Sayyeshaa: ಬಾಲಯ್ಯ ಸಿನಿಮಾಗೆ ನಾಯಕಿಯಾದ 'ಯುವರತ್ನ' ನಟಿ ಸಾಯೇಶಾ! 5 ವರ್ಷದ ಬಳಿಕ ಟಾಲಿವುಡ್‌ಗೆ ರೀ-ಎಂಟ್ರಿ

ನಟಿ ಸಾಯೇಶಾ ಮದುವೆ ಬಳಿಕವೂ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. 2015ರಲ್ಲಿ ತೆಲುಗಿನ 'ಅಖಿಲ್' ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಎಂಟ್ರಿ ನೀಡಿದ ಸಾಯೇಶಾ, ಈಗಾಗಲೇ ತಮಿಳು, ಹಿಂದಿ, ಕನ್ನಡ ಭಾಷೆಗಳಿಗೂ ಪ್ರವೇಶ ನೀಡಿದ್ದಾರೆ. ಸದ್ಯ ಪುನೀತ್ ರಾಜ್‌ಕುಮಾರ್ ಜೊತೆ 'ಯುವರತ್ನ' ಸಿನಿಮಾ ಮಾಡಿರುವ ಅವರು, ಇದೀಗ 5 ವರ್ಷಗಳ ನಂತರ ಟಾಲಿವುಡ್‌ನಿಂದ ಅವಕಾಶ ಗಿಟ್ಟಿಸಿಕೊಂಡಿದ್ದಾರೆ. ನಂದಮೂರಿ ಬಾಲಕೃಷ್ಣ ಅಭಿನಯದ ಹೊಸ ಸಿನಿಮಾಕ್ಕೆ ಸಾಯೇಶಾ ಈಗ ನಾಯಕಿ ಆಗಿದ್ದಾರೆ!

ಬಾಲಯ್ಯ ಸಿನಿಮಾಗೆ ನಾಯಕಿಯಾದ ಸಾಯೇಶಾ
ನಟ ನಂದಮೂರಿ ಬಾಲಕೃಷ್ಣ ಮತ್ತು ನಿರ್ದೇಶಕ ಬೊಯಪಟಿ ಶ್ರೀನು ಕಾಂಬಿನೇಷನ್‌ನಲ್ಲಿ ಹೊಸ ಸಿನಿಮಾ ಸೆಟ್ಟೇರಿದೆ. ಇವರಿಬ್ಬರ ಕಾಂಬಿನೇಷನ್‌ನಲ್ಲಿ ಈ ಹಿಂದೆ 'ಸಿಂಹ', 'ಲೆಜೆಂಡ್' ಸಿನಿಮಾಗಳು ತೆರೆಕಂಡು ಸೂಪರ್ ಹಿಟ್ ಆಗಿವೆ. ಈಗ ಈ ಜೋಡಿಯ ಮೂರನೇ ಸಿನಿಮಾದ ಮೇಲೆ ಸಿಕ್ಕಾಪಟ್ಟೆ ನಿರೀಕ್ಷೆ ಇದೆ. ವಿಶೇಷವೆಂದರೆ, 'ಸಿಂಹ' ಮತ್ತು 'ಲೆಜೆಂಡ್‌' ಸಿನಿಮಾಗಳಲ್ಲಿ ಬಾಲಯ್ಯ ದ್ವಿಪಾತ್ರ ಮಾಡಿದ್ದರು. ಈಗ ಮಾಡಲಿರುವ ಹೊಸ ಸಿನಿಮಾದಲ್ಲೂ ದ್ವಿಪಾತ್ರ ಮಾಡಲಿದ್ದಾರೆ. ಸದ್ಯ ಚಿತ್ರಕ್ಕೆ ನಾಯಕಿಯನ್ನಾಗಿ ಸಾಯೇಶಾಗೆ ಅವಕಾಶ ನೀಡಲಾಗಿದೆ. ಈ ಬಗ್ಗೆ ಟ್ವೀಟ್ ಮಾಡಿಕೊಂಡಿರುವ ಸಾಯೇಶಾ, ಶೂಟಿಂಗ್ ಶುರುವಾಗುವುದನ್ನೇ ಕಾಯುತ್ತಿದ್ದಾರೆ.

ತೆಲುಗಿನಲ್ಲಿ ಇದು 2ನೇ ಸಿನಿಮಾ
2015ರಲ್ಲಿ ಅಖಿಲ್ ಅಕ್ಕಿನೇನಿ ನಟಿಸಿದ್ದ 'ಅಖಿಲ್' ಚಿತ್ರಕ್ಕೆ ನಾಯಕಿಯಾಗಿದ್ದರು ಸಾಯೇಶಾ. 18ನೇ ವಯಸ್ಸಿನಲ್ಲೇ ಹೀರೋಯಿನ್ ಆದ ಅವರಿಗೆ ಆ ಸಿನಿಮಾದಿಂದ ಬ್ರೇಕ್ ಸಿಗಲಿಲ್ಲ. ನಂತರ ಹಿಂದಿಯ ಅಜಯ್ ದೇವ್‌ಗನ್ ನಿರ್ದೇಶನದ 'ಶಿವಾಯ್'ನಲ್ಲಿ ನಟಿಸಿದರು. ನಂತರ ತಮಿಳಿನಲ್ಲಿ ಸಾಲು ಸಾಲು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದರು. ಅಲ್ಲದೆ, 2019ರ ಆರಂಭದಲ್ಲೇ ನಟ ಆರ್ಯ ಜೊತೆಗೆ ಮದುವೆ ಆದರು. ಆ ಬಳಿಕವು ಅವರು ನಟನೆಯಲ್ಲಿ ಸಕ್ರಿಯರಾಗಿದ್ದಾರೆ.

ಎಂಎಲ್‌ಎ ಆಗಲಿದ್ದಾರೆ 'ಕ್ರೇಜಿ ಸ್ಟಾರ್‌' ರವಿಚಂದ್ರನ್‌ ಸಿನಿಮಾಗಳ ನಟಿ ನಮಿತಾ!

ಅಪ್ಪು ಜೊತೆ 'ಯುವರತ್ನ' ಮಾಡಿರುವ ಸಾಯೇಶಾ
'ಪವರ್ ಸ್ಟಾರ್' ಪುನೀತ್ ರಾಜ್‌ಕುಮಾರ್ ಅವರೊಂದಿಗೆ ಬಹುನಿರೀಕ್ಷಿತ 'ಯುವರತ್ನ' ಸಿನಿಮಾದಲ್ಲಿ ಸಾಯೇಶಾ ನಟಿಸಿದ್ದಾರೆ. ಸಂತೋಷ್‌ ಆನಂದ್‌ರಾಮ್ ನಿರ್ದೇಶನ ಮಾಡಿರುವ ಈ ಸಿನಿಮಾದ ಮೇಲೆ ಸಾಯೇಶಾ ಕೂಡ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಶೂಟಿಂಗ್ ಎಲ್ಲ ಮುಕ್ತಾಯಗೊಂಡಿದ್ದು, ತೆರೆಗೆ ಬರುವುದಕ್ಕೆ ಸಜ್ಜಾಗಿದೆ.

ಎಷ್ಟು ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ ಪುನೀತ್‌ 'ಯುವರತ್ನ' ಸಿನಿಮಾ? ಫ್ಯಾನ್ಸ್‌ಗಾಗಿ ಕಾದಿದೆ ಗುಡ್‌ ನ್ಯೂಸ್‌!