ಎಚ್‌ಸಿಎಲ್‌ 3,000 ಹುದ್ದೆಗಳಿಗೆ ನೇಮಕಾತಿ: ಹೊಸಬರಿಗೆ ಹೆಚ್ಚಿನ ಅವಕಾಶ

ಹೊಸದಿಲ್ಲಿ: ಪದವೀಧರರಿಗೆ ಖುಷಿ ಸುದ್ದಿಯೊಂದಿದೆ. ದೇಶದ ಮೂರನೇ ದೊಡ್ಡ ಐಟಿ ಸೇವಾ ಕಂಪನಿಯಾಗಿರುವ ಎಚ್‌ಸಿಎಲ್‌ ಟೆಕ್ನಾಲಜೀಸ್‌ ಮುಂದಿನ ತಿಂಗಳು 3,000 ಹುದ್ದೆಗಳಿಗೆ ನೇಮಕ ಮಾಡಿಕೊಳ್ಳಲಿದೆ.

ನೋಯ್ಡಾದಲ್ಲಿ ಕಂಪನಿಯು ಹೊಂದಿರುವ ಕ್ಯಾಂಪಸ್‌ನಲ್ಲಿ ಈ ನೇಮಕ ನಡೆಯಲಿದೆ. ಜುಲೈ 6 ಮತ್ತು 7ರಂದು ಇದಕ್ಕಾಗಿ ವಿಶೇಷ ರಿಕ್ರೂಟ್‌ಮೆಂಟ್‌ ಡ್ರೈವ್‌ ನಡೆಸಲಿರುವುದಾಗಿ ಕಂಪನಿಯು ಪ್ರಕಟಣೆಯಲ್ಲಿ ತಿಳಿಸಿದೆ.

2000 ಹುದ್ದೆಗಳಿಗೆ ಪದವೀಧರ ಮತ್ತು ಎಂಜಿನಿಯರಿಂಗ್‌ ಪದವೀಧರರನ್ನು ನೇಮಕ ಮಾಡಿಕೊಂಡರೆ ಒಂದು ಸಾವಿರ ಹುದ್ದೆಗಳಿಗೆ ದ್ವಿತೀಯ ಪಿಯುಸಿಯಲ್ಲಿ ಉತ್ತೀರ್ಣರಾದವರನ್ನು ನೇಮಕ ಮಾಡಿಕೊಳ್ಳಲಾಗುತ್ತದೆ ಎಂದು ಕಂಪನಿಯು ಹೇಳಿದೆ.

ಹೊಸಬರಿಗೆ ಅವಕಾಶ: ಈ ನೇಮಕ ಪ್ರಕ್ರಿಯೆಯಲ್ಲಿ ಸಂಪೂರ್ಣ ಹೊಸಬರಿಗೆ ಅವಕಾಶ ಮಾಡಿಕೊಡಲಾಗುತ್ತಿದೆ. ಇಲ್ಲಿ ನೇಮಕವಾದವರಿಗೆ 'ಎಚ್‌ಸಿಎಲ್‌ ಟ್ರೈನಿಂಗ್‌ ಆ್ಯಂಡ್‌ ಸ್ಟಾಫ್‌ ಸವೀರ್‍ಸಸ್‌' ಸಂಸ್ಥೆಯಲ್ಲಿ ತಾಂತ್ರಿಕ ಕೌಶಲದ ತರಬೇತಿ ನೀಡಲಾಗುತ್ತದೆ. ತರಬೇತಿಯನ್ನುನ ಯಶಸ್ವಿಯಾಗಿ ಮುಗಿಸಿದವರನ್ನು ನೇರವಾಗಿ ನೇಮಕ ಮಾಡಿಕೊಳ್ಳಲಾಗುತ್ತದೆ ಎಂದು ಕಂಪನಿಯ ಕಾರ್ಯನಿರ್ವಾಹಕ ಉಪಾಧ್ಯಕ್ಷ ಸಂಜಯ್‌ ಗುಪ್ತಾ ತಿಳಿಸಿದ್ದಾರೆ.

ಐಟಿ ಕ್ಷೇತ್ರದಲ್ಲಿ ಕೆಲಸ ಮಾಡುವ ಕನಸು ಹೊತ್ತವರಿಗೆ ಇದೊಂದು ದೊಡ್ಡ ಅವಕಾಶ ಎಂದು ಕಂಪನಿಯು ಪ್ರಕಣೆಯಲ್ಲಿ ಹೇಳಿದೆ.

ನಡೆಯಲಿದೆ ಬೃಹತ್‌ ನೇಮಕ : ಈಗಾಗಲೇ ಎಚ್‌ಸಿಎಲ್‌ ಕಂಪನಿಯು ಪ್ರಸಕ್ತ ಹಣಕಾಸು ವರ್ಷದಲ್ಲಿ 12,000 ಪದವೀಧರರನ್ನು ಕ್ಯಾಂಪಸ್‌ಗಳಿಂದ ನೇಮಕ ಮಾಡಿಕೊಳ್ಳುವುದಾಗಿ ಪ್ರಕಟಿಸಿದೆ. ಭಾರತದ ಕ್ಯಾಂಪಸ್‌ಗಳಿಂದ 10 ಸಾವಿರ, ಅಮೆರಿಕ ವಿವಿಗಳಿಂದ 2,000 ಮಂದಿಯನ್ನು ನೇಮಕ ಮಾಡಿಕೊಳ್ಳಲಾಗುತ್ತದೆ. ಜೊತೆಗೆ 2-10 ವರ್ಷ ಅನುಭವ ಉಳ್ಳ 20 ಸಾವಿರ ಮಂದಿಯನ್ನು ನೇಮಕ ಮಾಡಿಕೊಳ್ಳುವುದಾಗಿ ಕಂಪನಿ ಹೇಳಿದೆ.