ಪುನೀತ್ ರಾಜ್ಕುಮಾರ್ ಅವರ ಕೊನೆಯ ಸಿನಿಮಾ ‘ಜೇಮ್ಸ್’ನಲ್ಲಿ ಡಾ. ರಾಜ್ಕುಮಾರ್ ಅವರ ಮೂವರೂ ಪುತ್ರರು ಕಾಣಿಸಿಕೊಳ್ಳಲಿದ್ದಾರೆ. ಈ ಮೂಲಕ ತಮ್ಮ ಮೂವರು ಮಕ್ಕಳು ಒಂದೇ ಸಿನಿಮಾದಲ್ಲಿ ನಟಿಸಬೇಕು ಎಂದು ದಿ.ಪಾರ್ವತಮ್ಮ ರಾಜ್ಕುಮಾರ್ ಕಂಡ ಕನಸು ನನಸಾಗುತ್ತಿದೆ.
ಡಾ.ರಾಜ್ಕುಮಾರ್ ಅವರ ಮೂವರು ಪುತ್ರರಾದ ಶಿವರಾಜ್ಕುಮಾರ್, ರಾಘವೇಂದ್ರ ರಾಜ್ಕುಮಾರ್, ಪುನೀತ್ ರಾಜ್ಕುಮಾರ್ ಒಂದೇ ಸಿನಿಮಾದಲ್ಲಿ ನಟಿಸಬೇಕು ಎಂಬ ಆಸೆಯನ್ನು ಅವರ ಅಭಿಮಾನಿಗಳು ಹಲವು ವರ್ಷಗಳಿಂದ ವ್ಯಕ್ತಪಡಿಸುತ್ತಲೇ ಇದ್ದುದು ನಿಜ. ಹಲವು ಬಾರಿ ಮಾಧ್ಯಮಗಳೂ ಮೂವರು ಕುಮಾರತ್ರಯರಿಗೆ ಈ ಕುರಿತಾಗಿ ಪ್ರಶ್ನೆಯನ್ನು ಕೇಳುತ್ತಲೇ ಇದ್ದವು. ತಮ್ಮ ಮೂವರು ಮಕ್ಕಳೂ ಒಂದೇ ಚಿತ್ರದಲ್ಲಿ ನಟಿಸಬೇಕು ಎಂಬುದು ಪಾರ್ವತಮ್ಮ ರಾಜ್ಕುಮಾರ್ ಅವರ ಆಸೆಯೂ ಆಗಿತ್ತು. ತಿಂಗಳುಗಳ ಹಿಂದೆ ಅಪ್ಪು ಅವರ ಅಕಾಲಿಕ ಮರಣ ಸಂಭವಿಸಿದಾಗ, ಈ ಆಸೆ ಇನ್ಯಾವತ್ತೂ ಈಡೇರುವುದಿಲ್ಲಎಂದು ಎಲ್ಲರಿಗೂ ನಿರಾಸೆಯಾಗಿತ್ತು. ಆದರೆ ಮೂವರನ್ನೂ ಒಟ್ಟಿಗೇ ತೆರೆಮೇಲೆ ತರಲು ಆಗುವುದಿಲ್ಲ, ಒಂದೇ ಸಿನಿಮಾದಲ್ಲಿ ತೋರಿಸಬಹುದಲ್ಲ ಎಂಬುದನ್ನು ‘ಜೇಮ್ಸ್’ ಸಿನಿಮಾ ತಂಡ ಮಾಡಿ ತೋರಿಸುತ್ತಿದೆ.
ಚೇತನ್ಕುಮಾರ್ ನಿರ್ದೇಶನ ಮಾಡುತ್ತಿರುವ ‘ಜೇಮ್ಸ್’ ಸಿನಿಮಾದ ಚಿತ್ರೀಕರಣ ಶುಕ್ರವಾರವಷ್ಟೇ ಪೂರ್ಣಗೊಂಡಿದೆ. ಪುನೀತ್ ರಾಜ್ಕುಮಾರ್ ಮೃತಪಡುವುದಕ್ಕಿಂತಲೂ ಮುನ್ನ ಅವರ ಭಾಗದ ಚಿತ್ರೀಕರಣ ಕಂಪ್ಲೀಟ್ ಆಗಿತ್ತು. ಅವರಿಲ್ಲದ ದೃಶ್ಯಗಳ ಚಿತ್ರೀಕರಣ ಬಾಕಿ ಇತ್ತು. ಅದು ಶುಕ್ರವಾರ ಮುಗಿದಿದೆ. ಅಂದೇ ನಟ ಶಿವರಾಜ್ಕುಮಾರ್, ರಾಘವೇಂದ್ರ ರಾಜ್ಕುಮಾರ್ ಸಹ ಚಿತ್ರೀಕರಣದಲ್ಲಿ ಪಾಲ್ಗೊಂಡಿದ್ದರು.
