ಸಿಬಿಎಸ್‌ಇ ಸಿಟಿಇಟಿ ಪ್ರವೇಶ ಪತ್ರ ಶೀಘ್ರದಲ್ಲೇ ಬಿಡುಗಡೆ

ಹೊಸದಿಲ್ಲಿ: ಸಿಬಿಎಸ್‌ಇ ನಡೆಸುವ 2019ರ ಶಿಕ್ಷಕರ ಅರ್ಹತಾ ಪರೀಕ್ಷೆ ಸಿಟಿಇಟಿ ಪ್ರವೇಶ ಪತ್ರವು ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ. ಕೇಂದ್ರ ಪ್ರೌಢ ಶಿಕ್ಷಣ ಮಂಡಳಿಯು ಪ್ರವೇಶ ಪತ್ರ ಬಿಡುಗಡೆಯ ದಿನಾಂಕವನ್ನು ಇನ್ನು ದೃಢ ಪಡಿಸಿಲ್ಲ.

ಸಾಮಾನ್ಯವಾಗಿ ಪರೀಕ್ಷೆಗೆ ಎರಡರಿಂದ ಮೂರು ವಾರಗಳು ಬಾಕಿಯಿರುವಾಗ ಪ್ರವೇಶ ಪತ್ರವನ್ನು ಬಿಡುಗಡೆ ಮಾಡುತ್ತದೆ. ಜೂನ್‌ 23, 2019ಕ್ಕೆ ಅಡ್ಮಿಟ್‌ ಕಾರ್ಡ್‌ ಬಿಡುಗಡೆ ಆಗಬಹುದು ಎಂದು ಅಂದಾಜಿಸಲಾಗಿದೆ.

ಸಿಟಿಇಟಿ 2019 ಪರೀಕ್ಷೆ ದಿನಾಂಕವನ್ನು ಜುಲೈ 7, 2019ಕ್ಕೆ ನಿಗದಿ ಪಡಿಸಲಾಗಿದೆ. ಸಿಟಿಇಟಿ 2019 ಪರೀಕ್ಷೆಯಲ್ಲಿ ಎರಡು ಪೇಪರ್‌ಗಳು ಇರಲಿವೆ. ಪೇಪರ್‍‌ 1 ಮತ್ತು ಪೇಪರ್‌ 2 ಎಂಬ ಎರಡು ಪೇಪರ್‌ಗಳಿದ್ದು ಮೊದಲ ಪೇಪರ್‌ ಬೆಳಗ್ಗಿನ ಅವಧಿಯಲ್ಲಿ ಮತ್ತೊಂದು ಮಧ್ಯಾಹ್ನದ ಅವಧಿಯಲ್ಲಿ ನಡೆಯಲಿದೆ.

ಸಿಟಿಇಟಿ ಅರ್ಹತೆ ಪಡೆಯಲು ಶೇ.60ಕ್ಕಿಂತ ಹೆಚ್ಚು ಅಂಕಗಳನ್ನು ಪಡೆಯಬೇಕು. ಡಿಸೆಂಬರ್‌ 2018ರ ಪರೀಕ್ಷೆಯಲ್ಲಿ 1.78 ಲಕ್ಷ ಅಭ್ಯರ್ಥಿಗಳು ಪೇಪರ್‌ 1 ಅಥವಾ ಪ್ರಾಥಮಿಕ ಶಿಕ್ಷಕರಾಗಿ ಅರ್ಹತೆ ಪಡೆದಿದ್ದಾರೆ. 1.26 ಲಕ್ಷ ಅಭ್ಯರ್ಥಿಗಳು ಪ್ರೌಢಶಾಲೆ ಶಿಕ್ಷಕರಾಗಿ ಅರ್ಹತೆ ಪಡೆದಿದ್ದಾರೆ. ಪೇಪರ್‌ 1 ಪರೀಕ್ಷೆಯಲ್ಲಿ 10,73,545 ಅಭ್ಯರ್ಥಿಗಳು ಭಾಗವಹಿಸಿದ್ದರು. ಪೇಪರ್‌ 2 ಪರೀಕ್ಷೆಯಲ್ಲಿ 8,78,425 ಅಭ್ಯರ್ಥಿಗಳು ಭಾಗವಹಿಸಿದ್ದರು.