ಕೊರೊನಾದಿಂದ ಗುಣಮುಖರಾದ ರಾಜಮೌಳಿ! ಆದ್ರೆ, ಪ್ಲಾಸ್ಮಾ ದಾನಕ್ಕೆ ಇದೆ ಒಂದು ಕಂಡೀಷನ್!

ಕೆಲ ದಿನಗಳ ಹಿಂದಷ್ಟೇ ಅಮಿತಾಭ್ ಬಚ್ಚನ್‌ ಕುಟುಂಬ, ಧ್ರುವ ಸರ್ಜಾ ದಂಪತಿ ಕೊರೊನಾದಿಂದ ಸಂಪೂರ್ಣ ಗುಣಮುಖರಾಗಿದ್ದರು. ಈ ಸುದ್ದಿ ಕೇಳಿ ಸಿನಿಪ್ರಿಯರಿಗೆ ಸಖತ್ ಖುಷಿಯಾಗಿತ್ತು. ಇದೀಗ ಮತ್ತೊಂದು ವಿಚಾರ ಸಿನಿಪ್ರಿಯರಿಗೆ ಸಿಕ್ಕಿದೆ. 'ಬಾಹುಬಲಿ' ಖ್ಯಾತಿಯ ನಿರ್ದೇಶಕ ರಾಜಮೌಳಿ ಮತ್ತು ಅವರ ಕುಟುಂಬ ಸದಸ್ಯರು ಕೂಡ ಕೊರೊನಾ ವೈರಸ್‌ನಿಂದ ಸಂಪೂರ್ಣವಾಗಿ ಗುಣಮುಖರಾಗಿದ್ದಾರೆ. ಈ ವಿಚಾರವನ್ನು ರಾಜಮೌಳಿ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.

'ಕಳೆದ ಎರಡು ವಾರಗಳ ಕ್ವಾರಂಟೈನ್ ಅವಧಿಯನ್ನು ಮುಗಿಸಿದ್ದೇವೆ. ಯಾವುದೇ ಥರದ ಲಕ್ಷಣಗಳು ಕಂಡುಬಂದಿಲ್ಲ. ಆದರೂ, ಪರೀಕ್ಷೆ ಮಾಡಿಸಿದೆವು. ನಮ್ಮೆಲ್ಲರ ವರದಿ ನೆಗೆಟಿವ್ ಬಂದಿದೆ. ಆದರೆ, ಪ್ಲಾಸ್ಮಾ ದಾನ ಮಾಡಲು ನಾವು ಇನ್ನೂ ಮೂರು ವಾರ ಕಾಯಬೇಕು ಎಂದು ವೈದ್ಯರು ತಿಳಿಸಿದ್ದಾರೆ' ಎಂದು ಅವರು ಮಾಹಿತಿ ನೀಡಿದ್ದಾರೆ. ರಾಜಮೌಳಿ ಈ ವಿಚಾರವನ್ನು ತಿಳಿಸುತ್ತಿದ್ದಂತೆಯೇ, ಅವರ ಅಭಿಮಾನಿಗಳು ಸಂತೋಷ ವ್ಯಕ್ತಪಡಿಸಿದ್ದಾರೆ. ಸದ್ಯ 'ಆರ್‌ಆರ್‌ಆರ್‌' ಸಿನಿಮಾದ ನಿರ್ದೇಶನದಲ್ಲಿ ರಾಜಮೌಳಿ ಬ್ಯುಸಿ ಇದ್ದರು. ಆದರೆ, ಕೊರೊನಾದಿಂದಾಗಿ ಶೂಟಿಂಗ್ ನಿಂತುಹೋಗಿದೆ.

ಅಂದಹಾಗೆ, ಜುಲೈ 29ರಂದು ರಾಜಮೌಳಿ ಮತ್ತು ಅವರ ಕುಟುಂಬ ಸದಸ್ಯರಿಗೆ ಕೊರೊನಾ ತಗುಲಿತ್ತು. ಆಗ ಮಾಹಿತಿ ನೀಡಿದ್ದ ರಾಜಮೌಳಿ, 'ನನಗೂ ಮತ್ತು ನನ್ನ ಕುಟುಂಬದ ಸದಸ್ಯರಿಗೆ ಕೋವಿಡ್‌ 19ರ ಪರೀಕ್ಷೆ ಮಾಡಿಸಲಾಯ್ತು. ವರದಿ ಪಾಸಿಟಿವ್ ಆಗಿದೆ. ವೈದ್ಯರ ಸೂಚನೆ ಮೇರೆಗೆ ನಮ್ಮ ಕುಟುಂಬದವರೆಲ್ಲ ಹೋಮ್ ಕ್ವಾರಂಟೈನ್ ಆಗಿದ್ದೇವೆ. ಯಾವುದೇ ರೋಗ ಲಕ್ಷಣಗಳಿಲ್ಲದೆ, ನಾವೆಲ್ಲರೂ ಈಗ ಆರಾಮಾಗಿದ್ದೇವೆ. ಆದರೆ, ಎಲ್ಲ ಮುನ್ನೆಚ್ಚರಿಕೆಗಳು ಮತ್ತು ಸೂಚನೆಗಳನ್ನು ಅನುಸರಿಸುತ್ತಿದ್ದೇವೆ. ನಾವೆಲ್ಲ ರೋಗ ನಿರೋಧಕಶಕ್ತಿಯನ್ನು ವೃದ್ಧಿಸಿಕೊಂಡು, ಪ್ಲಾಸ್ಮಾ ದಾನ ಮಾಡುವುದಕ್ಕಾಗಿ ಕಾಯುತ್ತಿದ್ದೇವೆ' ಎಂದು ಮಾಹಿತಿ ನೀಡಿದ್ದರು. ಇದೀಗ ಹೇಳಿದ ಮಾತಿನಂತೆಯೇ ಪ್ಲಾಸ್ಮಾ ದಾನಕ್ಕಾಗಿ ರಾಜಮೌಳಿ ಕುಟುಂಬ ಕಾಯುತ್ತಿದೆ.

ರಾಜಮೌಳಿ ನಂತರ ಮತ್ತೊಬ್ಬ ಸ್ಟಾರ್ ಡೈರೆಕ್ಟರ್‌ಗೆ ಕೊರೊನಾ ಪಾಸಿಟಿವ್‌! ಆತಂಕದಲ್ಲಿ ಟಾಲಿವುಡ್‌

ಈ ಮಧ್ಯೆ ತೆಲುಗಿನ ಮತ್ತೋರ್ವ ಜನಪ್ರಿಯ ನಿರ್ದೇಶಕ ತೇಜಗೆ ಕೊರೊನಾ ತಗುಲಿತ್ತು. ಅವರೀಗ ಹೋಮ್ ಕ್ವಾರಂಟೈನ್‌ನಲ್ಲಿದ್ದಾರೆ. ಜೊತೆಗೆ 'ಆರ್‌ಆರ್‌ಆರ್‌' ಚಿತ್ರದ ನಿರ್ಮಾಪಕ ಡಿವಿವಿ ದಾನಯ್ಯ ಅವರಿಗೂ ಕೊರೊನಾ ವೈರಸ್‌ ಪಾಸಿಟಿವ್ ಆಗಿದೆ.

'ಬಾಹುಬಲಿ' ನಿರ್ದೇಶಕ ರಾಜಮೌಳಿಗೆ ಕೊರೊನಾ ಪಾಸಿಟಿವ್!