ಎಸ್‌ಬಿಐ ಕ್ಲರ್ಕ್‌ ಪರೀಕ್ಷಾ ಪೂರ್ವ ತರಬೇತಿ: ಪ್ರವೇಶ ಪತ್ರ ಡೌನ್‌ಲೋಡ್‌ಗೆ ಇಂದೇ ಡೆಡ್‌ಲೈನ್

ಹೊಸದಿಲ್ಲಿ: ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಎಸ್‌ಬಿಐ) ಕ್ಲರ್ಕ್‌ ಹುದ್ದೆಗಳಿಗೆ ನಡೆಸಲಿರುವ ಪರೀಕ್ಷೆಯ ತರಬೇತಿಗೆ ಪ್ರವೇಶ ಪತ್ರವನ್ನು ಬಿಡುಗಡೆ ಮಾಡಿದೆ. ಪರೀಕ್ಷೆಗೆ ಅರ್ಜಿ ಸಲ್ಲಿಸಿರುವ ಅಭ್ಯರ್ಥಿಗಳು ತರಬೇತಿಗೆ ಹಾಜರಾಗಲು ಪ್ರವೇಶ ಪತ್ರವನ್ನು ಡೌನ್‌ಲೋಡ್‌ ಮಾಡಿಕೊಳ್ಳ ಬಹುದಾಗಿದೆ.

ಕಸ್ಟಮರ್‌ ಸಪೋರ್ಟ್‌ ಮತ್ತು ಸೇಲ್ಸ್‌ ವಿಭಾಗದಲ್ಲಿ ಜೂನಿಯರ್‌ ಅಸೋಸಿಯೇಟ್ಸ್‌ ಹುದ್ದೆಗೆ ಈ ಪರೀಕ್ಷೆ ನಡೆಯಲಿದೆ. ಮೇ 15ಕ್ಕೆ ಪ್ರವೇಶ ಪತ್ರ ಬಿಡುಗಡೆಯಾಗಿದ್ದು, ಇನ್ನೂ ಡೌನ್ಲೋಡ್‌ ಮಾಡಿಕೊಳ್ಳದಿದ್ದರೆ ನಾಳೆ (ಜೂನ್‌ 1, 2019ರವರೆಗೆ) ಡೌನ್‌ಲೋಡ್‌ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಉದ್ಯೋಗಕ್ಕೆ ಅರ್ಜಿ ಸಲ್ಲಿಸಿರುವ ಅಭ್ಯರ್ಥಿಗಳು ಎಸ್‌ಬಿಐನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಪರೀಕ್ಷಾ ಪೂರ್ವ ತರಬೇತಿಯ ಪ್ರವೇಶ ಪತ್ರವನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ.

ತರಬೇತಿಯು ಎಕ್ಸ್‌ ಸರ್ವಿಸ್‌ಮನ್‌, ಎಸ್‌ಸಿ, ಎಸ್‌ಟಿ ಮತ್ತು ಅಲ್ಪಸಂಖ್ಯಾತ ವರ್ಗದ ಅಭ್ಯರ್ಥಿಗಳಿಗೆ ನಡೆಯಲಿದೆ.

ಪ್ರವೇಶ ಪತ್ರ ಡೌನ್ಲೋಡ್‌ ಮಾಡಿಕೊಳ್ಳಲು ಈ ಹಂತಗಳನ್ನು ಪಾಲಿಸಿ
1. ಈ ಲಿಂಕ್‌ ಅನ್ನು ಓಪನ್‌ ಮಾಡಿ - ಎಸ್‌ಬಿಐ ಕ್ಲರ್ಕ್‌ ಅಡ್ಮಿಟ್‌ ಕಾರ್ಡ್‌ 2019: ಪರೀಕ್ಷಾ ಪೂರ್ವ ತರಬೇತಿ

2. ನಿಮ್ಮ ದಾಖಲಾತಿ ಸಂಖ್ಯೆಯನ್ನು ಮತ್ತು ಪಾಸ್‌ವರ್ಡ್‌ ಅಥವಾ ಜನ್ಮ ದಿನಾಂಕವನ್ನು ನಮೂದಿಸಿ. ಜನ್ಮ ದಿನಾಂಕದಲ್ಲಿ ದಿನಾಂಕ, ತಿಂಗಳು ಮತ್ತು ವರ್ಷ ಕ್ರಮವಾಗಿ ಇರಬೇಕು.

