ಡಾ. ವಿಷ್ಣುವರ್ಧನ್‌ ಪುಣ್ಯತಿಥಿಯಂದು ಜಗ್ಗೇಶ್‌ ಮತ್ತು 'ಕಿಚ್ಚ' ಸುದೀಪ್‌ ಹೇಳಿದ್ದೇನು?

ಡಾ. ವಿಷ್ಣುವರ್ಧನ್ ಅವರ ಬಗ್ಗೆ ಕನ್ನಡ ಚಿತ್ರರಂಗದಲ್ಲಿ ಅಪಾರವಾದ ಪ್ರೀತಿಯಿದೆ. ಇವತ್ತಿಗೆ ವಿಷ್ಣು ಇಹಲೋಕ ತ್ಯಜಿಸಿ 10 ವರ್ಷ ಕಳೆದಿವೆ. ಆದರೂ, ಅವರು ಎಲ್ಲರೆದೆಯಲ್ಲೂ ಸದಾ ಜೀವಂತ. ಈ ಸಂದರ್ಭದಲ್ಲಿ ನಟರಾದ ಜಗ್ಗೇಶ್ ಮತ್ತು 'ಕಿಚ್ಚ' ಸುದೀಪ್‌ ಅವರು ವಿಷ್ಣುವರ್ಧನ್‌ ಅವರನ್ನು ನೆನೆದಿದ್ದಾರೆ.

ಮುದ್ದಾದ ವ್ಯಕ್ತಿ ವಿಷ್ಣು
ವಿಷ್ಣುವರ್ಧನ್‌ ಅವರನ್ನು ಬಹಳ ಹತ್ತಿರದಿಂದ ನೋಡಿರುವ ನಟ ಜಗ್ಗೇಶ್‌. ವಿಶೇಷವೆಂದರೆ, ವಿಷ್ಣು ಮತ್ತು ಜಗ್ಗೇಶ್‌ ನಡುವೆ ಒಂದು ವಿಚಾರಕ್ಕೆ ಸಾಮ್ಯತೆ ಇದೆಯಂತೆ. ಅದೇನೆಂದರೆ, ಇಬ್ಬರದ್ದು ವೃಶ್ಚಿಕ ರಾಶಿ ಮತ್ತು ಜೇಷ್ಠ ನಕ್ಷತ್ರ. 'ಎಷ್ಟು ಮುದ್ದಾಗಿ ಇದ್ದಾನೆ ಈ ಮನುಷ್ಯ ಎನ್ನುತ್ತಿತ್ತು ನನ್ನ ಮನ! ಅನೇಕ ಬಾರಿ ಇಬ್ಬರು ಸೇರಿ ಮಾತಾಡಿದ ದಿನವುಂಟು! ನಾವಿಬ್ಬರೂ ಒಂದೆ ರಾಶಿ ನಕ್ಷತ್ರ "ಜೇಷ್ಟ ವೃಶ್ಚಿಕ! ಭಾವನಾಜೀವಿ ಏಕಾಂತ ಪ್ರಿಯ, ಆಧ್ಯಾತ್ಮಿಕವಾಗಿ ತನ್ನ ತೊಡಗಿಸಿಕೊಂಡ ಚೇತನ. ಹಾಸ್ಯಪ್ರಿಯ ಆದರೆ ಸ್ವಲ್ಪ ವ್ಯತ್ಯಾಸ ಕಂಡರೆ ಮೌನಿ. ಕರ್ತವ್ಯ ಮುಗಿಸಿ ಹೋಗಿ 10 ವರ್ಷವಾಯಿತು ಓಂ ಶಾಂತಿ' ಎಂದು ಜಗ್ಗೇಶ್‌ ಟ್ವೀಟ್ ಮಾಡಿದ್ದಾರೆ.


ನಮ್ಮೆದೆಯ ನಂದಾದೀಪ
ವಿಷ್ಣುವರ್ಧನ್‌ ಅವರನ್ನು ಕಂಡರೆ ಸುದೀಪ್‌ಗೆ ಅಪಾರವಾದ ಪ್ರೀತಿ-ಗೌರವ. ಇಬ್ಬರು ಜೊತೆಯಾಗಿ 'ಮಾತಾಡ್ ಮಾತಾಡು ಮಲ್ಲಿಗೆ' ಸಿನಿಮಾದಲ್ಲಿ ನಟಿಸಿದ್ದರು. ಪುಣ್ಯತಿಥಿಯಂದು ವಿಷ್ಣು ಅವರನ್ನು ನೆನೆದಿರುವ ಸುದೀಪ್‌, 'ಅಪ್ಪಾಜಿ.. ಇಂದು ನಿಮ್ಮ 10ನೇ ಪುಣ್ಯಸ್ಮರಣೆ! ಆದ್ರೆ ಮರೆತವರಿಗೆ ಮಾತ್ರ ಸ್ಮರಣೆ. ನೀವು ನಮ್ಮೆದೆಯ ನಂದಾದೀಪ. ಈ 10 ವರ್ಷದಲ್ಲಿ ಒಂದೇ ಒಂದು ದಿನವೂ ಈ ನಾಡು, ಚಿತ್ರರಂಗ, ನಿಮ್ಮ ಅಭಿಮಾನಿಗಳು ಮತ್ತು ನಾನು ನಿಮ್ಮನ್ನು ಮರೆತೇ ಇಲ್ಲ. ನಿಮ್ಮ ಹೆಸರು ಅತ್ಯಂತ ಪ್ರಕಾಶಮಾನವಾಗಿ ಬೆಳಗುತ್ತಲೇ ಇದೆ. ಆ ಬೆಳಕು ಎಲ್ಲರಿಗೂ ದಾರಿದೀಪವಾಗಿದೆ' ಎಂದು ಟ್ವೀಟ್ ಮಾಡಿದ್ದಾರೆ.