ಚಿತ್ರಮಂದಿರಗಳಲ್ಲಿ ಮತ್ತೆ 'ಕೆಜಿಎಫ್‌' ಅಬ್ಬರ! ಅಭಿಮಾನಿಗಳು ಕೇಳಿದ್ದೊಂದು, ಸಿಕ್ಕಿದ್ದು ಮತ್ತೊಂದು!

ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ ಈ ದಸರಾ ಹಬ್ಬಕ್ಕೆ ಸರಿಯಾಗಿ 'ಕೆಜಿಎಫ್‌: ಚಾಪ್ಟರ್‌ 2' ಬಿಡುಗಡೆ ಆಗಬೇಕಿತ್ತು. ಅ.23ರಂದು ಅದ್ದೂರಿಯಾಗಿ ರಿಲೀಸ್‌ ಮಾಡಲು ತಂಡ ಪ್ಲ್ಯಾನ್‌ ಹಾಕಿಕೊಂಡಿತ್ತು. ಆದರೆ ಕೊರೊನಾ ವೈರಸ್‌ ಹಾವಳಿಯಿಂದಾಗಿ ಅದು ಸಾಧ್ಯವಾಗಲಿಲ್ಲ. ಹಾಗಂತ ಯಶ್‌ ಅಭಿಮಾನಿಗಳು ಬೇಸರಪಟ್ಟುಕೊಳ್ಳಬೇಕಿಲ್ಲ. 'ಕೆಜಿಎಫ್‌' ತಂಡದಿಂದ ಹೊಸ ಆಫರ್‌ ನೀಡಲಾಗಿದೆ.

ಹೌದು, 'ಕೆಜಿಎಫ್‌: ಚಾಪ್ಟರ್‌ 2' ಬದಲಿಗೆ 'ಕೆಜಿಎಫ್‌: ಚಾಪ್ಟರ್‌ 1' ಮರುಬಿಡುಗಡೆ ಆಗಿದೆ. ದಸರಾ ಹಬ್ಬದ ಗಮ್ಮತ್ತು ಹೆಚ್ಚಿಸಲು ಥಿಯೇಟರ್‌ನಲ್ಲಿ ಕೆಜಿಎಫ್‌ ಸದ್ದು ಮಾಡುತ್ತಿದೆ. ರಾಜ್ಯದ ಹಲವು ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಬೆಂಗಳೂರಿನ ಅನೇಕ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಜನರು ಈ ಚಿತ್ರವನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ. ದಿನವೊಂದಕ್ಕೆ 20ಕ್ಕೂ ಹೆಚ್ಚು ಪರದೆಗಳಲ್ಲಿ ಪ್ರದರ್ಶನ ಆಗುತ್ತಿದೆ.

ಅ.23ರಿಂದ 29ರವರೆಗೆ ಚಿತ್ರಮಂದಿರಗಳಲ್ಲಿ 'ಕೆಜಿಎಫ್: ಚಾಪ್ಟರ್‌ 1' ಪ್ರದರ್ಶನ ಕಾಣಲಿದೆ ಎಂದು 'ಹೊಂಬಾಳೆ ಫಿಲ್ಮ್ಸ್‌' ಟ್ವೀಟ್‌ ಮಾಡಿದೆ. ಕರ್ನಾಟಕ ಮಾತ್ರವಲ್ಲದೆ, ದೇಶದ ಇತರೆ ಪ್ರಮುಖ ನಗರಗಳಲ್ಲೂ ಮರು ಬಿಡುಗಡೆ ಆಗಿದೆ. ಈ ಮೊದಲು ಥಿಯೇಟರ್‌ನಲ್ಲಿ ಈ ಚಿತ್ರವನ್ನು ಮಿಸ್‌ ಮಾಡಿಕೊಂಡವರು ಈಗ ಮತ್ತೆ ದೊಡ್ಡ ಪರದೆಯಲ್ಲಿ ನೋಡಿ ಎಂಜಾಯ್‌ ಮಾಡಬಹುದು.

also read: 'ಕೆಜಿಎಫ್‌: ಚಾಪ್ಟರ್‌ 2' ಚಿತ್ರದಲ್ಲಿ ಶ್ರೀನಿಧಿ ಶೆಟ್ಟಿ ಪಾತ್ರದ ಬಗ್ಗೆ ಹೊಸ ಸುಳಿವು ಕೊಟ್ಟ ಪ್ರಶಾಂತ್‌ ನೀಲ್‌!

ಲಾಕ್‌ಡೌನ್‌ನಿಂದಾಗಿ 'ಪಾರ್ಟ್‌ 2' ಕೆಲಸಗಳು ವಿಳಂಬ ಆದವು. ನಟ ಯಶ್‌ ಆ ಸಮಯದಲ್ಲಿ ಫ್ಯಾಮಿಲಿ ಜೊತೆ ಕಾಲ ಕಳೆದರು. ಲಾಕ್‌ಡೌನ್‌ ಸಡಿಲಿಕೆ ಆದ ಬಳಿಕ ಮತ್ತೆ ಅವರು ಶೂಟಿಂಗ್‌ನಲ್ಲಿ ಭಾಗಿ ಆಗಿದ್ದಾರೆ. ನಿರ್ದೇಶಕ ಪ್ರಶಾಂತ್‌ ನೀಲ್‌ ಸಾರಥ್ಯದಲ್ಲಿ 'ಕೆಜಿಎಫ್‌: ಚಾಪ್ಟರ್‌ 2' ಸಿದ್ಧವಾಗುತ್ತಿದೆ. ಶೀಘ್ರದಲ್ಲೇ ನಟ ಸಂಜಯ್‌ ದತ್‌ ಕೂಡ ಚಿತ್ರೀಕರಣದಲ್ಲಿ ಭಾಗಿ ಆಗಲಿದ್ದಾರೆ. ಚಿತ್ರದ ಹೊಸ ರಿಲೀಸ್‌ ದಿನಾಂಕದ ಬಗ್ಗೆ ನಿರ್ಮಾಪಕರು ಇನ್ನಷ್ಟೇ ಮಾಹಿತಿ ಬಹಿರಂಗಪಡಿಸಬೇಕಿದೆ. ಈ ವರ್ಷವೇ 'ಕೆಜಿಎಫ್‌ 2' ತೆರೆಕಾಣುವುದು ಬಹುತೇಕ ಅನುಮಾನ ಎನ್ನಲಾಗುತ್ತಿದೆ.

also read: 'ಕೆಜಿಎಫ್‌ 2' ಚಿತ್ರಕ್ಕಾಗಿ ಸಂಜಯ್ ದತ್ ತಯಾರಿ ಹೀಗಿದೆ ನೋಡಿ! ಶೀಘ್ರದಲ್ಲೇ ಅಧೀರನ ಆರ್ಭಟ ಶುರು