ಭಾರತೀಯ ರೈಲ್ವೆಯ ಗ್ರೂಪ್‌ -ಡಿ ಹುದ್ದೆ : ರಾಜ್ಯದ 7,765 ಅಭ್ಯರ್ಥಿಗಳು ಪಾಸ್‌

ಭಾರತೀಯ ರೈಲ್ವೆಯು ಗ್ರೂಪ್‌ 'ಡಿ' ಹುದ್ದೆಗಳಿಗೆ ನಡೆಸಿದ್ದ ಕಂಪ್ಯೂಟರ್‌ ಆಧರಿತ ಪರೀಕ್ಷೆಯಲ್ಲಿ (ಸಿಬಿಟಿ) ರಾಜ್ಯದ 7,765 ಅಭ್ಯರ್ಥಿಗಳು ಉತ್ತೀರ್ಣರಾಗಿದ್ದಾರೆ.

ಬೆಂಗಳೂರು ರೈಲ್ವೆ ನೇಮಕಾತಿ ಮಂಡಳಿ (ಆರ್‌ಆರ್‌ಬಿ) ಮೂಲಕ ಒಟ್ಟು 2,293 ಹುದ್ದೆಗಳಿಗೆ ನೇಮಕ ನಡೆಯುತ್ತಿದ್ದು, 1:3ರ ಅನುಪಾತದಲ್ಲಿ ಅಭ್ಯರ್ಥಿಗಳನ್ನು ಮುಂದಿನ ಹಂತಕ್ಕೆ ಎಂದರೆ ದೈಹಿಕ ಸಾಮರ್ಥ್ಯ‌ ಪರೀಕ್ಷೆಗೆ (ಪಿಇಟಿ) ಆಯ್ಕೆ ಮಾಡಲಾಗಿದೆ.

ರೈಲ್ವೆಯು ಸೋಮವಾರ ಸಂಜೆ ಫಲಿತಾಂಶ ಪ್ರಕಟಿಸಿದ್ದು, ಬೆಂಗಳೂರು ಆರ್‌ಆರ್‌ಬಿ ಮೂಲಕ ಪರೀಕ್ಷೆ ಬರೆದ 7,765 ಅಭ್ಯರ್ಥಿಗಳು ಮುಂದಿನ ಹಂತದ ಪರೀಕ್ಷೆಗೆ ಅರ್ಹತೆ ಪಡೆದಿದ್ದಾರೆ ಎಂದು ಮಂಡಳಿಯ ಪ್ರಕಟಣೆ ತಿಳಿಸಿದೆ. ಈ ಅರ್ಹತೆ ಪಡೆದ ಅಭ್ಯರ್ಥಿಗಳ ರೋಲ್‌ ನಂಬರ್‌ ಅನ್ನು ವೆಬ್‌ನಲ್ಲಿ ಪ್ರಕಟಿಸಲಾಗಿದೆ.

ನೇಮಕಾತಿಯ ಮುಂದಿನ ಪ್ರಕ್ರಿಯೆಗಳನ್ನು ಹುಬ್ಬಳ್ಳಿ ನೈರುತ್ಯ ರೈಲ್ವೆಯ ಆರ್‌ಆರ್‌ಸಿಯು ನಡೆಸಲಿದ್ದು, ಆಯ್ಕೆಯಾದ ಅಭ್ಯರ್ಥಿಗಳು ಇದರ ವೆಬ್‌ ಅನ್ನು ನೋಡುತ್ತಿರಬೇಕೆಂದು ಸೂಚಿಸಲಾಗಿದೆ. ಮಾರ್ಚ್‌ ಕೊನೆಯ ವಾರದಲ್ಲಿ ಪಿಇಟಿ ನಡೆಸುವ ಸಾಧ್ಯತೆಗಳಿವೆ.