ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ನಟ ವಿನಾಯಕ್‌ ಜೋಷಿ! ಕೊರೊನಾ ಭೀತಿ ನಡುವೆ ಸರಳ ವಿವಾಹ!

ಅನೇಕ ಧಾರಾವಾಹಿ ಮತ್ತು ಸಿನಿಮಾಗಳಲ್ಲಿ ನಟಿಸಿ ಖ್ಯಾತಿ ಪಡೆದಿರುವ ವಿನಾಯಕ್‌ ಜೋಷಿ ಅವರು ತಮ್ಮ ಬಾಲ್ಯದ ಗೆಳತಿ ವರ್ಷಾ ಬೆಳವಾಡಿ ಜೊತೆ ವೈವಾಹಿಕ ಜೀವನ ಆರಂಭಿಸಿದ್ದಾರೆ. ಕೊರೊನಾ ವೈರಸ್‌ ಹರಡುವ ಭೀತಿ ನಡುವೆಯೂ ಶುಕ್ರವಾರ (ಆ.28) ಅವರ ವಿವಾಹ ನರೆವೇರಿದೆ. ಕೆಲವೇ ಮಂದಿ ಆಪ್ತರ ಸಮ್ಮುಖದಲ್ಲಿ ಈ ಜೋಡಿ ಸಪ್ತಪದಿ ತುಳಿದಿದೆ.

ಬೆಂಗಳೂರಿನ ದೇವಸ್ಥಾನವೊಂದರಲ್ಲಿ ವಿನಾಯಕ್‌ ಜೋಷಿ-ವರ್ಷಾ ಬೆಳವಾಡಿ ಮದುವೆ ನಡೆದಿದೆ. ಬೆಳಗ್ಗೆ 9 ಗಂಟೆ ಸುಮಾರಿಗೆ ಹಿಂದು ಸಂಪ್ರದಾಯದ ಪ್ರಕಾರ ಶಾಸ್ತ್ರೋಕ್ತವಾಗಿ ಈ ಶುಭಕಾರ್ಯ ನಡೆದಿದೆ. ನಟಿಯರಾದ ಮೇಘನಾ ಗಾಂವ್ಕರ್‌, ನೀತು ಸೇರಿದಂತೆ ಕೆಲವೇ ಕೆಲವು ಜನರು ಭಾಗವಹಿಸಿದ್ದರು. ಕೊರೊನಾ ನಿಯಂತ್ರಿಸಲು ಸರ್ಕಾರ ಜಾರಿಗೊಳಿಸಿರುವ ನಿಯಮಗಳ ಅನುಸಾರ ಹೆಚ್ಚು ಜನರಿಗೆ ಆಮಂತ್ರಣ ನೀಡಲು ಸಾಧ್ಯವಿಲ್ಲದ ಕಾರಣ, ಮದುವೆ ವೀಕ್ಷಿಸಲು ಆನ್‌ಲೈನ್‌ ಮೂಲಕ ವ್ಯವಸ್ಥೆ ಮಾಡಲಾಗಿತ್ತು.

ಅಂದಹಾಗೆ, ವಿನಾಯಕ್‌ ಜೋಷಿ ಕೈ ಹಿಡಿದಿರುವ ವರ್ಷಾ ಬೆಳಬಾಡಿ ಕೂಡ ಸೆಲೆಬ್ರಿಟಿ. ಹಾಗಂತ ಅವರು ಸಿನಿಮಾ ಕ್ಷೇತ್ರದಲ್ಲಿ ಹೆಚ್ಚು ಗುರುತಿಸಿಕೊಂಡಿಲ್ಲ. ಅವರು ರಾಷ್ಟ್ರ ಮಟ್ಟದ ಬ್ಯಾಡ್ಮಿಂಟನ್‌ ಆಟಗಾರ್ತಿ. ಅನೇಕ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದಾರೆ. ಪ್ರಸ್ತುತ ಒಂದು ಅಕಾಡೆಮಿಯಲ್ಲಿ ಕೋಚ್‌ ಆಗಿ ಕೆಲಸ ಮಾಡುತ್ತಿದ್ದಾರೆ. ಕಳೆದ ವರ್ಷ ಅವರು ವಿಶ್ವ ರ‍್ಯಾಂಕಿಂಗ್‌ನಲ್ಲಿ 120ನೇ ಸ್ಥಾನದಲ್ಲಿದ್ದರು. ಒಂದು ತಮಿಳು ಚಿತ್ರದಲ್ಲಿ ವರ್ಷಾ ನಟಿಸಿದ್ದು, ಆ ಸಿನಿಮಾ ರಿಲೀಸ್‌ ಆಗುವುದು ಬಾಕಿ ಇದೆ.

ವಿಶೇಷವೇನೆಂದರೆ, ವಿನಾಯಕ್‌ ಮತ್ತು ವರ್ಷಾ ಬಾಲ್ಯದ ಸ್ನೇಹಿತರು. ಚಿಕ್ಕ ವಯಸ್ಸಿನಲ್ಲಿ ಇಬ್ಬರೂ ಜೊತೆಯಾಗಿ ಡ್ಯಾನ್ಸ್‌ ಮಾಡಿದ್ದರಂತೆ. ಆದರೆ ನಂತರದ ವರ್ಷಗಳಲ್ಲಿ ಪರಸ್ಪರ ಸಂಪರ್ಕ ಇರಲಿಲ್ಲ. ಆಮೇಲೆ ಬರೋಬ್ಬರಿ 25 ವರ್ಷಗಳ ಬಳಿಕ ಕಾಮನ್‌ ಫ್ರೆಂಡ್‌ ಮೂಲಕ ಮತ್ತೆ ಅವರಿಬ್ಬರ ಭೇಟಿ ಆಯಿತು. ನಂತರ ಇಬ್ಬರ ನಡುವೆ ಪ್ರೀತಿ ಚಿಗುರಿ, ಅದಕ್ಕೆ ಎರಡೂ ಕುಟುಂಬದ ಒಪ್ಪಿಗೆ ಸಿಕ್ಕಿತು.