ಜೂ.ಎಂಜಿನಿಯರ್‌ ನೇಮಕ: ಜೂ.26ರಿಂದ 28ರ ತನಕ ಮರುಪರೀಕ್ಷೆ

ಹೊಸದಿಲ್ಲಿ: ಭಾರತೀಯ ರೈಲ್ವೆಯು ಜೂನಿಯರ್‌ ಎಂಜಿನಿಯರ್‌ ನೇಮಕಕ್ಕೆ ಸಂಬಂಧಪಟ್ಟಂತೆ ಕಂಪ್ಯೂಟರ್‌ ಆಧರಿತ ಪರೀಕ್ಷೆಯನ್ನು (ಸಿಬಿಟಿ) ಜೂನ್‌ 26ರಿಂದ ಜೂನ್‌ 28ರ ತನಕ ಮರು ನಿಗದಿ ಮಾಡಿದೆ.

ಈ ಕುರಿತಾಗಿ ಪ್ರಕಟಣೆ ಹೊರಡಿಸಿರುವ ರೈಲ್ವೆ ನೇಮಕಾತಿ ಮಂಡಳಿ (ಆರ್‌ಆರ್‌ಬಿ) ಜೂನ್‌ 16ರಿಂದ ಅಭ್ಯರ್ಥಿಗಳು ಪರೀಕ್ಷಾ ಕೇಂದ್ರ ಮತ್ತು ದಿನಾಂಕಗಳ ವಿವರಗಳನ್ನು ವೆಬ್‌ನಲ್ಲಿ ನೋಡಬಹುದು ಮತ್ತು ಪರೀಕ್ಷೆ ಹೇಗೆ ನಡೆಯುತ್ತದೆ ಎಂಬುದನ್ನು ತಿಳಿಸಲು ಮಾಕ್‌ ಟೆಸ್ಟ್‌ ಲಿಂಕ್‌ ಅನ್ನು ಆರ್‌ಆರ್‌ಬಿಗಳ ವೆಬ್‌ನಲ್ಲಿ ಒದಗಿಸಲಾಗುವುದು ಎಂದು ತಿಳಿಸಿದೆ. ಪರೀಕ್ಷೆಗೆ ನಾಲ್ಕು ದಿನ ಮುಂಚಿತವಾಗಿ ಪ್ರವೇಶಪತ್ರ ಡೌನ್‌ಲೋಡ್‌ ಮಾಡಿಕೊಳ್ಳಲು ಅವಕಾಶ ನೀಡಲಾಗುತ್ತದೆ

ಈ ಹಿಂದೆ ಮೇ 30ರಂದು ಸಿಬಿಟಿ ನಡೆದಿದ್ದು, ಪರೀಕ್ಷೆ ಸಂದರ್ಭದಲ್ಲಿ ಹಲವು ಬಾರಿ ವಿದ್ಯುತ್‌ ಪೂರೈಕೆ ಸ್ಥಗಿತಗೊಂಡು ಅಭ್ಯರ್ಥಿಗಳು ತೊಂದರೆಗೊಳಗಾಗಿದ್ದರು. ಆನ್‌ಲೈನ್‌ ಪರೀಕ್ಷೆಯಾಗಿದ್ದರಿಂದ ವೇಗವಾದ ಸೇವೆ ನೀಡುವ ಸರ್ವರ್‌ ಮತ್ತು ನಿರಂತರ ವಿದ್ಯುತ್‌ ಪೂರೈಕೆಯ ಅಗತ್ಯವಿತ್ತು. ಆದರೆ, ಪರೀಕ್ಷೆ ಆರಂಭವಾದ ಕೆಲವೇ ಕ್ಷಣಗಳಲ್ಲಿ ವಿದ್ಯುತ್‌ ಸ್ಥಗಿತಗೊಂಡು ಅಭ್ಯರ್ಥಿಗಳು ತೊಂದರೆ ಅನುಭವಿಸುವಂತಾಗಿತ್ತು. ಒಟ್ಟು 13,487 ಜೂನಿಯರ್‌ ಎಂಜಿನಿಯರ್‌ಗಳ ನೇಮಕ ನಡೆಯಲಿದ್ದು, ಬೆಂಗಳೂರು ಆರ್‌ಆರ್‌ಬಿ ಮೂಲ 708 ಹುದ್ದೆಗಳಿಗೆ ನೇಮಕ ಮಾಡಿಕೊಳ್ಳಲಾಗುತ್ತದೆ. ವಿವರಗಳಿಗೆ: http://www.rrbcdg.gov.in/