ಎಸ್‌ಎಸ್‌ಸಿ ಎಂಟಿಎಸ್‌ ಪರೀಕ್ಷೆ: ಆನ್‌ಲೈನ್‌ ಶುಲ್ಕ ಪಾವತಿಗೆ ಇಂದು ಸಂಜೆ ಡೆಡ್‌ಲೈನ್‌

ಹೊಸದಿಲ್ಲಿ: ಸಿಬ್ಬಂದಿ ನೇಮಕಾತಿ ಆಯೋಗವು (ಎಸ್‌ಎಸ್‌ಸಿ) ಮಲ್ಟಿ ಟಾಸ್ಕಿಂಗ್‌ (ನಾನ್‌-ಟೆಕ್ನಿಕಲ್‌) ಸ್ಟಾಫ್‌ ಪರೀಕ್ಷೆಗೆ (ಎಂಟಿಎಸ್‌) ಅರ್ಜಿ ಸಲ್ಲಿಕೆ ಈಗಾಗಲೇ ಅಂತ್ಯವಾಗಿದೆ. ಅರ್ಜಿ ಸಲ್ಲಿಸಿರುವ ಅರ್ಹ ಅಭ್ಯರ್ಥಿಗಳಿಗೆ ಆನ್‌ಲೈನ್‌ನಲ್ಲಿ ಶುಲ್ಕ ಪಾವತಿಗೆ ಇಂದು (ಮೇ 31, 2019) ಸಂಜೆ 5 ಗಂಟೆಯವರೆಗೆ ಕಾಲಾವಕಾಶವಿದ್ದು, ಚಲನ್‌ನಲ್ಲಿ ಶುಲ್ಕ ಪಾವತಿಸಲು ಜೂನ್‌ 1 ರವರೆಗೆ ಅವಕಾಶವಿದೆ.

ಇನ್ನು, ಮೊದಲನೇ ಹಂತದ ಎಸ್‌ಎಸ್‌ಸಿ ಎಂಟಿಎಸ್‌ ಸಿಬಿಟಿ 1 (ಕಂಪ್ಯೂಟರ್ ಆಧಾರಿತ ಪರೀಕ್ಷೆ ) ಆಗಸ್ಟ್‌ 2 ರಂದು ಆರಂಭವಾಗಲಿದ್ದು, ಸೆಪ್ಟೆಂಬರ್‌ 6 ರವರೆಗೆ ನಡೆಯಲಿದೆ. ಎರಡನೇ ಹಂತದ ಎಸ್‌ಎಸ್‌ಸಿ ಎಂಟಿಎಸ್‌ ಪರೀಕ್ಷೆ ವಿವರಣಾತ್ಮಕವಾಗಿರಲಿದ್ದು ನವೆಂಬರ್ 17, 2019ರಂದು ನಡೆಯಲಿದೆ.

ಈ ಬಾರಿ ಎಸ್‌ಎಸ್‌ಸಿಯ ಅಧಿಕೃತ ವೆಬ್‌ಸೈಟ್‌ನಲ್ಲಿ ಅರ್ಜಿ ಸಲ್ಲಿಸುವವರಿಗೆ ಆಯೋಗ ಹಲವು ಬಾರಿ ಎಚ್ಚರಿಸಿತ್ತು. ''ಮಲ್ಟಿ ಟಾಸ್ಕಿಂಗ್‌ (ನಾನ್‌-ಟೆಕ್ನಿಕಲ್‌) ಸ್ಟಾಫ್‌ ಪರೀಕ್ಷೆಯನ್ನು ಬರೆಯಲು ಇಚ್ಛೆ ವ್ಯಕ್ತಪಡಿಸುವ ಅಭ್ಯರ್ಥಿಗಳು ಆನ್‌ಲೈನ್‌ನಲ್ಲಿ ಅಂತಿಮ ದಿನಾಂಕ ಮೇ 29,2019 ಕ್ಕೂ ಮುನ್ನವೇ ಅರ್ಜಿಗಳನ್ನು ಸಲ್ಲಿಸಿ. ಕೊನೆಯ ದಿನಕ್ಕಾಗಿ ಕಾಯಬೇಡಿ. ಯಾಕೆಂದರೆ ಕೊನೆಯ ದಿನಗಳಲ್ಲಿ ಸರ್ವರ್‌ಗಳಲ್ಲಿ ಹೆಚ್ಚು ಟ್ರಾಫಿಕ್ ಇರುತ್ತದೆ'' ಎಂದು ಮೂರು ಬಾರಿ ಸಲಹೆ ನೀಡಿತ್ತು. ಎಸ್‌ಎಸ್‌ಸಿ ನೇಮಕಾತಿಗೆ ಈ ರೀತಿ ಎಚ್ಚರಿಕೆ ನೀಡುತ್ತಿರುವುದು ಇದೇ ಮೊದಲನೇ ಬಾರಿ.

ಹೆಚ್ಚಿನ ಮಾಹಿತಿಗಾಗಿ ಅಭ್ಯರ್ಥಿಗಳು ಎಸ್‌ಎಸ್‌ಸಿಯ ಅಧಿಕೃತ ವೆಬ್‌ಸೈಟ್ https://ssc.nic.in ಅನ್ನು ಭೇಟಿ ನೀಡಿ.