'ರಾಕಿಂಗ್‌ ಸ್ಟಾರ್‌' ಯಶ್‌ ಅಭಿಮಾನಿಗಳಿಗೆ ಮತ್ತೊಂದು ಗುಡ್‌ ನ್ಯೂಸ್‌!!

ಬುಧವಾರವಷ್ಟೇ ಯಶ್ ಕುಟುಂಬಕ್ಕೆ ಹೊಸ ಸದಸ್ಯನ ಎಂಟ್ರಿ ಆಗಿದೆ. ಯಶ್-ರಾಧಿಕಾ ಪಂಡಿತ್‌ ದಂಪತಿಗೆ ಗಂಡ ಮಗು ಜನನವಾಗಿದೆ. ಇದರಿಂದ ಸಹಜವಾಗಿಯೇ 'ರಾಕಿಂಗ್ ಸ್ಟಾರ್‌' ಯಶ್ ಅಭಿಮಾನಿಗಳು ಸಂಭ್ರಮದಲ್ಲಿ ಮುಳುಗಿದ್ದಾರೆ. ಇದೀಗ ಆ ಸಂಭ್ರಮವನ್ನು ಹೆಚ್ಚು ಮಾಡುವಂತಹ ಸುದ್ದಿಯೊಂದು ಹೊರಬಿದ್ದಿದೆ. ಕನ್ನಡ ರಾಜ್ಯೋತ್ಸವದ ಸಲುವಾಗಿ ಯಶ್ ನಟನೆಯ 'ಕೆಜಿಎಫ್‌' ಚಿತ್ರವು ನ.1ರಂದು ಮರು ಬಿಡುಗಡೆ ಆಗುತ್ತಿದೆ. ಅದರ ಟಿಕೆಟ್‌ ದರ ಅಚ್ಚರಿ ಮೂಡಿಸಿದೆ.

'ಮಕ್ಳು ಜೊತೆ ಸ್ವಲ್ಪ ಬ್ಯುಸಿ ಕಣ್ರಪ್ಪ, ಸದ್ಯಕ್ ಅಡ್ಜೆಸ್ಟ್‌ ಮಾಡ್ಕೋಳಿ'; ಇಲ್ಲಿದೆ ನೋಡಿ ಯಶ್ ಮೊದಲ ಪ್ರತಿಕ್ರಿಯೆ!

ಹೌದು, ನವೆಂಬರ್‌ 1ರಂದು ಕನ್ನಡ ರಾಜ್ಯೋತ್ಸವ ಇರುವುದರಿಂದ 'ಕೆಜಿಎಫ್' ಚಿತ್ರಕ್ಕೆ ಬೆಂಗಳೂರಿನಲ್ಲಿ 20ಕ್ಕೂ ಹೆಚ್ಚು ಶೋಗಳು ನಿಗದಿಯಾಗಿವೆ. ಈಗಾಗಲೇ ಚಿತ್ರಮಂದಿರದಲ್ಲಿ ಪ್ರದರ್ಶನ ಕಂಡು, ಟಿವಿಯಲ್ಲೂ ಈ ಸಿನಿಮಾ ಪ್ರಸಾರವಾಗಿದೆ. ಹೀಗಿದ್ದರೂ, ಕೂಡ ನವೆಂಬರ್‌ 1ರಂದು ಅನೇಕರು ಟಿಕೆಟ್ ಬುಕ್‌ ಮಾಡಿದ್ಧಾರೆ. ಇದು ಚಿತ್ರದ ಬಗೆಗಿನ ಕ್ರೇಜ್‌ ಎಂಥದ್ದು ಎಂಬುದನ್ನು ತೋರಿಸುತ್ತದೆ. ಅಚ್ಚರಿ ಎಂದರೆ, ಟಿಕೆಟ್‌ ದರ! ಪ್ರಮುಖವಾಗಿ ಬೆಂಗಳೂರಿನ ಊರ್ವಶಿ ಚಿತ್ರಮಂದಿರದಲ್ಲಿ ಶುಕ್ರವಾರ ಈ ಸಿನಿಮಾಕ್ಕೆ 2 ಶೋಗಳನ್ನು ನಿಗದಿ ಮಾಡಲಾಗಿದೆ. ಆದರೆ, ಅದರ ಟಿಕೆಟ್‌ ದರ ಕೇವಲ 50 ರೂ.ಗಳು ಮಾತ್ರ.

ಊರ್ವಶಿ ಚಿತ್ರಮಂದಿರದಲ್ಲಿ ಸಾಮಾನ್ಯವಾಗಿ ಟಿಕೆಟ್‌ ರೇಟ್‌ 250, 300, 350 ರೂ. ಗಳ ತನಕ ಇರುತ್ತದೆ. ಆದರೆ, 'ಕೆಜಿಎಫ್‌'ಗೆ ಕೇವಲ 30, 40, 50 ರೂ. ದರ ನಿಗದಿ ಮಾಡಲಾಗಿದೆ. ಹಾಗಾಗಿ, ಈಗಾಗಲೇ ಬುಕ್ಕಿಂಗ್ ಕೂಡ ಶುರುವಾಗಿದೆ. ಊರ್ವಶಿ ಜತೆಗೆ ಕಾವೇರಿ, ಸಂಪಿಗೆ, ಪುಷ್ಪಾಂಜಲಿ ಸೇರಿದಂತೆ ಒಂದಷ್ಟು ಮಲ್ಟಿ ಪ್ಲೆಕ್ಸ್‌ಗಳಲ್ಲಿ ಈ ಸಿನಿಮಾ ತೆರೆಕಾಣುತ್ತಿದೆ. ಈ ಚಿತ್ರದಲ್ಲಿ ಯಶ್‌ಗೆ ನಾಯಕಿಯಾಗಿ ಶ್ರೀನಿಧಿ ಶೆಟ್ಟಿ ನಟಿಸಿದ್ದರು. ಅನಂತ್ ನಾಗ್‌, ರಾಮ್‌, ಅವಿನಾಶ್‌, ನಾಗಾಭರಣ, ಮಾಳವಿಕಾ, ಅಚ್ಯುತ್‌ಕುಮಾರ್ ಮುಂತಾದವರು ಪೋಷಕ ಪಾತ್ರಗಳಲ್ಲಿ ನಟಿಸಿದ್ದರೆ, ಪ್ರಶಾಂತ್ ನೀಲ್‌ ನಿರ್ದೇಶನ ಮಾಡಿದ್ಧಾರೆ. ಐದು ಭಾಷೆಗಳಲ್ಲಿ ತೆರೆಕಂಡಿದ್ದ ಈ ಚಿತ್ರದ ಸಿಕ್ವೇಲ್‌ ಕೆಲಸಗಳು ಚಾಲ್ತಿಯಲ್ಲಿವೆ.