3. ಇಮೇಜ್‌ನಲ್ಲಿರುವ ಸಂಖ್ಯೆ ಮತ್ತು ಇಂಗ್ಲಿಷ್‌ ಅಕ್ಷರಗಳನ್ನು ಗುರುತಿಸಿ ಕೆಳಗೆ ಕೊಟ್ಟಿರುವ ಬಾಕ್ಸ್‌ನಲ್ಲಿ ಕ್ರಮವಾಗಿ ನಮೂದಿಸಬೇಕು.

4. ನಂತರ ಲಾಗಿನ್‌ ಕ್ಲಿಕ್‌ ಮಾಡುವ ಮೂಲಕ ನಿಮ್ಮ ಪ್ರವೇಶ ಪತ್ರವಿರುವ ನೂತನ ವಿಂಡೋ ತೆರೆದುಕೊಳ್ಳುತ್ತದೆ.

5. ಪ್ರವೇಶ ಪತ್ರವನ್ನು ನೇರವಾಗಿ ಡೌನ್‌ಲೋಡ್‌ ಮಾಡಿಕೊಳ್ಳಿ ಅಥವಾ ಪ್ರಿಂಟ್‌ ತೆಗೆದುಕೊಳ್ಳಿ. ತರಬೇತಿ ಕೇಂದ್ರಕ್ಕೆ ಈ ಪತ್ರವನ್ನು ಕಡ್ಡಾಯವಾಗಿ ಕೊಂಡೊಯ್ಯ ಬೇಕು.

ಜೂನ್‌ 2019 ರಲ್ಲಿ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಕ್ಲರ್ಕ್‌ ಪ್ರಿಲಿಮಿನರಿ ಪರೀಕ್ಷೆಯನ್ನು ಕಸ್ಟಮರ್‌ ಸಪೋರ್ಟ್‌ ಮತ್ತು ಸೇಲ್ಸ್‌ ವಿಭಾಗದಲ್ಲಿ ಜೂನಿಯರ್‌ ಅಸೋಸಿಯೇಟ್‌ ಹುದ್ದೆಗಳಿಗೆ ಪರೀಕ್ಷೆ ನಡೆಸಲಿದೆ.

ತರಬೇತಿ ಕೇಂದ್ರಗಳು
ರಾಜ್ಯದ ಬೆಂಗಳೂರು, ಮೈಸೂರು ಸೇರಿದಂತೆ ಚೆನ್ನೈ, ಕೊಯಮತ್ತೂರು, ಹೈದರಾಬಾದ್‌, ಪುಣೆ, ವಿಶಾಖಪಟ್ಟಣ, ದಿಲ್ಲಿ ಎನ್‌ಸಿಆರ್‌, ಆಗ್ರಾ, ಅಲಹಾಬಾದ್‌, ಐಜ್ವಾಲ್‌, ಅಗರ್‌ತಲಾ, ಅಸನ್‌ಸೊಲ್‌, ಭೋಪಾಲ್‌, ಚಂಡೀಗಢ, ಡೆಹರಾಡೂನ್‌, ದಿಬ್ರುಗಢ, ಗಾಂಗ್‌ಟಕ್‌, ಗುವಾಹಟಿ, ಇಂಫಾಲ್‌, ಇಂದೋರ್‌, ಜೈಪುರ, ಜಮ್ಮು, ಕೋಲ್ಕತ, ಲೇಹ್‌, ಲಖನೌ, ರಾಂಚಿ, ಮುಂಬಯಿ, ಮೀರತ್‌, ಶ್ರೀನಗರ, ಶಿಲ್ಲಾಂಗ್‌, ವಾರಣಸಿ ಮುಂತಾದ ನಗರಗಳಲ್ಲಿ ನಡೆಯಲಿದೆ.