ತಮ್ಮ ಸೀಕ್ರೆಟ್‌ ಕ್ರಷ್‌ ಯಾರೆಂದು ತಿಳಿಸಿದ 'ವಜ್ರಕಾಯ' ಬೆಡಗಿ ನಭಾ ನಟೇಶ್‌

ಸ್ಯಾಂಡಲ್‌ವುಡ್‌ನಲ್ಲಿ 'ವಜ್ರಕಾಯ' ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟವರು ನಟಿ ನಭಾ ನಟೇಶ್‌. ಆನಂತರ ಅವರು ಸೀದಾ ಟಾಲಿವುಡ್‌ ಕಡೆ ಪ್ರಯಾಣ ಬೆಳೆಸಿದರು. ಪುರಿ ಜಗನ್ನಾಥ್ ನಿರ್ದೇಶನ ಮಾಡಿದ್ದ 'ಇಸ್ಮಾರ್ಟ್ ಶಂಕರ್‌' ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವ ಅವಕಾಶ ಅವರಿಗೆ ಸಿಕ್ಕಿತ್ತು. ಆ ಸಿನಿಮಾದ ಯಶಸ್ಸಿನಿಂದ ಅವರಿಗೆ ಹಿಂತಿರುಗಿ ನೋಡುವ ಪ್ರಮೇಯವೇ ಬರಲಿಲ್ಲ. ಈಗವರು ಟಾಲಿವುಡ್‌ನ ಬ್ಯುಸಿ ನಟಿಯಾಗುವತ್ತ ದಾಪುಗಾಲು ಇಡುತ್ತಿದ್ದಾರೆ. ಸದ್ಯ ಅವರು ತಮ್ಮ ಸೀಕ್ರೆಟ್‌ ಕ್ರಷ್‌ ಬಗ್ಗೆ ತಿಳಿಸಿದ್ದಾರೆ. ಯಾರದು ಸೀಕ್ರೆಟ್‌ ಕ್ರಷ್‌?

ತಮ್ಮ ಹುಟ್ಟೂರಿನಲ್ಲಿ ಇರುವ ನಭಾ, ಈಚೆಗೆ ಮಾಧ್ಯಮದ ಜೊತೆ ಮಾತನಾಡುವಾಗ ತಮ್ಮ ಸೀಕ್ರೆಟ್‌ ಕ್ರಷ್ ಯಾರು ಎಂದು ತಿಳಿಸಿದ್ದಾರೆ. 'ನನ್ನ ಬಾಲ್ಯದ ದಿನಗಳಿಂದ ಕಾಲೇಜಿಗೆ ಹೋಗುವ ತನಕವೂ ಶಾರುಖ್ ಖಾನ್ ನನ್ನ ಸೀಕ್ರೆಟ್ ಕ್ರಷ್ ಆಗಿದ್ದರು. ಅವರ 'ಕುಚ್ ಕುಚ್ ಹೋತಾ ಹೈ' ಸಿನಿಮಾನವನ್ನು ಅದೆಷ್ಟು ಬಾರಿ ನೋಡಿದ್ದೇನೋ. ನನಗಂತೂ ನೆನಪಿಲ್ಲ. ಬಾಲಿವುಡ್‌ ಬಾದ್‌ಷಾ ಮೇಲೆ ಅಷ್ಟೊಂದು ಕ್ರಷ್ ಆಗಿತ್ತು. ಆ ವಯಸ್ಸಿನಲ್ಲಿ ಈ ಥರದ ಸೀಕ್ರೆಟ್ ಕ್ರಷ್‌ಗಳು ಎಲ್ಲರಿಗೂ ಇರುವುದು ಕಾಮನ್' ಎಂದು ಅವರು ಹೇಳಿದ್ದಾರೆ. ಒಂದುವೇಳೆ ಶಾರುಖ್ ಜೊತೆ ನಟಿಸುವ ಅವಕಾಶ ಸಿಕ್ಕರೆ, ಒಂದು ಕ್ಷಣವೂ ಯೋಚಿಸದೆ ಅವರು ಸಿನಿಮಾವನ್ನು ಒಪ್ಪಿಕೊಂಡು ಬಿಡುತ್ತಾರಂತೆ.