‘ಶಿವಣ್ಣ ಮತ್ತು ರಾಘಣ್ಣ ಇಬ್ಬರೂ ನಮ್ಮ ಸಿನಿಮಾದಲ್ಲಿ ವಿಶೇಷ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಮೂಲಕ ಮೂವರೂ ಒಂದೇ ಸಿನಿಮಾದಲ್ಲಿ ನಟಿಸಿದ್ದಾರೆ ಎಂಬ ಖುಷಿ ಅವರೆಲ್ಲರ ಅಭಿಮಾನಿಗಳಿಗೆ ಸಿಗುತ್ತದೆ. ಇವರಿಬ್ಬರ ಪಾತ್ರವೇನು, ಎಷ್ಟು ನಿಮಿಷ ಇರುತ್ತಾರೆ ಎಂಬೆಲ್ಲಾ ವಿವರಗಳನ್ನು ಈಗ ನೀಡಲು ಸಾಧ್ಯವಿಲ್ಲ. ಅದು ಸಿನಿಮಾದಲ್ಲಿಯೇ ರಿವೀಲ್ ಆಗಲಿದೆ’ ಎಂದಿದ್ದಾರೆ ಚೇತನ್ಕುಮಾರ್.
‘ಅಪ್ಪು ಸರ್, ಶಿವಣ್ಣ, ರಾಘಣ್ಣ ಒಟ್ಟಿಗೆ ನಟಿಸಬೇಕು ಎಂಬ ಆಸೆ ಅವರ ಅಭಿಮಾನಿಗಳು ಮಾತ್ರವಲ್ಲ ಸ್ವತಃ ಮೂವರು ಸಹೋದರರಿಗೂ ಇತ್ತು. ಆದರೆ ಇದೀಗ ಒಂದೇ ಸಿನಿಮಾದಲ್ಲಿ ಮೂವರೂ ಕಾಣಿಸಿಕೊಳ್ಳುವಂತಾಗಿದೆ. ಅದೂ ಅಪ್ಪು ಸರ್ ಇಲ್ಲದ ಈ ಸಮಯದಲ್ಲಿ ಚಿತ್ರೀಕರಣ ಮಾಡಿದ್ದು ನಮಗೆ ಬೇಸರದ ಸಂಗತಿ. ರಾಘಣ್ಣ, ಶಿವಣ್ಣ ಇಬ್ಬರೂ ನಟಿಸಿದ ಸಮಯದಲ್ಲಿಇಡೀ ಸೆಟ್ನಲ್ಲಿ ಒಂದು ರೀತಿ ಭಾವನಾತ್ಮಕ ಸನ್ನಿವೇಶ ಸೃಷ್ಟಿಯಾಗಿತ್ತು’ ಎನ್ನುತ್ತಾರೆ ಚೇತನ್ ಕುಮಾರ್.
ನಮಗೆ ತೃಪ್ತಿ ಇದೆ
‘ನಾವು ಮೂವರು ಒಟ್ಟಿಗೆ ನಟಿಸಬೇಕು ಎಂಬಾಸೆ ನಮಗೂ ಇತ್ತು. ಅದಕ್ಕೆ ಕಾಲ ಕೂಡಿ ಬಂದಿರಲಿಲ್ಲ. ಈಗ ಅದು ಈಡೇರುವುದಿಲ್ಲ. ಆದರೆ ಒಂದೇ ಸಿನಿಮಾದಲ್ಲಿ ನಟಿಸಿದ್ದೇವೆ ಎಂಬ ತೃಪ್ತಿ ನಮಗಿರುತ್ತದೆ. ‘ಜೇಮ್ಸ್’ನಲ್ಲಿ ನಾನು ರಾಘು ನಟಿಸದೇ ಹೋಗಿದ್ದರೆ ಅಂತಹದ್ದೊಂದು ಅವಕಾಶ ಕಳೆದುಕೊಳ್ಳುತ್ತಿದ್ದೆವು. ಯಾವ ರೀತಿಯ ಪಾತ್ರ, ಏನು ಎಂಬುದನ್ನು ಸಿನಿಮಾದಲ್ಲಿಯೇ ನೋಡಬೇಕು. ಇದು ಸಿನಿಮಾದ ಪ್ರಮುಖ ಅಂಶವಾ, ಅಲ್ಲವಾ ಎಂಬುದೆಲ್ಲವನ್ನು ನಿರ್ಧರಿಸಲು ಚಿತ್ರತಂಡಕ್ಕೆ ಬಿಟ್ಟಿದ್ದೇವೆ. ನಾನು ಮತ್ತು ರಾಘು ಶುಕ್ರವಾರ ಚಿತ್ರೀಕರಣ ಮಾಡಿಕೊಟ್ಟಿದ್ದೇವೆ’ ಎಂದಿದ್ದಾರೆ ಶಿವರಾಜ್ಕುಮಾರ್.
