1,193 ಪಿಯು ಉಪನ್ಯಾಸಕರ ನೇಮಕಾತಿ: ದಾಖಲೆ ಪರಿಶೀಲನೆ ದಿನ ನಿಗದಿ

ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು(ಕೆಇಎ) ಸರಕಾರಿ ಪದವಿ ಪೂರ್ವ ಕಾಲೇಜುಗಳ ಉಪನ್ಯಾಸಕರ ನೇಮಕಕ್ಕೆ ಸಂಬಂಧಿಸಿದಂತೆ ಅರ್ಹ ಅಭ್ಯರ್ಥಿಗಳ ಮೂಲ ದಾಖಲೆ ಪರಿಶೀಲನೆಯನ್ನು ಜುಲೈ 15ರಿಂದ 20ರ ವರೆಗೆ ನಡೆಸಲಿದೆ.

ವಿವಿಧ ವಿಷಯಗಳ 2,320 ಅಭ್ಯರ್ಥಿಗಳು ಮೂಲ ದಾಖಲೆ ಪರಿಶೀಲನೆಗೆ ಅರ್ಹತೆ ಪಡೆದಿದ್ದು, ಅರ್ಹ ಅಭ್ಯರ್ಥಿಗಳ ವಿಷಯವಾರು ಮತ್ತು ದಿನಾಂಕವಾರು ವಿವರಗಳನ್ನು ಸದ್ಯವೇ ಪ್ರಕಟಿಸಲಾಗುವುದು ಎಂದು ಕೆಇಎಯು ಪ್ರಕಟಣೆಯಲ್ಲಿ ತಿಳಿಸಿದೆ.

ಪ್ರತಿ ದಿನ ಎರಡು ಸೆಷನ್ಸ್‌ಗಳಲ್ಲಿ ದಾಖಲೆ ಪರಿಶೀಲನೆ ನಡೆಯಲಿದ್ದು, ಬೆಳಗ್ಗೆ 10 ರಿಂದ ಮತ್ತು ಮಧ್ಯಾಹ್ನ 2 ರಿಂದ ದಾಖಲೆ ಪರಿಶೀಲನೆ ಆರಂಭಗೊಳ್ಳಲಿದೆ. ಈಗಾಗಲೇ ಕೆಇಎಯು ದಾಖಲೆ ಪರಿಶೀಲನೆಗೆ ಅರ್ಹರಾದ ಅಭ್ಯರ್ಥಿಗಳ ತಾತ್ಕಾಲಿಕ ಪಟ್ಟಿಯನ್ನು ವೆಬ್‌ನಲ್ಲಿ ಪ್ರಕಟಿಸಿದೆ. 1:2ರ ಅನುಪಾತದಲ್ಲಿ ಅಭ್ಯರ್ಥಿಗಳನ್ನು ದಾಖಲೆ ಪರಿಶೀಲನೆಗೆ ಆಯ್ಕೆ ಮಾಡಲಾಗಿದೆ.

ಜುಲೈ 15ರ ಸೋಮವಾರ ಹಿಂದಿ, ತೆಲುಗು, ಉರ್ದು, ಸಂಸ್ಕೃತ, ಪಿಜಿಯೋಲಾಜಿ, ಸ್ಟ್ಯಟಿಸ್ಟಿಕ್ಸ್‌, ಕೆಮಿಸ್ಟ್ರಿ ಮತ್ತು ಎಜುಕೇಷನ್‌ ವಿಷಯಗಳ ಅಭ್ಯರ್ಥಿಗಳ ದಾಖಲೆ ಪರಿಶೀಲನೆ ನಡೆದರೆ, ಜು.16ರ ಮಂಗಳವಾರ ಎಕನಾಮಿಕ್ಸ್‌ ಮತ್ತು ಸೋಷಿಯಲಾಜಿ, ಬುಧವಾರ ಫಿಜಿಕ್ಸ್‌, ಮ್ಯಾಥ್‌ಮೆಟಿಕ್ಸ್‌ ಮತ್ತು ಹಿಸ್ಟರಿ, ಗುರುವಾರ ಪೊಲಿಟಿಕಲ್‌ ಸೈನ್ಸ್‌ ಮತ್ತು ಇಂಗ್ಲಿಷ್‌, ಜು.19ರ ಶುಕ್ರವಾರ ಕನ್ನಡ ಮತ್ತು ಜಿಯೋಗ್ರಫಿ ಜು.20ರ ಶನಿವಾರ ಬಿಸ್ನೆಸ್‌ ಸ್ಟಡೀಸ್‌ ವಿಷಯದ ಅಭ್ಯರ್ಥಿಗಳ ದಾಖಲೆ ಪರಿಶೀಲನೆ ನಿಗದಿಯಾಗಿದೆ.

ಈ ನೇಮಕಕ್ಕೆ ಸಂಬಂಧಿಸಿದಂತೆ 2015 ಮೇ ನಲ್ಲಿ ಅಧಿಸೂಚನೆ ಪ್ರಕಟಗೊಂಡಿತ್ತು. ಒಟ್ಟು 1,193 ಹುದ್ದೆಗಳಿಗೆ ನೇಮಕ ನಡೆಯುತ್ತಿದೆ. ಹೆಚ್ಚಿನ ಮಾಹಿತಿಗೆ ವೆಬ್‌: www.kea.kar.nic.in