ಶ್ರೀಲೀಲಾ ಈಗ ಕನ್ನಡ ಚಿತ್ರರಂಗದ 'ದುಬಾರಿ' ನಟಿ! ಧ್ರುವ ಸರ್ಜಾಗೆ ಜೋಡಿಯಾದ 'ಕಿಸ್‌' ಬೆಡಗಿ!

ಎ.ಪಿ. ಅರ್ಜುನ್‌ ನಿರ್ದೇಶನದ ಕಿಸ್‌ ಮತ್ತು ಶ್ರೀಮುರಳಿ ನಟನೆಯ 'ಭರಾಟೆ' ಸಿನಿಮಾದಲ್ಲಿ ನಾಯಕಿಯಾಗಿದ್ದ ಹೊಸ ಪ್ರತಿಭೆ ಶ್ರೀಲೀಲಾ ಅವರಿಗೆ ಸಖತ್‌ ಬೇಡಿಕೆ ಸೃಷ್ಟಿ ಆಗಿದೆ. ಧ್ರುವ ಸರ್ಜಾ ಜೊತೆ ನಟಿಸುವ ಅವಕಾಶ ಅವರನ್ನು ಹುಡುಕಿಕೊಂಡು ಬಂದಿದೆ. ಆರಂಭದಲ್ಲಿಯೇ ಹೀಗೆ ಸ್ಟಾರ್‌ ಸಿನಿಮಾಗಳಲ್ಲಿ ಬಣ್ಣ ಹಚ್ಚುವ ಚಾನ್ಸ್‌ ಅವರಿಗೆ ಸಿಕ್ಕಿದೆ.

ಹೌದು, ಕೆಲವೇ ದಿನಗಳ ಹಿಂದೆ ಧ್ರುವ ಸರ್ಜಾ ನಾಯಕತ್ವದ 'ದುಬಾರಿ' ಸಿನಿಮಾ ಲಾಂಚ್‌ ಆಗಿತ್ತು. ನಂದಕಿಶೋರ್‌ ನಿರ್ದೇಶನ ಮಾಡಲಿರುವ ಈ ಸಿನಿಮಾದಲ್ಲಿ ನಾಯಕಿ ಯಾರಾಗಬಹುದು ಎಂಬ ಕೌತುಕ ಅಭಿಮಾನಿಗಳಲ್ಲಿ ಮನೆ ಮಾಡಿತ್ತು. ಅದಕ್ಕೀಗ ತೆರೆ ಬಿದ್ದಿದೆ. ಶ್ರೀಲೀಲಾ ಅವರನ್ನು ನಾಯಕಿಯನ್ನಾಗಿ ಆಯ್ಕೆ ಮಾಡಿಕೊಂಡಿರುವ ಬಗ್ಗೆ ನಿರ್ದೇಶಕ ನಂದಕಿಶೋರ್‌ ಮಾಹಿತಿ ಹಂಚಿಕೊಂಡಿದ್ದಾರೆ.

'ಧ್ರುವ ಅವರೊಂದಿಗೆ ಈವರೆಗೂ ಅಭಿನಯಿಸದ ಹೊಸ ನಟಿಯನ್ನು ಆಯ್ಕೆ ಮಾಡಿಕೊಳ್ಳಬೇಕು ಎಂಬುದೇ ನಮ್ಮ ಉದ್ದೇಶವಾಗಿತ್ತು. ತಮ್ಮ ಸಿನಿಮಾಗಳ ಮೂಲಕ ಶ್ರೀಲೀಲಾ ಈಗಾಗಲೇ ಪ್ರೇಕ್ಷಕರ ಮನ ಗೆದ್ದಿದ್ದಾರೆ. ಹಾಗಾಗಿ ಅವರೇ ಸೂಕ್ತ ಆಯ್ಕೆ ಎನಿಸಿತು. ಅವರಿಬ್ಬರ ಜೋಡಿ ಚೆನ್ನಾಗಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ನಾವು ಕನ್ನಡದ ಪ್ರತಿಭೆಗೆ ಅವಕಾಶ ನೀಡಬೇಕು ಎಂದುಕೊಂಡಿದ್ದೆವು' ಎಂದಿದ್ದಾರೆ ನಂದಕಿಶೋರ್‌.

also read: ಸಿನಿಮಾ ರಿಲೀಸ್‌ಗೂ ಮುಂಚೆಯೇ ದೊಡ್ಡ ಸದ್ದು ಮಾಡಿದಳು ಕರ್ನಾಟಕದ 'ಕಿಸ್' ಸುಂದರಿ! ಯಾರು ಈಕೆ?

ಬಹುನಿರೀಕ್ಷಿತ 'ಪೊಗರು' ಸಿನಿಮಾದಲ್ಲಿ ನಂದಕಿಶೋರ್‌ ಮತ್ತು ಧ್ರುವ ಜೊತೆಯಾಗಿ ಕೆಲಸ ಮಾಡಿದ್ದಾರೆ. ಎರಡನೇ ಬಾರಿಗೆ ಅವರಿಬ್ಬರ ಕಾಂಬಿನೇಷನ್‌ನಲ್ಲಿ 'ದುಬಾರಿ' ಸಿನಿಮಾ ಮೂಡಿಬರುತ್ತಿದೆ. ಕೊರೊನಾ ವೈರಸ್‌ ಹಾವಳಿ ಹೇಗಿರುತ್ತದೆ ಎಂಬುದನ್ನು ನೋಡಿಕೊಂಡು, 2021ರ ಜನವರಿಯಲ್ಲಿ ಶೂಟಿಂಗ್‌ ಆರಂಭಿಸಬೇಕು ಎಂಬ ಲೆಕ್ಕಾಚಾರದಲ್ಲಿದ್ದಾರೆ ನಂದಕಿಶೋರ್‌. ಫೆಬ್ರವರಿ ವೇಳೆಗೆ ಶ್ರೀಲೀಲಾ ಕೂಡ ಶೂಟಿಂಗ್‌ ಸೆಟ್‌ ಸೇರಿಕೊಳ್ಳಲಿದ್ದಾರೆ.

also read: ಮಜಾ ಟಾಕೀಸ್‌ಗೆ ಬಂದ ಪ್ರೇಕ್ಷಕರ ಫೇವರಿಟ್ ನಟಿ ಶ್ರೀಲೀಲಾ, ಸಂಗೀತಾ ಶೃಂಗೇರಿ!