ಉಪೇಂದ್ರ ನಿರ್ದೇಶನ ಸಿನಿಮಾಗಳನ್ನು ಹೊಸಬರಿಗೆ ಮಾಡಿದ್ದರು. 'ತರಲೆ ನನ್ಮಗ' ಜಗ್ಗೇಶ್ ಅವರ ಮೊದಲ ಚಿತ್ರವಾಗಿದ್ದರೆ, 'ಶ್‌' ಕುಮಾರ್‌ ಗೋವಿಂದ್ ಅವರಿಗೆ ಚೊಚ್ಚಲ ಚಿತ್ರವಾಗಿತ್ತು. ಆಗಲೇ 20ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದ ಶಿವಣ್ಣನಿಗೆ ನಿರ್ದೇಶನ ಮಾಡುವ ಅವಕಾಶ ಉಪೇಂದ್ರ ಅವರಿಗೆ ಮೂರನೇ ಚಿತ್ರದಲ್ಲೇ ದಕ್ಕಿತ್ತು. ಶಿವಣ್ಣನಂತಹ ಸ್ಟಾರ್ ನಟನಿಗೆ ಸಿನಿಮಾ ಮಾಡುವಂತೆ, ಇಡಿ ಸ್ಯಾಂಡಲ್‌ವುಡ್‌ಗೇ ದೊಡ್ಡ ಬ್ಯಾನರ್‌ ಎನಿಸಿಕೊಂಡಿದ್ದ ನಿರ್ಮಾಣ ಸಂಸ್ಥೆಯಿಂದ ಆಫರ್ ಬಂದಾಗ, ಉಪ್ಪಿ ಅದನ್ನು ಸರಿಯಾಗಿಯೇ ಬಳಸಿಕೊಂಡರು. 'ಓಂ'ನಂತಹ ಮೆಗಾ ಹಿಟ್ ಸಿನಿಮಾವನ್ನು ನೀಡಿದರು. ಹಾಗಾದರೆ, 'ಓಂ' ಬರೀ ಸ್ಯಾಂಡಲ್‌ವುಡ್‌ನಲ್ಲಷ್ಟೇ ಸದ್ದು ಮಾಡಿತೇ? ಇಲ್ಲ, ಈ ಸಿನಿಮಾ ಆನಂತರ ಹಿಂದಿ, ತೆಲುಗು, ಭಾಷೆಗಳಿಗೆ ರಿಮೇಕ್ ಆಯಿತು. ಅಷ್ಟೇ ಅಲ್ಲ, 1995ರ ನಂತರ ಬಂದ ಎಷ್ಟೋ ರೌಡಿಸಂ ಸಿನಿಮಾಗಳಿಗೆ ಸ್ಪೂರ್ತಿಯಾಯಿತು. ಆ ಕುರಿತು ಇಲ್ಲಿದೆ ಮಾಹಿತಿ.
ತೆಲುಗಿನಲ್ಲಿ 'ಓಂಕಾರಂ'!
