ತಮಿಳಿನಲ್ಲಿ ಕನ್ನಡಿಗನ ಸಿನಿಮಾ!
ಜಿ.ಆರ್. ಗೋಪಿನಾಥ್ ಹಾಸನದ ಗೊರೂರಿನವರು. ಭಾರತೀಯ ಸೇನೆಗೆ ಸೇರಿದ್ದ ಅವರು ನಂತರದ ದಿನಗಳಲ್ಲಿ ಕ್ಯಾಪ್ಟನ್ ಆಗುತ್ತಾರೆ. ಅಲ್ಲಿಂದ ಮರಳಿದ ಮೇಲೆ ವಿಮಾನಯಾನ ಕ್ಷೇತ್ರಕ್ಕೆ ಎಂಟ್ರಿ ನೀಡಿ, 'ಏರ್ ಡೆಕ್ಕನ್' ವಿಮಾನಯಾನ ಸಂಸ್ಥೆಯನ್ನು ಆರಂಭಿಸುತ್ತಾರೆ. ಕಡಿಮೆ ವೆಚ್ಚದಲ್ಲಿ ವಿಮಾನಯಾನ ಮಾಡುವ ಈ ಯೋಜನೆಯು ಅನೇಕರಿಗೆ ಸ್ಫೂರ್ತಿಯಾಗುತ್ತದೆ. ಸದ್ಯ ಇದೇ ಅಂಶವನ್ನು ಇಟ್ಟುಕೊಂಡು ಅದಕ್ಕೆ 'ಸೂರರೈ ಪೊಟ್ಟರು' ಮೂಲಕ ಸಿನಿಮಾರೂಪ ನೀಡಲಾಗಿದೆಯಂತೆ.
ಗೋಪಿನಾಥ್ ಪಾತ್ರದಲ್ಲಿ ಸೂರ್ಯ
ಮೂಲಗಳ ಪ್ರಕಾರ, ಗೋಪಿನಾಥ್ ಪಾತ್ರವನ್ನು ಸೂರ್ಯ ನಿಭಾಯಿಸಿದ್ದಾರೆ. ಆದರೆ, ಚಿತ್ರದಲ್ಲಿ ಅವರ ಪಾತ್ರದ ಹೆಸರು ನೆಡುಮಾರನ್‌ ಎಂದಾಗಿದೆ. ಈ ಚಿತ್ರಕ್ಕೆ 'ಇರುದಿ ಸುಟ್ರು' ಖ್ಯಾತಿಯ ಸುಧಾ ಕೊಂಗರಾ ನಿರ್ದೇಶನ ಮಾಡಿದ್ದಾರೆ. ಸ್ವತಃ ಸೂರ್ಯ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ.
Twitter-VISHNU SURYIA
ಕನ್ನಡಕ್ಕೆ ಡಬ್ ಮಾಡುವಂತೆ ಅಭಿಯಾನ
ಈಗಾಗಲೇ 'ಸೈ ರಾ ನರಸಿಂಹ ರೆಡ್ಡಿ', 'ದಬಾಂಗ್ 3' ಥರದ ಬಿಗ್ ಸಿನಿಮಾಗಳು ಕನ್ನಡಕ್ಕೆ ಡಬ್ ಆಗಿವೆ. ಈಗ ಕನ್ನಡಿಗನ ಕಥೆ ಇರುವ ಸಿನಿಮಾವನ್ನು ಯಾಕೆ ಕನ್ನಡಕ್ಕೆ ಡಬ್ ಮಾಡಬಾರದು ಎಂಬ ಒತ್ತಾಯ ಸೋಷಿಯಲ್ ಮೀಡಿಯಾದಲ್ಲಿ ಕೇಳಿಬಂತು. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಚಿತ್ರತಂಡ, 'ಸೂರರೈ ಪೊಟ್ಟರು' ಚಿತ್ರವನ್ನು ಕನ್ನಡಕ್ಕೆ ಡಬ್ ಮಾಡುವುದಕ್ಕೆ ಮುಂದಾಗಿದೆ.
Twitter-Ramesh Bala
ಕನ್ನಡದಲ್ಲಿ 'ಶೂರರ ಕೊಂಡಾಡು'
ತಮಿಳಿನಲ್ಲಿ ಈ ಸಿನಿಮಾದ ಶೀರ್ಷಿಕೆ 'ಸೂರರೈ ಪೊಟ್ಟರು' ಎಂದಿದೆ. ಅದರರ್ಥ, ಶೂರರನ್ನು ಕೊಂಡಾಡು ಎಂದು. ಹಾಗಾಗಿ, ಕನ್ನಡದಲ್ಲಿ 'ಶೂರರ ಕೊಂಡಾಡು' ಎಂದು ಶೀರ್ಷಿಕೆ ಇಡಲಾಗಿದೆ. ಇನ್ನು, ಚಿತ್ರವನ್ನು ಡಬ್ ಮಾಡುವುದಾಗಿ ಚಿತ್ರತಂಡವೇ ಅಧಿಕೃತವಾಗಿ ಮಾಹಿತಿ ನೀಡಿದೆ. ಈಗಾಗಲೇ ಸೋಷಿಯಲ್ ಮೀಡಿಯಾದಲ್ಲಿ ಕನ್ನಡ ಪೋಸ್ಟರ್‌ಗಳು ವೈರಲ್ ಆಗಿವೆ.