65ರ ಅವತಾರದಲ್ಲಿ ವಿಜಯ್‌ ರಾಘವೇಂದ್ರ!

ವಿಜಯ ರಾಘವೇಂದ್ರ ಈ ಸಿನಿಮಾದಲ್ಲಿ ಲೇಖಕನ ಪಾತ್ರ ಮಾಡಿದ್ದಾರೆ. ಸಣ್ಣ ವಯಸ್ಸಿನಲ್ಲೇ ಮುದುಕನ ಪಾತ್ರ ಮಾಡಿ ಕುತೂಹಲ ಮೂಡಿಸಿದ್ದಾರೆ. ಗ್ರೀಷ್ಮಾ ಎಂಬ ನವನಾಯಕಿ ಈ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟಿದ್ದಾರೆ.

ಅಚ್ಚರಿಪಡುವಂತಹ ಎರಡು ಗೆಟಪ್‌ನಲ್ಲಿ ವಿಜಯ ರಾಘವೇಂದ್ರ ಕಾಣಿಸಿಕೊಂಡಿದ್ದಾರೆ. ಅದರಲ್ಲಿ65ರ ವಯಸ್ಸಿನ ಪಾತ್ರವೂ ಒಂದು. 'ಮಾಲ್ಗುಡಿ ಡೇಸ್‌ ಎನ್ನುವುದು ನಮ್ಮ ಸಿನಿಮಾದಲ್ಲಿಕಾಲ್ಪನಿಕ ಊರು. ಅದಕ್ಕೊಂದು ಭವ್ಯ ಇತಿಹಾಸವಿದೆ. ಮಲೆನಾಡಿನ ಈ ಊರಿನಲ್ಲಿ ಲಕ್ಷ್ಮೀ ನಾರಾಯಣ ಮಾಲ್ಗುಡಿ ಎಂಬ 65ರ ವಯಸ್ಸಿನ ಲೇಖಕ. ಈ ಬರಹಗಾರ ಏಕಾಏಕಿ ತನ್ನ ಬರವಣಿಗೆ ನಿಲ್ಲಿಸಿ ನಿವೃತ್ತಿ ಘೋಷಿಸುತ್ತಾನೆ. ಅನಂತರ ಅವನ ಜೀವನದಲ್ಲಿ ಹಲವು ಘಟನೆಗಳು ಎದುರಾಗುತ್ತವೆ. ಅವುಗಳನ್ನು ಆತ ಹೇಗೆ ಸ್ವೀಕರಿಸುತ್ತಾನೆ ಎನ್ನುವುದೇ ಸಿನಿಮಾ' ಎಂದು ನಿರ್ದೇಶಕರು ತಿಳಿಸಿದ್ದಾರೆ.

ವಿಜಯ ರಾಘವೇಂದ್ರ ಈ ಸಿನಿಮಾದಲ್ಲಿ ಮಾಡಿರುವ ಪಾತ್ರ ವಿಶೇಷವಾಗಿದೆ. ವಯಸ್ಸಿಗೂ ಮೀರಿದ ಪಾತ್ರವನ್ನು ನಿಭಾಯಿಸಿರುವುದು ಒಂದು ಸವಾಲು. 'ಕಥಾನಾಯಕನ ಪಾತ್ರವೇ ಸಿನಿಮಾದ ಪ್ರಧಾನ ಪಾತ್ರ. ಇಂಥ ಪಾತ್ರ ಯಾರು ಮಾಡಬಲ್ಲರು ಎಂದಾಗ ಥಟ್ಟನೆ ನೆನಪಾಗಿದ್ದು ವಿಜಯ ರಾಘವೇಂದ್ರ ಅವರು. ಪಾತ್ರ ಮತ್ತು ಕಥೆ ಕೇಳಿ ಅವರೂ ಇಷ್ಟಪಟ್ಟರು. ನನ್ನ ಪ್ರಕಾರ ಅವರು ಪಾತ್ರದಲ್ಲಿ ಜೀವಿಸಿದ್ದಾರೆ' ಎಂದು ಕಿಶೋರ್‌ ಮೂಡಬಿದಿರೆ ಹೇಳಿದ್ದಾರೆ.

ಈಗಾಗಲೇ ಟ್ರೇಲರ್‌ ಮತ್ತು ಪೋಸ್ಟರ್‌ ನೋಡಿದ ಅನೇಕರು ಮೆಚ್ಚುಗೆ ಸೂಚಿಸಿದ್ದಾರೆ. ತುಳುವಿನಲ್ಲಿ ಶತದಿನ ಕಂಡ 'ಅಪ್ಟೆ ಟೀಚರ್‌' ಎಂಬ ಸಿನಿಮಾ ಮಾಡಿದ್ದ ಕಿಶೋರ್‌, ಈ ಚಿತ್ರದ ಮೂಲಕ ಕನ್ನಡ ಸಿನಿಮಾ ರಂಗಕ್ಕೂ ಪ್ರವೇಶ ಮಾಡಿದ್ದಾರೆ. ಟೀಸರ್‌ ಮತ್ತು ಟ್ರೇಲರ್‌ ಮೂಲಕ ಭರವಸೆಯನ್ನೂ ಮೂಡಿಸಿದ್ದಾರೆ.