್ರಿಯಾಂಕಾ.

ಮಧುಮೇಹದ ಕುರಿತ ಮನರಂಜನಾತ್ಮಕ ಸಿನಿಮಾ! 'ಶುಗರ್‌ಲೆಸ್‌'ನಲ್ಲಿ 'ರಾಮಾ ರಾಮಾ ರೇ' ಧರ್ಮಣ್ಣ

ಲಾಕ್‌ಡೌನ್‌ ನನಗೆ ವರದಾನವಾಯ್ತು
ಪ್ರಿಯಾಂಕಾ ಈಚೆಗೆ ಕೊಂಚ ದಪ್ಪ ಆಗಿದ್ದರು. ತೂಕ ಇಳಿಸುವುದಕ್ಕೆ ಸರಿಯಾದ ಸಮಯ ಸಿಕ್ಕಿರಲಿಲ್ಲ. ಈ ಲಾಕ್‌ಡೌನ್‌ನಲ್ಲಿ ತುಂಬ ಸಮಯ ಸಿಕ್ಕಿದ್ದರಿಂದ ದೇಹ ತೂಕ ಇಳಿಸಿಕೊಂಡಿದ್ದಾರೆ. 'ಕೆಲ ಸಮಯದಿಂದ ನಾನು ದಪ್ಪಗಾಗಿಬಿಟ್ಟಿದ್ದೆ. ಇದರಿಂದ ಒಂದಷ್ಟು ಸಿನಿಮಾಗಳ ಅವಕಾಶಗಳು ಕೈತಪ್ಪಿಹೋದವು. ಆದರೆ, ಈ ಲಾಕ್‌ಡೌನ್‌ ಸಮಯವನ್ನು ನಾನು ಸರಿಯಾಗಿ ಬಳಕೆ ಮಾಡಿಕೊಂಡು, ತೂಕ ಇಳಿಸಿಕೊಂಡೆ' ಎನ್ನುತ್ತಾರೆ ಪ್ರಿಯಾಂಕಾ. ಸದ್ಯ ಅವರು 'ಭೀಮಸೇನ ನಳಮಹಾರಾಜ' ಚಿತ್ರದ ಬಿಡುಗಡೆಯನ್ನು ಎದುರು ನೋಡುತ್ತಿದ್ದಾರೆ.

ಜನ್ಮದಿನದಂದೇ 'ಶುಗರ್‌ಲೆಸ್‌' ಬಳಗ ಸೇರಿಕೊಂಡ 'ದಿಯಾ' ಖ್ಯಾತಿಯ ಪೃಥ್ವಿ ಅಂಬರ್!