1995ರಲ್ಲಿ ತೆರೆಕಂಡ 'ಓಂ' ಕನ್ನಡದಲ್ಲಿ ಬ್ಲಾಕ್‌ ಬಸ್ಟರ್ ಆಯಿತು. ಆ ತಕ್ಷಣವೇ ಹೈದರಾಬಾದ್‌ನಿಂದ ಉಪ್ಪಿಗೆ ಕರೆಬಂತು. ಯಥಾವತ್‌ ತೆಲುಗಿಗೆ ರಿಮೇಕ್ ಮಾಡುವಂತೆ ಆಫರ್ ನೀಡಲಾಯಿತು. ಹೀರೋ ಆಗಿ ಡಾ. ರಾಜಶೇಖರ್ ಆಯ್ಕೆಯಾದರು. ಕನ್ನಡದಲ್ಲಿ ನಾಯಕಿಯಾಗಿದ್ದ ಪ್ರೇಮಾ, ಅಲ್ಲಿಯೂ ಹೀರೋಯಿನ್ ಆದರು. ಕನ್ನಡದ ಕಲಾವಿದರಾದ ಕೋಟೆ ಪ್ರಭಾಕರ್‌, ಟೆನ್ನಿಸ್‌ ಕೃಷ್ಣ ಕೂಡ 'ಓಂ' ತೆಲುಗು ರಿಮೇಕ್‌ನಲ್ಲಿ ನಟಿಸಿದರು. ವಿಶೇಷವೆಂದರೆ, 'ಓಂ' ಸಿನಿಮಾಗೆ ಹಂಸಲೇಖ ನೀಡಿದ್ದ ಹಾಡುಗಳನ್ನೇ ತೆಲುಗು ರಿಮೇಕ್‌ನಲ್ಲಿ ಬಳಕೆ ಮಾಡಲಾಯಿತು. ಆದರೆ, 'ಹೇ ದಿನಕರ..' ಹಾಡಿನ ಬದಲು, 'ಅಂಜದ ಗಂಡು' ಚಿತ್ರದ 'ಏಕೆ ಹೀಗಾಯ್ತೋ...' ತೆಲುಗಿನ ನೇಟಿವಿಟಿಗೆ ತಕ್ಕಂತೆ ಬಳಸಿಕೊಳ್ಳಲಾಯ್ತು. 'ಓಂಕಾರಂ' ತೆಲುಗಿನಲ್ಲಿ ಮಾತ್ರವಲ್ಲದೆ, ತಮಿಳಿಗೆ ಡಬ್ ಆಗಿಯೂ ತೆರೆಗೆ ಬಂತು. ಬಾಕ್ಸ್ಆಫೀಸ್‌ನಲ್ಲಿ ಯಶಸ್ಸನ್ನು ಕಂಡಿತು.
ಥಿಯೇಟರ್‌ನಲ್ಲಿ ಮಾತ್ರವಲ್ಲ ಸೋಶಿಯಲ್ ಮೀಡಿಯಾದಲ್ಲೂ ಹವಾ ಸೃಷ್ಟಿಸಿದ ಶಿವಣ್ಣನ 'ಓಂ'!
ಹಿಂದಿಯಲ್ಲಿ ಸನ್ನಿ ಹೀರೋ
ಬಾಲಿವುಡ್‌ ನಟ ಸನ್ನಿ ಡಿಯೋಲ್‌ 'ಓಂ' ಸಿನಿಮಾದ ರಿಮೇಕ್ ಆದ 'ಅರ್ಜುನ್ ಪಂಡಿತ್'ನಲ್ಲಿ ನಟಿಸಿದರು. ಅಚ್ಚರಿ ಎಂದರೆ, ಆ ತಂಡ ಇದನ್ನು ಅಧಿಕೃತ ರಿಮೇಕ್ ಅಂತ ಹೇಳಿಕೊಂಡಿಲ್ಲ. ಕನ್ನಡದ ಕಥೆಯನ್ನಷ್ಟೇ ಇಟ್ಟುಕೊಂಡು ಹಿಂದಿ ಪ್ರೇಕ್ಷಕರಿಗೆ ತಕ್ಕಂತೆ ಬದಲಾವಣೆ ಮಾಡಿಕೊಳ್ಳಲಾಯಿತು. ಅಸಲಿಗೆ, 'ಓಂ'ನಲ್ಲಿ ನಾಯಕಿಯಾಗಿ ಜೂಹಿ ಚಾವ್ಲಾ ನಟಿಸುತ್ತಾರೆ ಎಂಬ ವದಂತಿ ಇತ್ತಂತೆ. ಆದರೆ, ಹಿಂದಿಯ ಅರ್ಜುನ್ ಪಂಡಿತ್‌ನಲ್ಲಿ ಅವರೇ ನಾಯಕಿಯಾಗಿದ್ದರು. 'ಅರ್ಜುನ್ ಪಂಡಿತ್' 1999ರಲ್ಲಿ ತೆರೆಕಂಡು ಬಾಕ್ಸ್ ಆಫೀಸ್‌ ಹಿಟ್ ಆಯಿತು. ರಾಹುಲ್‌ ರವಾಲಿ ಇದರ ನಿರ್ದೇಶನ ಹೊಣೆ ಹೊತ್ತಿದ್ದರು. ಸೌರಭ್ ಶುಕ್ಲಾ, ಆಶೀಶ್ ವಿದ್ಯಾರ್ಥಿ, ಮುಕೇಶ್‌ ರಿಷಿ ಮುಂತಾದವರು ಪೋಷಕ ಪಾತ್ರಗಳಲ್ಲಿದ್ದರು.
