'KGF: ಚಾಪ್ಟರ್‌ 2' ರಮಿಕಾ ಸೇನ್‌ ಖಡಕ್‌ ಲುಕ್‌ ಬಹಿರಂಗ! ರವೀನಾ ಟಂಡನ್‌ ಜನ್ಮದಿನಕ್ಕೆ ಭರ್ಜರಿ ಗಿಫ್ಟ್‌

ಬಹುನಿರೀಕ್ಷಿತ 'ಕೆಜಿಎಫ್‌: ಚಾಪ್ಟರ್‌ 2' ಸಿನಿಮಾದಲ್ಲಿನ ಪ್ರತಿ ಪಾತ್ರಕ್ಕೂ ಸಿಕ್ಕಾಪಟ್ಟೆ ಮಹತ್ವ ಇದೆ. ಹಾಗಾಗಿ ತಾರಾಗಣದ ಕಾರಣದಿಂದಲೇ ಈ ಸಿನಿಮಾ ಕೌತುಕ ಮೂಡಿಸಿದೆ. ಅದರಲ್ಲೂ ಬಾಲಿವುಡ್‌ ನಟಿ ರವೀನಾ ಟಂಡನ್‌ ಅವರು ನಿಭಾಯಿಸಿರುವ ರಮಿಕಾ ಸೇನ್‌ ಎಂಬ ಪಾತ್ರದ ಬಗ್ಗೆ ಜನರು ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಅವರ ಫಸ್ಟ್‌ಲುಕ್‌ ಕೂಡ ಈಗ ಬಿಡುಗಡೆ ಆಗಿದೆ.

'ಉಪೇಂದ್ರ' ಸಿನಿಮಾ ಬಳಿಕ ರವೀನಾ ಟಂಡನ್‌ ನಟಿಸುತ್ತಿರುವ ಎರಡನೇ ಕನ್ನಡ ಸಿನಿಮಾ 'ಕೆಜಿಎಫ್‌: ಚಾಪ್ಟರ್‌ 2'. ಹಲವು ವರ್ಷಗಳ ಗ್ಯಾಪ್‌ ಬಳಿಕ ಸ್ಯಾಂಡಲ್‌ವುಡ್‌ಗೆ ಬಂದಿರುವ ಅವರು ಖಡಕ್‌ ಪಾತ್ರದ ಮೂಲಕವೇ ಪ್ರೇಕ್ಷಕರನ್ನು ರಂಜಿಸಲಿದ್ದಾರೆ. ಯಶ್‌ ನಾಯಕತ್ವದ ಈ ಸಿನಿಮಾದಲ್ಲಿ ಅವರು ಪವರ್‌ಫುಲ್‌ ಮಹಿಳಾ ರಾಜಕಾರಣಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಅದಕ್ಕೆ ಪೂರಕವಾಗಿ ಅವರ ಫಸ್ಟ್‌ಲುಕ್‌ ಮೂಡಿಬಂದಿದೆ.

ಅಂದಹಾಗೆ, ಇಂದು (ಅ.26) ರವೀನಾ ಟಂಡನ್‌ ಜನ್ಮದಿನ. ಆ ಪ್ರಯುಕ್ತ ಅವರಿಗೆ ವಿಶ್‌ ಮಾಡುವ ಸಲುವಾಗಿ ಈ ಫಸ್ಟ್‌ಲುಕ್‌ ಬಿಡುಗಡೆ ಮಾಡಲಾಗಿದೆ. ನಿರ್ದೇಶಕ ಪ್ರಶಾಂತ್‌ ನೀಲ್‌, ನಿರ್ಮಾಣ ಸಂಸ್ಥೆ ಹೊಂಬಾಳೆ ಫಿಲ್ಮ್ಸ್‌ ಸೋಶಿಯಲ್‌ ಮೀಡಿಯಾ ಖಾತೆಗಳಲ್ಲಿ ಫಸ್ಟ್‌ಲುಕ್‌ ಪೋಸ್ಟರ್‌ ರಿಲೀಸ್‌ ಮಾಡುವ ಮೂಲಕ ರವೀನಾಗೆ ಶುಭಕೋರಲಾಗಿದೆ. ಅಧಿವೇಶನದಲ್ಲಿ ಎದ್ದು ನಿಂತು ಮಾತನಾಡುತ್ತಿರುವ ಮಹಿಳಾ ರಾಜಕಾರಣಿಯ ಗೆಟಪ್‌ನಲ್ಲಿ ರವೀನಾ ಖಡಕ್‌ ಆಗಿ ಪೋಸ್‌ ನೀಡಿರುವುದು ಗಮನ ಸೆಳೆಯುತ್ತಿದೆ.

also read: ಚಿತ್ರಮಂದಿರಗಳಲ್ಲಿ ಮತ್ತೆ 'ಕೆಜಿಎಫ್‌' ಅಬ್ಬರ! ಅಭಿಮಾನಿಗಳು ಕೇಳಿದ್ದೊಂದು, ಸಿಕ್ಕಿದ್ದು ಮತ್ತೊಂದು!

'ಡೆತ್‌ ವಾರೆಂಟ್‌ ನೀಡುವ ಮಹಿಳೆ' ಎಂದು ರವೀನಾ ಪಾತ್ರವನ್ನು ನಿರ್ದೇಶಕ ಪ್ರಶಾಂತ್ ನೀಲ್‌ ಈ ಹಿಂದೆ ಬಣ್ಣಿಸಿದ್ದರು. ಈಗ ಫಸ್ಟ್‌ಲುಕ್‌ ಪೋಸ್ಟರ್‌ ಜೊತೆಯಲ್ಲಿ 'THE Gavel to brutality!!!' ಎಂದು ಕ್ಯಾಪ್ಷನ್‌ ನೀಡುವ ಮೂಲಕ ನಿರೀಕ್ಷೆ ಹೆಚ್ಚಿಸುವ ಪ್ರಯತ್ನ ಮಾಡಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ, ಇದೇ ವರ್ಷ ಅ.23ರಂದು 'ಕೆಜಿಎಫ್‌ 2' ಸಿನಿಮಾ ಬಿಡುಗಡೆ ಆಗಬೇಕಿತ್ತು. ಆದರೆ ಲಾಕ್‌ಡೌನ್‌ ಪರಿಣಾಮ ಚಿತ್ರದ ಬಿಡುಗಡೆ ದಿನಾಂಕ ಮುಂದಕ್ಕೆ ಹೋಗಿದೆ. ಹೊಸ ರಿಲೀಸ್‌ ಡೇಟ್ ಬಗ್ಗೆ ಚಿತ್ರತಂಡ ಇನ್ನೂ ಮಾಹಿತಿ ಬಿಟ್ಟುಕೊಟ್ಟಿಲ್ಲ.

also read: 'ಕೆಜಿಎಫ್‌: ಚಾಪ್ಟರ್‌ 2' ಚಿತ್ರದಲ್ಲಿ ಶ್ರೀನಿಧಿ ಶೆಟ್ಟಿ ಪಾತ್ರದ ಬಗ್ಗೆ ಹೊಸ ಸುಳಿವು ಕೊಟ್ಟ ಪ್ರಶಾಂತ್‌ ನೀಲ್‌!