ಜೂನ್‌ 20ರಿಂದ ಯುಜಿಸಿ ನೆಟ್‌ ಪರೀಕ್ಷೆ ಆರಂಭ

ಹೊಸದಿಲ್ಲಿ: ವಿಶ್ವವಿದ್ಯಾಲಯ ಧನ ಸಹಾಯ ಆಯೋಗ(ಯುಜಿಸಿ) ನಡೆಸುವ ಅಖಿಲ ಭಾರತ ಮಟ್ಟದ ಉಪನ್ಯಾಸಕರ ಅರ್ಹತಾ ಪರೀಕ್ಷೆಯು(ನೆಟ್‌) ಜೂನ್‌ 20ರಿಂದ ಆರಂಭಗೊಳ್ಳಲಿದೆ.

ಈ ಪರೀಕ್ಷೆಯು ನಿಗದಿಯಂತೆ ಜೂನ್‌ 20, 21, 24, 25, 26, 27 ಮತ್ತು 28 ರಂದು ನಡೆಯಲಿದೆ ಎಂದು ಈ ಪರೀಕ್ಷೆ ನಡೆಸುವ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ನ್ಯಾಷನಲ್‌ ಟೆಸ್ಟಿಂಗ್‌ ಏಜೆನ್ಸಿ) ತಿಳಿಸಿದೆ.

ಈಗಾಗಲೇ ಸಂಸ್ಥೆಯ ವೆಬ್‌ನಲ್ಲಿ ಪ್ರವೇಶ ಪತ್ರವನ್ನು ಒದಗಿಸಲಾಗಿದ್ದು, ಪರೀಕ್ಷೆಗೆ ಅರ್ಜಿ ಸಲ್ಲಿಸಿರುವ ಅಭ್ಯರ್ಥಿಗಳು ಅಪ್ಲಿಕೆಷನ್‌ ನಂಬರ್‌, ಜನ್ಮದಿನಾಂಕ ಮತ್ತು ಸೆಕ್ಯುರಿಟಿ ಪಿನ್‌ನೊಂದಿಗೆ ಲಾಗಿನ್‌ ಆಗಿ ಪ್ರವೇಶ ಪತ್ರ ಪಡೆದುಕೊಳ್ಳಬಹುದಾಗಿದೆ.

ಪ್ರವೇಶ ಪತ್ರದಲ್ಲಿಯೇ ಪರೀಕ್ಷೆಯ ದಿನಾಂಕ, ಸ್ಥಳ ಮತ್ತು ಸಮಯದ ಮಾಹಿತಿಯನ್ನು ನೀಡಲಾಗಿರುತ್ತದೆ. ಪರೀಕ್ಷೆ ಕುರಿತು ಹೆಚ್ಚಿನ ಮಾಹಿತಿಯನ್ನು 8076535482, 7703859909 ಈ ನಂಬರ್‌ನಿಂದ ಪಡೆದುಕೊಳ್ಳಬಹುದು. ವೆಬ್‌: https://ntanet.nic.in/ntanetcms/public/home.aspx