ಇನ್ನು, ತೆಲುಗಿನಲ್ಲಿ ಬ್ಯುಸಿಯಾದ ಮೇಲೆ ಸದ್ಯ ಕನ್ನಡದತ್ತ ಅವರು ಮುಖ ಮಾಡಿಲ್ಲ. 'ಇಸ್ಮಾರ್ಟ್‌ ಶಂಕರ್' ಚಿತ್ರದ ಭರ್ಜರಿ ಗೆಲುವಿನ ನಂತರ ರವಿ ತೇಜ ಅವರ 'ಡಿಸ್ಕೋ ರಾಜ' ಚಿತ್ರದಲ್ಲಿ ನಟಿಸಿದರು. ಸದ್ಯ ಅವರ ಗಮನವೆಲ್ಲ ಸಾಯಿ ಧರಮ್‌ ತೇಜ ಜೊತೆ ನಟಿಸಿರುವ 'ಸೋಲೋ ಬ್ರತುಕೆ ಸೋ ಬೆಟರ್‌' ಚಿತ್ರದ ಮೇಲೆ ಇದೆ. ಹಾಡುಗಳ ಮೂಲಕವೇ ಗಮನಸೆಳೆದ ಈ ಸಿನಿಮಾವನ್ನು ಬಿವಿಎಸ್‌ಎನ್‌ ಪ್ರಸಾದ್ ನಿರ್ಮಿಸಿದ್ದಾರೆ. ಸದ್ಯ ಸಿನಿಮಾ ತೆರೆಗೆ ಬರುವುದಕ್ಕೆ ಸಜ್ಜಾಗಿದೆ. ಆದರೆ, ಕೊರೊನಾ ಕಾರಣದಿಂದಾಗಿ ಇನ್ನೂ ತೆರೆ ಕಂಡಿಲ್ಲ. ಈ ಮಧ್ಯೆ 'ಅಲ್ಲುಡು ಅಧುರ್ಸ್‌' ಅನ್ನೋ ಮತ್ತೊಂದು ಸಿನಿಮಾದಲ್ಲೂ ನಭಾ ಬಣ್ಣ ಹಚ್ಚಿದ್ದಾರೆ.

ಸ್ತ್ರೀವಾದ ಅಂದರೆ ಉಗ್ರವಾದ ಅಲ್ಲ ಎಂದ ಕನ್ನಡ ನಟಿ ನಭಾ ನಟೇಶ್!

ಈ ನಡುವೆ ನಭಾ ಕುರಿತಂತೆ ಕೇಳಿಬಂದಿರುವ ಇನ್ನೊಂದು ಬ್ರೇಕಿಂಗ್ ನ್ಯೂಸ್‌ ಎಂದರೆ, ಅವರು ನಟ ನಿತಿನ್ ಜೊತೆಗೂ ಒಂದು ಸಿನಿಮಾ ಮಾಡಲಿದ್ದಾರೆ. ಹಿಂದಿಯಲ್ಲಿ ತೆರೆಕಂಡು ಸೂಪರ್ ಹಿಟ್ ಎನಿಸಿಕೊಂಡಿದ್ದ 'ಅಂಧಾಧುನ್' ಚಿತ್ರವು ತೆಲುಗಿಗೆ ರಿಮೇಕ್ ಆಗಲಿದೆ. ಹಿಂದಿಯಲ್ಲಿ ರಾಧಿಕಾ ಆಪ್ಟೆ ನಿಭಾಯಿಸಿದ್ದ ಪಾತ್ರವನ್ನು ತೆಲುಗಿನಲ್ಲಿ ನಭಾ ಮಾಡಲಿದ್ದಾರೆ.

ಟಾಲಿವುಡ್‌ನಲ್ಲೇ ಬ್ಯುಸಿಯಾದ ಕನ್ನಡತಿ ನಭಾ ನಟೇಶ್‌! ಶುರುವಾಯ್ತು ಮತ್ತೊಂದು ತೆಲುಗು ಸಿನಿಮಾ!!