'ಓಂ' ಚಿತ್ರಕ್ಕೆ ಬೆಳ್ಳಿ ಹಬ್ಬದ ಸಂಭ್ರಮ; ಈ ಮೆಗಾ ಹಿಟ್ ಸಿನಿಮಾ ಸೃಷ್ಟಿಸಿದ ದಾಖಲೆಗಳ ವಿವರ ಇಲ್ಲಿದೆ!
ಹಲವು ರೌಡಿಸಂ ಸಿನಿಮಾಗಳಿಗೆ ಸ್ಫೂರ್ತಿಯಾದ 'ಓಂ'
'ಓಂ' ತೆರೆಕಾಣುವವರೆಗೂ ಕನ್ನಡದಲ್ಲಿ ಹೇಳಿಕೊಳ್ಳುವಂತಹ ರೌಡಿಸಂ ಸಿನಿಮಾಗಳು ತೆರೆಗೆ ಬಂದಿರಲಿಲ್ಲ. ಅದರಲ್ಲೂ 90ರ ದಶಕದಲ್ಲಿ ಬೆಂಗಳೂರು ಭೂಗತ ಲೋಕ ಸಾಕಷ್ಟು ಪ್ರಚಲಿತದಲ್ಲಿತ್ತು. ಅಂತಹ ಸಮಯದಲ್ಲೇ 'ಓಂ' ಚಿತ್ರದಲ್ಲಿ ನಿಜ ರೌಡಿಗಳನ್ನೇ ತೋರಿಸಲಾಯಿತು. ಎಲ್ಲೋ ಅಪರೂಪಕ್ಕೊಮ್ಮೆ ರೌಡಿಗಳ ಬಗ್ಗೆ ಪೇಪರ್‌ನಲ್ಲಿ ಓದಿ ತಿಳಿದುಕೊಳ್ಳುತ್ತಿದ್ದ ಸಿನಿಪ್ರಿಯರು ಅವರನ್ನೆಲ್ಲ 'ಓಂ'ನಿಂದಾಗಿ ತೆರೆಮೇಲೆ ನೋಡಿ ಥ್ರಿಲ್ ಆಗಿದ್ದರು. 1995ರ ನಂತರ ಬಂದ ಕನ್ನಡದ ಎಷ್ಟೋ ಸಿನಿಮಾಗಳಿಗೆ 'ಓಂ' ಸ್ಪೂರ್ತಿಯಿದೆ ಎಂದರೆ ಅದು ಅತಿಶಯೋಕ್ತಿಯಲ್ಲ. ಹೀಗೂ ಸಿನಿಮಾ ಮಾಡಬಹುದು ಎಂದು ತೋರಿಸಿಕೊಟ್ಟ ಉಪೇಂದ್ರ ಆ ಮೂಲಕ ಹೊಸ ನಾಂದಿ ಹಾಡಿದ್ದರು. ಆದರೆ, ಭೂಗತ ಲೋಕದ ಕುರಿತು ಎಷ್ಟೇ ಸಿನಿಮಾ ಬಂದರೂ, 'ಓಂ' ಮಾತ್ರ 25 ವರ್ಷಗಳ ನಂತರವೂ ಅದೇ ಚಾರ್ಮ್‌ ಉಳಿಸಿಕೊಂಡಿದೆ.
ಶಿವಣ್ಣನ ಅಭಿಮಾನಿಗಳಿಗೆ ಲಾಕ್‌ಡೌನ್‌ನಲ್ಲೂ ಸಂಭ್ರಮ! ಅದಕ್ಕೆ ಕಾರಣ 'ಓಂ' ಸಿನಿಮಾ