'ಯುವರತ್ನ' ನಾಯಕಿ ಸಾಯೇಷಾ ಚೆಂದದ ಫೋಟೋ ಜೊತೆ ಪಾತ್ರದ ಹೆಸರೂ ಬಹಿರಂಗ!

ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ 'ಯುವರತ್ನ' ಕೂಡ ಪ್ರಮುಖವಾಗಿದೆ. 'ಪವರ್‌ ಸ್ಟಾರ್‌' ಪುನೀತ್‌ ರಾಜ್‌ಕುಮಾರ್‌ ನಾಯಕತ್ವದ ಈ ಚಿತ್ರದ ಬಗ್ಗೆ ಅಭಿಮಾನಿಗಳಿಗೆ ದೊಡ್ಡ ಮಟ್ಟದ ನಿರೀಕ್ಷೆ ಇದೆ. ಚಿತ್ರಕ್ಕೆ ಕೊನೇ ಹಂತದ ಕೆಲಸಗಳು ಬಾಕಿ ಇದ್ದು, ಕೋವಿಡ್‌-19 ಹಾವಳಿ ಕಮ್ಮಿ ಆಗಲಿ ಎಂದು ಚಿತ್ರತಂಡ ಕಾಯುತ್ತಿದೆ. ಈ ನಡುವೆ ನಾಯಕಿ ಪಾತ್ರದ ಬಗ್ಗೆ ಅಪ್‌ಡೇಟ್‌ ಸಿಕ್ಕಿದೆ.

ನಿರ್ದೇಶಕ ಸಂತೋಷ್‌ ಆನಂದ್‌ರಾಮ್‌ ಅವರ ಮೂರನೇ ಸಿನಿಮಾ ಇದಾಗಿದ್ದು, 'ರಾಜಕುಮಾರ' ಬಳಿಕ ಪುನೀತ್‌ ಜೊತೆ ಎರಡನೇ ಬಾರಿಗೆ ಸಂತೋಷ್‌ ಸಿನಿಮಾ ಮಾಡುತ್ತಿದ್ದಾರೆ. ಈವರೆಗೂ ಟೀಸರ್‌ ಮತ್ತು ಹಲವು ಪೋಸ್ಟರ್‌ಗಳ ಮೂಲಕ ಪುನೀತ್ ಅವರ ಗೆಟಪ್‌ ಬಗ್ಗೆ ಮಾಹಿತಿ ನೀಡಲಾಗಿತ್ತು. ಆದರೆ ಹೀರೋಯಿನ್‌ ಪಾತ್ರ ಹೇಗಿರಲಿದೆ ಎಂಬ ಬಗ್ಗೆ ಚಿತ್ರತಂಡ ಕಿಂಚಿತ್ತೂ ಸುಳಿವು ಬಿಟ್ಟುಕೊಟ್ಟಿರಲಿಲ್ಲ. ಈಗ ಒಂದು ವಿಶೇಷ ದಿನದ ಪ್ರಯುಕ್ತ ನಾಯಕಿಯ ಪೋಸ್ಟರ್‌ ರಿಲೀಸ್‌ ಮಾಡಿದ್ದಾರೆ ನಿರ್ದೇಶಕರು.

ಅಂದಹಾಗೆ, ಈ ಸಿನಿಮಾದಲ್ಲಿ ಪುನೀತ್ ರಾಜ್‌ಕುಮಾರ್‌ ಅವರಿಗೆ ಜೋಡಿ ಆಗಿರುವುದು ನಟಿ ಸಾಯೇಷಾ ಸೈಗಲ್. ಮೂಲತಃ ಉತ್ತರ ಭಾರತದವರಾದ ಅವರು ತಮಿಳು, ಹಿಂದಿ ಚಿತ್ರರಂಗದಲ್ಲಿ ಈಗಾಗಲೇ ಗುರುತಿಸಿಕೊಂಡಿದ್ದಾರೆ. 'ಯುವರತ್ನ' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ನೀಡುತ್ತಿದ್ದಾರೆ. ಮೊದಲ ಸಿನಿಮಾದಲ್ಲಿ ಪುನೀತ್‌ಗೆ ನಾಯಕಿಯಾಗುವ ಚಾನ್ಸ್‌ ಅವರಿಗೆ ಸಿಕ್ಕಿದೆ. ಕಳೆದ ವರ್ಷ ನಟ ಆರ್ಯ ಜೊತೆ ಸಾಯೇಷಾ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

also read: 'ಯುವರತ್ನ' ಸಿನಿಮಾ ನಾಯಕಿ ಸಾಯೇಷಾ ಸೈಗಲ್ ಅದ್ಭುತ ಡ್ಯಾನ್ಸರ್‌ ಎಂಬುದಕ್ಕೆ ಇಲ್ಲಿದೆ ಸಾಕ್ಷಿ!

ಆ.12ರಂದು ಸಾಯೇಷಾ ಸೈಗಲ್ ಜನ್ಮದಿನ. ಆ ಪ್ರಯುಕ್ತ ನಿರ್ದೇಶಕ ಸಂತೋಷ್‌ ಆನಂದ್‌ ರಾಮ್‌ ಅವರು ಚಂದದ ಪೋಸ್ಟರ್‌ ಬಿಡುಗಡೆ ಮಾಡಿದ್ದಾರೆ. ಅದರಲ್ಲಿ ಮುದ್ದಾಗಿ ಕಾಣುತ್ತಿರುವ ಸಾಯೇಷಾಗೆ ಶುಭಾಶಯ ಕೋರಲಾಗಿದೆ. ಅಲ್ಲದೆ, ಈ ಸಿನಿಮಾದಲ್ಲಿ ಅವರ ಪಾತ್ರದ ಹೆಸರು ವಂದನಾ ಎಂಬುದನ್ನೂ ನಿರ್ದೇಶಕರು ಬಹಿರಂಗ ಪಡಿಸಿದ್ದಾರೆ. ಸಾಯೇಷಾ ಅವರ ಕ್ಯೂಟ್‌ ಲುಕ್‌ ಕಂಡ ಫ್ಯಾನ್ಸ್ ಫಿದಾ ಆಗಿದ್ದಾರೆ. ಚಿತ್ರಕ್ಕೆ ಎಸ್‌. ಥಮನ್‌ ಸಂಗೀತ ಸಂಯೋಜನೆ ಮಾಡುತ್ತಿದ್ದು, ಹಾಡುಗಳಿಗಾಗಿ ಅಭಿಮಾನಿಗಳ ಕಾತರ ಹೆಚ್ಚಿದೆ.

also read: ವೈರಲ್ ಆಯ್ತು ಪುನೀತ್ ರಾಜ್‌ಕುಮಾರ್ 'ಯುವರತ್ನ' ಸಿನಿಮಾ ನಾಯಕಿ ಸಾಯೇಷಾ ಸೈಗಲ್ ಹಾಟ್‌ ಡ್ಯಾನ್ಸ್‌!