'ಜೇಮ್ಸ್' ಸಿನಿಮಾ ಶೂಟಿಂಗ್ ಕಂಪ್ಲೀಟ್; ಸೆಟ್ಗೆ ಬಂದ ಶಿವಣ್ಣ & ರಾಘಣ್ಣ
ಅತಿಥಿ ಪಾತ್ರ
'ನಾವಿಬ್ಬರೂ ನಟಿಸಿರುವುದು ಅತಿಥಿ ಪಾತ್ರದಲ್ಲಿ. ಇಂಪ್ರೆಸಿವ್ ಆಗಿರುವ ಪಾತ್ರವದು. ಅವನಿಲ್ಲ ಎಂಬುದನ್ನು ನೆನೆಸಿಕೊಳ್ಳಲು ಕಷ್ಟ. ಅವನ ಕೊನೆ ಸಿನಿಮಾದಲ್ಲಿ ನಾನು ಒಂದು ಪಾತ್ರಧಾರಿಯಾದೆನಲ್ಲ ಎಂಬ ನೆಮ್ಮದಿ ನನಗಿದೆ. ನಮ್ಮ ಪಾತ್ರವೇನು ಎಂಬ ಬಗ್ಗೆ ಜನರಿಗೆ ಕುತೂಹಲವಿರಲಿ. ನಮ್ಮ ಜತೆ ಅಪ್ಪು ಇರುತ್ತಾನೆ, ಇದ್ದಾನೆ' ಎಂದಿದ್ದಾರೆ ಶಿವರಾಜ್ಕುಮಾರ್
‘ಜೇಮ್ಸ್’ ಚಿತ್ರದಲ್ಲಿ ಪುನೀತ್ ಧ್ವನಿ ಇರಲಿದೆಯೇ? ನಿರ್ದೇಶಕ ಚೇತನ್ ಬಿಟ್ಟು ಕೊಟ್ಟ ಗುಟ್ಟು ಇದು…
ರಾಘಣ್ಣ ಹೇಳಿದ್ದೇನು?
‘ನಾನು, ಶಿವಣ್ಣ ಒಟ್ಟಿಗೆ ಕ್ಯಾಮೆರಾ ಎದುರು ಬಂದಾಗ ಅಪ್ಪು ಇಲ್ವಲ್ಲ ಎಂದು ಬೇಸರವಾಯಿತು. ಅವನಿಲ್ಲದ ಸಮಯದಲ್ಲಿ ಮೂವರೂ ಒಂದೇ ಸಿನಿಮಾದಲ್ಲಿ ಕಾಣಿಸಿಕೊಳ್ಳುವಂತಾಯಿತಲ್ಲಎಂಬ ಬೇಸರವೂ ಇದೆ. ಅವನ ಪಾತ್ರದ ಜತೆ ಕಾಣಿಸಿಕೊಂಡ ಖುಷಿ ನಮಗಾಗಿದೆ. ಜನ ಅದನ್ನು ನೋಡಿ ಕರೆಕ್ಟ್ ಆಗಿರುವ ಪಾತ್ರದಲ್ಲಿ ಇಬ್ಬರೂ ನಟಿಸಿದ್ದಾರೆ ಎನ್ನುತ್ತಾರೆ. ನನಗೂ ಅವನ ಕೊನೆ ಸಿನಿಮಾದಲ್ಲಿ ಕಾಣಿಸಿಕೊಂಡ ತೃಪ್ತಿ ಇದೆ. ಈ ಮೂಲಕ ನಮ್ಮಮ್ಮನ ಆಸೆಯನ್ನೂ ನೆರವೇರಿಸಿದಂತಾಗುತ್ತದೆ’ ಎಂದಿದ್ದಾರೆ ರಾಘವೇಂದ್ರ ರಾಜ್ಕುಮಾರ್.
ಸಂಕ್ರಾಂತಿ ವಿಶೇಷ: ಪುನೀತ್ ರಾಜ್ಕುಮಾರ್ ನಟನೆಯ ‘ಜೇಮ್ಸ್’ ಚಿತ್ರದ ಹೊಸ ಪೋಸ್ಟರ್ ಬಿಡುಗಡೆ
ನಿರ್ದೇಶಕ ಚೇತನ್ ಹೇಳಿದ್ದೇನು?
'ಶಿವಣ್ಣ ಮತ್ತು ರಾಘಣ್ಣರ ಪಾತ್ರಗಳನ್ನು ಸುಖಾ ಸುಮ್ಮನೆ ತುರುಕಿಲ್ಲ. ಆ ಪಾತ್ರಗಳಿಗೆ ಅವಕಾಶವಿತ್ತು, ಬಹಳ ತೂಕದ ಪಾತ್ರಗಳನ್ನು ಅವರು ಪೋಷಿಸಿದ್ದಾರೆ. ಅವರು ಆಡಿರುವ ಮಾತುಗಳು ಸಹ ತೂಕವಾಗಿರುತ್ತವೆ. ಅಭಿಮಾನಿಗಳ ಎಷ್ಟೋ ವರ್ಷದ ಕನಸು ಈ ಮೂಲಕ ನನಸಾಗಿದೆ' ಅಂತ ನಿರ್ದೇಶಕ ಚೇತನ್ ಕುಮಾರ್ ಹೇಳಿದ್ದಾರೆ.