ಲಿಪ್ಲಾಕ್ ಮಾಡಿದ ಡಿಂಪಲ್ ಕ್ವೀನ್
ರಚಿತಾ ರಾಮ್ ಗ್ಲಾಮರಸ್ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದು ತೀರಾ ಕಮ್ಮಿ. ಮೊದಲ ಬಾರಿಗೆ ಅವರು ಸಖತ್ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದು 'ಐ ಲವ್ ಯು' ಸಿನಿಮಾದಲ್ಲಿ. ಆನಂತರ ಇನ್ನುಮುಂದೆ ಅಂಥ ಪಾತ್ರ ಮಾಡಲ್ಲ ಎಂದು ಸ್ವತಃ ಅವರೇ ಹೇಳಿಕೊಂಡಿದ್ದರು. ಆದರೆ, ಇದೀಗ 'ಏಕ್ ಲವ್ ಯಾ' ಟೀಸರ್ ನೋಡಿದವರು ದಂಗಾಗಿದ್ದಾರೆ. ಯಾಕೆಂದರೆ, ನಟ ರಾಣಾ ತುಟಿಗೆ ತುಟಿ ಒತ್ತಿದ್ದಾರೆ ರಚಿತಾ ರಾಮ್!
ವೈರಲ್ ಆಗಿತ್ತು ಸಿಗರೇಟ್ ಸೇದೋ ಫೋಟೋ
ರಚಿತಾ ರಾಮ್ 'ಏಕ್ ಲವ್ ಯಾ'ದಲ್ಲಿ ಸಿಗರೇಟ್ ಸೇದಿದ್ದಾರೆ ಅನ್ನೋದಕ್ಕೆ ಸಾಕ್ಷಿಯಾಗಿ ಗುರುವಾರ ಒಂದಷ್ಟು ಫೋಟೋಗಳು ವೈರಲ್ ಆಗಿದ್ದವು. ಬಿಂದಾಸ್‌ ಆಗಿ ಸಿಗರೇಟ್ ಸೇದಿ ಹೊಗೆ ಬಿಡುತ್ತಿರುವ ರಚಿತಾ ಅವರ ಫೋಟೋ ಅದಾಗಿತ್ತು. ಅದು ಕೂಡ ಈಗ ಟೀಸರ್‌ನಲ್ಲಿ ಇದೆ. ಚಿತ್ರದಲ್ಲಿ ರಚಿತಾ ಸಿಗರೇಟ್ ಸೇದಿರುವುದು ನಿಜ ಎಂಬುದನ್ನು ಟೀಸರ್‌ನಲ್ಲಿ ಗೊತ್ತಾಗಿದೆ. ಇಷ್ಟು ವರ್ಷಗಳ ಸಿನಿಕರಿಯರ್‌ನಲ್ಲಿ ರಚಿತಾ ರಾಮ್ ಹಿಂದೆಂದೂ ಈ ರೀತಿ ಕಾಣಿಸಿಕೊಂಡಿರಲಿಲ್ಲ. 'ಏಕ್ ಲವ್ ಯಾ'ದಲ್ಲಿ ಇದೆಲ್ಲ ಮಾಡಿದ್ದಾರೆ ಎಂದಮೇಲೆ ಅವರ ಪಾತ್ರದ ಬಗ್ಗೆ ಸಾಕಷ್ಟು ಕುತೂಹಲ ಸೃಷ್ಟಿಯಾಗಿದೆ.
'ಜೋಗಿ' ಪ್ರೇಮ್ ಕೈಯಲ್ಲಿ ಎಣ್ಣೆ ಬಾಟಲ್! ಹಾಗಾದರೆ, 'ಏಕ್ ಲವ್ ಯಾ' ಸೆಟ್‌ನಲ್ಲಿ ಏನಾಗ್ತಿದೆ?
ರಚಿತಾ ಪಾತ್ರ ಹೇಗಿದೆ?
ನಿರ್ದೇಶಕ ಪ್ರೇಮ್ ಈ ಬಗ್ಗೆ ಹೇಳುವುದು ಹೀಗೆ. 'ಈ ಚಿತ್ರದಲ್ಲಿ ಅವರು ಸಿಗರೇಟ್ ಸೇದುವ ದೃಶ್ಯವಿದೆ. ಹಿಂದೆಂದೂ ಕಾಣಿಸಿಕೊಳ್ಳದ ಪಾತ್ರದಲ್ಲಿ ರಚಿತಾ ಕಾಣಿಸಿಕೊಂಡಿದ್ದಾರೆ. ಸಿನಿಮಾದಲ್ಲಿ ಅವರ ಪಾತ್ರ ಸಾಕಷ್ಟು ಅಚ್ಚರಿಗಳನ್ನು ನೀಡಲಿದೆ' ಎಂದಿದ್ದರು 'ಜೋಗಿ' ಪ್ರೇಮ್. ಈ ಹಿಂದೆ ತೆರೆಕಂಡಿದ್ದ ಶಿವರಾಜ್‌ಕುಮಾರ್-ಸುದೀಪ್ ನಾಯಕತ್ವದ 'ದಿ ವಿಲನ್‌' ಚಿತ್ರದ ಒಂದು ಹಾಡಲ್ಲಿ ರಚಿತಾ ರಾಮ್ ಕಾಣಿಸಿಕೊಂಡಿದ್ದರು. ಈ ಬಾರಿ ಪ್ರೇಮ್ ನಿರ್ದೇಶನದ ಸಿನಿಮಾದಲ್ಲಿ ನಾಯಕಿಯಾಗಿದ್ದಾರೆ.
ಸಿನಿಮಾಕ್ಕೆ ಮರಳಿ ಬಂದ ಕ್ರೇಜಿ ಕ್ವೀನ್ ರಕ್ಷಿತಾ; ಯಾವ ಸಿನಿಮಾ? ಹೀರೋ ಯಾರು?
ರಚಿತಾ ಮಾತ್ರವಲ್ಲ, ರೀಷ್ಮಾ ಕೂಡ ಇದ್ದಾರೆ!
ಇಲ್ಲಿ ನಾಯಕಿಯಾಗಿ ರಚಿತಾ ರಾಮ್ ಮಾತ್ರವಲ್ಲ, ಮತ್ತೋರ್ವ ನಾಯಕಿ ಕೂಡ ಇದ್ದಾರೆ. ಹೊಸ ನಟಿ ರೀಷ್ಮಾ 'ಏಕ್ ಲವ್ ಯಾ' ಮೂಲಕ ಚಂದನವನಕ್ಕೆ ಕಾಲಿಡುತ್ತಿದ್ದಾರೆ. ರಕ್ಷಿತಾ ಪ್ರೇಮ್ ಇದರ ನಿರ್ಮಾಣದ ಹೊಣೆ ಹೊತ್ತಿದ್ದು, ಊಟಿ ಸೇರಿದಂತೆ ನಾನಾ ಕಡೆ ಚಿತ್ರೀಕರಣ ಮಾಡಲಾಗಿದೆ. ಮಹೇನ್‌ ಸಿಂಹ ಛಾಯಾಗ್ರಹಣ ಮಾಡಿದ್ದಾರೆ. ಹಾಡುಗಳಿಗೆ ಅರ್ಜುನ್ ಜನ್ಯ ಸಂಗೀತ ನಿದೇಶನ ಮಾಡಿದ್ದಾರೆ.